Last updated on August 15th, 2023 at 06:42 pm
ತುಳುನಾಡ ಸೀಮೆಡ್ ಒಂಜಿ ಕುಟುಮೊಡು ಎಳುವೆರ್ ತಗೆಯರ್ಲೆಗ್ ಒರ್ತಿ ತಂಗಡಿ ಇತ್ತೊಲುಗೆ. ಅಲೆನ್ ಒರ್ತಿ ಅಪ್ಪೆನ ಒರಿ ಮಗಕ್ ಮದ್ಮೆ ಮಲ್ತ್ ಕೊರ್ಪೆರ್‌ಗೆ. ಕಂಡನೆಲಾ ಬೊಡೆದಿಲಾ ಬಾರೀ ಸಂತೊಸೊಡು ಜೀವನ ಮಲ್ತೊಂದಿಪ್ಪುವೆರ್. ಇಂಚುಪ್ಪುನಗ ಅಲೆನ ಕಂಡನಗ್ ಕೊಲಲಗ್ ಪೋಪಿನ ಸಂದರಪ್ಪು ಬತ್ತ್ಂಡ್. ಇಲ್ಲ್ ಬುಡ್ದ್ ಆಯೆ ದಂಡ್‌ಗ್ ಪೋಪೆ. ಆಯೆ ಅಂಚಿ ಪೋಯಿನೇ ನೆಟೆ ಮಾಮಿಗ್ಲಾ ಮರ್ಮಲೆಗ್ಲಾ ದುಂಬು ಪಿರ ಪತ್ತುಂಡು. ಮಾಮಿ ಮರ್ಮಲೆಗ್ ಶಿಕ್ಷೆ ಕೊರಿಯರೆ ಪತ್ತಿಯೊಲುಗೆ. ಕಡೆಕ್ ಮಾಮಿನ ಶಿಕ್ಷೆ ತಡೆಪರೆ ಆವಂದೆ ತಂಗಡಿ ಕಂಡನಿಲ್ಲ್ ಬುಡ್ದ್ ತಗೆಯರ್ಲೆ ಇಲ್ಲಗ್ ಬತ್ತೊಲುಗೆ. ಕಂಡನೆ ಕೊಲಲ ಅಗತ್ ಇಲ್ಲಗ್ ಬರ್ಪೆ. ಇಲ್ಲಗ್ ಬನ್ನಗ ಬೊಡೆದಿ ತೋಜುಜೊಲು. ಒಡೆ ಪೋಯೊಲು ಪನ್ದ್ ಅಪ್ಪಡ ಕೇನ್ನಂಗೆ ಇತ್ತಿ ಇಸಯ ದೆಂಗಾದ್ ನಿನ್ನ ಬೊಡೆದಿ ಇಲ್ಲ್ ಬುಡ್ದ್ ಪೋತೊಲು ಪನ್ದ್ ಕಲು ಪನ್ಪೊಲು. ಅಲೆಗ್ ಕಂಡನರ್ದ್ ಮಲ್ಲ ತಗೆಯರ್ಲೇ ಆಯೆರ್ ಪನ್ದ್ ಕೆಬಿ ಪಿತ್ತಲೆ ಮಲ್ಪುವೊಲು. ಉಂದೆಟ್ ಉರ್ಬೆಚ್ಚಿನ ಕಂಡನೆ ಅಲೆನ ಕಂಡನ ಇಲ್ಲದಲ್ಪ ಏರ್ಲಾ ಉಪ್ಪಂದಿನ ಪೊರ್ತು ಬತ್ತ್‌ದ್ ದೆಂಗ್‌ದ್ ಕುಲ್ಲುದು ಪಗರಿ ಬುಡ್ದ್ ಬೊಡೆದಿನ್ ಕೆರ್ಪೆ.
ಆ ಪೊರ್ತುಗು ಬೋಂಟೆಗ್ ಪೋತಿನ ತಗೆಯರ್ಲೆಗ್ ಪಕ್ಕಿಯೊಂಜಿ ಮರತ ಕೊಡಿಟ್ ಕುಲ್ಲುದು ಕರೆಯುನ ಕೇನುಂಡು. ಉಂದು ಪಕ್ಕಿ ತೀರಿನ ತಂಗಡಿ ಪನ್ದ್ ಅವೆಟ್ ಒರಿ ಪಲಯಗ್ ತೆರಿಯುಂಡು. ಉಲ ಉಲ ತನ್ಕುಲೆ ತಂಗಡಿಗ್ ಇಂಚಿನ ಪರಿಸ್ಥಿತಿ ಬತ್ತ್ಂಡೇ ಪನ್ದ್ ಪಿಲೆ ಬುಡ್ಪೆರ್ ಪಲಯಲ್ಲು. ತನ್ಕುಲೆ ಬಾವೆನೇ ತಂಗಡಿನ್ ಕೆರಿನಿ ಪನ್ದ್ ತೆರಿನ ಪಲಯರ್ಲು ಬಾವನ ಇಲ್ಲಗ್ ಬರ್ಪೆರ್. ಅಲ್ಪ ತಂಗಡಿ ತೀರಿನ ತೆರಿಯಂದಿಲೆಕ್ಕ ನಾಟಕ ಮಲ್ಪುವೆರ್. ಬಾವಡ ಬೋಂಟೆಗ್ ಪೋಯಿ ಪನ್ದ್ ಚದಿ ಕಟ್ಟುವೆರ್. ಬೋಂಟೆಗ್ ಆಯನ್ ಲೆತೊಂದು ಪೋದು ಅಲ್ಪ ಆಯನ್ ಕೆರ್ಪೆರ್. ಕೆರ್ದ್ ಕೊಚ್ಚಿ ಕೊಚ್ಚಿದ್ ಪಾಡುವೆರ್. ಕೊಚ್ಚಿನ ಮಾಸ ಪತೊಂದು ಬಾವನ ಇಲ್ಲಗ್ ಬರ್ಪೆರ್. ಆ ಮಾಸ ಕೊರ್ದು ಆಯನ ಅಪ್ಪೆಡ ಕಜಿಪು ಮಲ್ಪರೆ ಪನ್ಪೆರ್. ಅವ್ ತನ್ನ ಮಗೆನವೇ ಮಾಸ ಪನ್ದ್ ತೆರಿಯಂದಿನ ಅಪ್ಪೆ ಅಟಿಲ್ ಮಲ್ಪರೆ ಪಿದಡುವೊಲು. ತನ್ನ ಮಗೆ ಓಲುಲ್ಲೆ ಪನ್ದ್ ಅಪ್ಪೆ ಕೇನ್ನಗ ಆಯೆ ಪಿರವುಡು ಬರೊಂದುಲ್ಲೆ ಪನ್ದ್ ಅಕುಲು ಪನ್ಪೆರ್. ಕಜಿಪು ಆಯಿನೇ ಉಪ್ಪು ಚಪ್ಪೆ ತೂಲ ಮಾಸ ತಿನ್ಲೆ ಪನ್ದ್ ಪಲಯರ್ಲು ತನ್ಕುಲೆ ಬಾವನ ಅಪ್ಪೆಡ ಪನ್ಪೆರ್. ಒತ್ತಾಯೊಡು ಅಲೆಗ್ ಅಲ್ನ ಮಗನವೇ ಮಾಸ ತಿನ್ಪಾವೆರ್. ಆಲ್ ತಿಂಡಿನೇ ಅಕ್ಲೆನ ತಂಗಡಿನ ಪ್ರತೀಕಾರ ತೀರ್ಂಡ್ ಪನ್ದ್ ಅಲ್ಪ ನಡತಿನ ವಿಷಯ ಅಲೆಗ್ ತೆರಿಪಾದ್ ಎಲ್ವೆರ್ ತಗೆಯರ್ಲು ಪಿರ ಪೋಪೆರ್.