Last updated on June 14th, 2023 at 10:56 am
ಸತ್ಯೊಗು ಸಾರ ಸಾದಿಲು ಉಲ್ಲ. ಒವ್ವೇ ಸಾದಿಡ್ ನಡತ್ಂಡಲಾ ಕಡೆಕ್ ಎತ್ತುನು ಒಂಜೇ ಕಡೆಕ್, ಆ ಸತ್ಯ ದಾದ? ಆತ್ಮೊಗು ಸಂಸ್ಕೃತಿಡೊಂಜಿ ಪರಿಭಾಷೆಲು ಉಂಡು. ನರಮಾನಿ ಕಾಡ್ ಬುಡ್‌ದ್ ನಾಡ್‌ಗ್ ಜತ್ತ್ ,ಸಂಸಾರಿ ಆದ್ ಬೆನ್ನಿ ಮಲ್ತ್ ,ಬಂಜಿದ ಕುಜಾರ್ಮೆಗ್ ಸೊಂದುದು ಬೆಂದ್‌ದ್, ಪಸಂದ್ರದ ದುನಿಪುಲೆನ್ ಗೋಡ್ಯಾದ್ ಬಾಸೆ ಮಲ್ತ್ ಆ ಬಾಸೆಗೊಂಜಿ ಒರು ಕೊರ್ದು ಮದಿಪು ಮಲ್ತ್ , ನಾಗರೀಕತೆ ಮಲ್ತೆ. ನೀರ ಸೆಲೆತ ಬರಿಟ್ ಮುಗೆರ ಭೂಮಿಡ್ ಬದುಕೊಂದು, ಬದುಕುನವು ಪರಂಪರೆ ಆದ್, ಕಾಲ ಕರಿನೇ ಸಂಸ್ಕೃತಿ ಆಂಡ್. ಈ ಸಂಸ್ಕೃತಿಲೆನ ಎಗ್ಗೆಡ್ ಸಾವು ಗೊಂಜಿ ನೀತಿ ಪುಟ್ಟುಗೊಂಜಿ ನೀತಿ ಬದ್‌ಕ್‌ಗೊಂಜಿ ನೀತಿ ಮಲ್ತೊಂಡೆ. ನೀತಿದ ದಿಸೆಟ್ ಜಾತಿ ಮಲ್ತೊಂಡೆ, ದೈವ ದೇವೆರ್ ಉದಿತೆರ್. ಕಟ್ಟ್ ಕಟ್ಟಲೆ ಬುಲೆಂಡ್. ಆಂಡ ಒಂಜಿ ಪಾತೆರೊನು ನಮ್ಮ ಪೆರಿಯಾಕುಲು ಎಡ್ಡೆಡ್ ನೆಂಪು ದೀದಿತ್ತೆರ್, ದಂಡಿಗೆ ಏರಿನಾಯೆಲಾ ಪೋವೊಡೇ, ದಂಡಿಗೆ ತುಂಬಿನಾಯೆಲಾ ಪೋವೊಡೇ, ಎರೆನಲಾ ಶಾಶ್ವತ ಇಲ್ಲ್ ಉಂದತ್ತ್. ಪುಟ್ಟಿಕಿಲೆಟ್ ಪೂವೊಲು ಮೂಡುನಗನೇ ನಮ್ಮ ನಿಸಲೆಬರವು ಬರೆಪುಂಡು ಪನ್ದ್ ಆಸ್ತಿಕೆರ್ ಪನ್ಪೆರ್. ಉಂದು ಪೂರಾ ಕಲು ಪುಟ್ಟಿನಾಯೆ ಒವ್ವಾಂಡಲ ಒಂಜಿ ನೆವನೊಡು ಸೈಪೆ ಪನ್ದ್ ನಾಸ್ತಿಕೆರ್ ಪನ್ಪೆರ್. ತಾದಿ ಬೇತೆ ಬೇತೆ ಆಂಡ ಸಾವು ಸತ್ಯ. ಪುಟ್ಟು ನಿರೀಕ್ಷಿತ, ಒಂಜಿ ಬಾಲೆ ಕಿಲೆಟ್ ತೆತ್ತಿಯಾದ್ ಒರುಂಬ ತಿಂಗೊಲು ಬುಲೆಯೊಂದು ಜನನೊಂದ ತಾದಿಟ್ ನುರ್ಕೊಂದು ಬರ್ಪಿನವು ನಿರೀಕ್ಷಿತ, ಆಂಡ ಸಾವುಗು ಲೆಪ್ಪು ಕೊರ್ದು ಕಾಪೊಡುಂದು ಇಜ್ಜಿ ಅವ್ ಅನಿರೀಕ್ಷಿತ, ಜತ್ತಿ ಬಾಕಿಲ್ ಜತ್ತ್ ಪೋಯಿನ ನರಮಾನಿ ಪಿರ ಬರ್ಪೆರ್ ಪನ್ಪಿನವು ನಂಬೊಲಿಗೆ ಮಾತ್ರ. ಈ ನಂಬೊಲಿಗೆತ ಸೊರ್ಕುಡೇ ಲೋಕ ಉಂತುದಿನಿ, ಕಾಲಬಂಡಿ ಮಗರ್‌ದಿನಿ. ನರಮಾನಿ ಬತ್ತಿನವು ಪೋಯಿನವು ನೆಂಪು ಮಾತ್ರ, ಈ ನೆಂಪುಲಾ ಒಂಜತ್ತ್ ಒಂಜಿ ದಿನ ಮಾಜುಂಡು. ಕರ್ಲಬೂರುಲು ನೆತ್ತೆರಕೊಂಡಿ ಕಡಿತೊಂದು ನನ ಇಜ್ಜಿ ಪನ್ಪಿನವು ಉಡಲ್‌ಡ್ ಪುಲೆಯೊಂದು ಗಾಯ ಆವು, ಒವ್ ಪುಡಿಲಾ ಕಾಲೊದ ಬಲ್ಪಾಟೊಗು ಮಾಜುಂಡು. ಕಾಲೊರ್ದು ಮಲ್ಲ ಮರ್ದ್ ಒವ್ಲಾ ಇಜ್ಜಿ. ಕಾಲದ ಬಂಡಿದ ಅಡಿಕ್ ಬೂರೊಂದು ನೆಂಪು ತರೆಯೊಂದು ಕಡೆಕ್ ಒರಿಯುನು ದಾದ? ಮಾಜೊಂದು ಬತ್ತಿನ ಸಾವುದ ಬೇನೆ? ಭೂಮಿಗ್ ಬೂರಿನ ನೀರ್ ಆಜಿದ್ ಕುಡ ಮುಗಲಾದ್ ಪಿರ ಭೂಮಿಗ್ ಬರ್ಪುಂಡು. ಜೀವನಚಕ್ರದ ಪರಿಭಾಷೆಲಾ ಅಂಚೆನೆ ನಮ ಬತ್ತ, ಇತ್ತ, ಪೋಯ! ಎಲ್ಲೆ ಅಕುಲುಲಾ ಬತ್ತೆರ್, ಇತ್ತೆರ್, ಪೋಯೆರ್! ಮೂಲು ಒರಿಯಿನಕುಲು ಏರ್ಲಾ ಇಜ್ಜಿ. ಒರಿಯಿನಿ ಒಂಜೇ ಸಾವು ಶಾಶ್ವತ ಅವ್ವೇ ಸತ್ಯ.