ಸರ್ಕಾರಿ ಶಾಲೆದ ಜೋಕುಲೆಗ್ ಕೊಡೆ ಭಾಗ್ಯ: ತುಳುನಾಡ ಜವನೆರೆ ಪುನೆಪು

Last updated on August 15th, 2023 at 06:40 pm

ಪ್ರೈವೇಟ್ ಶಾಲೆಗ್ ಪೋಪುನ ಜೋಕುಲೆಗ್ ಎಡ್ಡೆ ಕುಂಟು, ಮುಟ್ಟು, ಕೊಡೆ ಮಾತಲಾ ಇಪ್ಪುಂಡು. ಆಂಡ ಸರ್ಕಾರಿ ಶಾಲೆಗ್ ಪೋಪುನ ಮಾತ ಜೋಕುಲೆಗ್ ಇಂಚಿನ ಸಾವ್ಕಾಸ ಇಪ್ಪುಜಿ. ಕೆಲ ಜೋಕುಲೆಗ್ ಸಮ ಕುಂಟುಲಾ ಇಪ್ಪುಜಿ.

ಬಜಿಕಾರ್‌ಡ್ ಶಾಲೆ ಪೋಪುನ ಅವೇತೋ ಜೋಕುಲುಲ್ಲೆರ್. ನನ ಮರಿಯಾಲ ಬತ್ತ್ಂಡ ಕೇನುನೇ ಬೊರ್ಚಿ. ನಮ್ಮ ತುಳುನಾಡ್ ಅಂಚೆನೇ ಮಲೆನಾಡ್‌ಡ್ ಬರ್ಪಿ ಬರ್ಸೊಗು ಕೊಡೆದಾಂತೆ ಪಿದಯಿ ಪೋವರೆಲಾ ಆಪುಜಿ. ಅಂಚಾದ್ ತುಳುನಾಡ್‌ದ ಮೂಜಿ ಜವನೆರೆ ಕೂಟ ಒಂಜಿ ಸರ್ಕಾರಿ ಶಾಲೆಲೆನ ಜೋಕುಲೆಗ್ ಕೊಡೆ ಕೊರ್ದು ಇಸೇಸ ಸೇವೆ ಮಲ್ತೊಂದುಂಡು.

ಫೀಲ್ಡ್ ಇನ್ಸ್ಪೆಕ್ಟರ್ ಸುಕೇಶ್ ಪೂಜಾರಿ, ಸಾಫ್ಟವೇರ್ ಇಂಜಿನಿಯರ್ ಆಶ್ರಿತ್ ಶೆಟ್ಟಿ ಬೊಕ್ಕ ರೂಪೇಶ್ ನಾಯ್ಕ್ ಈ ಮೂಜಿ ಜನ ಜವನೆರ್ ಸೇರ್ದ್ ಇಂಚಿನ ಒಂಜಿ ಎಡ್ಡೆ ಬೇಲೆಗ್ ಕೈ ಪಾಡ್ದೆರ್.

ಮೊಕಲೆಗ್ ಒಂತೆ ಜನ ದಾನಿಲುಲಾ ಸಕಾಯ ಮಲ್ತೊಂದಿತ್ತ್‌ದ್, ಎಚ್ಚಾದ್ ಸರಕಾರಿ ಶಾಲೆಲೆನೇ ನಾಡ್‌ದ್ ಅಲ್ತ ಪಾಪದ ಜೋಕುಲೆಗ್ ಬೋಡಾಪಿ ಸೊತ್ತುಲೆನ್ ಕೊರೊಂದು ಬರ್ಪೆರ್. ಈ ಸರ್ತಿ ಬೊಲ್ತೇರ್, ಶೃಂಗೇರಿ, ಕೊಪ್ಪ, ಹರಿಹರ ಬೊಕ್ಕ ಹಾಸನದ ಜೋಕ್ಲೆಗ್ ಕೊಡೆಕ್ಲೆನ್ ಕೊರ್ತೆರ್.

3 ಜಿಲ್ಲೆಲೆನ 5 ತಾಲೂಕ್‌ಡುಪ್ಪುನ 11 ಸರಕಾರಿ ಶಾಲೆಲೆನ ಜೋಕುಲೆಗ್ ದರ್ಮೊಗು ಕೊಡೆಕ್ಲೆನ್ ಕೊರ್ತೆರ್. ಸುಮಾರ್ 100 ಜನ ದಾನಿಲೆರ್ದ್ ಒಟ್ಟಾತಿನ 1.2 ಲಕ್ಷ ಕಾಸ್‌ರ್ದ್ 500 ಜೋಕುಲೆಗ್ ಕೊಡೆಕ್ಲೆನ್ ಪಟ್ಟ್‌ದೆರ್

ಉ್ಂದೆಕ್ ದುಂಬು ಬಂಟ್ವಾಳ ತಾಲೂಕ್‌ದನ ಬಳಂಜ ಬೊಕ್ಕ ಒಡಿಪುದ ಹೆಬ್ರಿಡ್ ಲೈಬ್ರರಿಲೆನ್ ಈ ಜವನೆರೆ ಕೂಟ ಕಟ್ಟಾದ್ ಕೊರ್ದಿತ್ತ್ಂಡ್. ಆತೆ ಅತ್ತಂದೆ, ನಡುಟು ಶಾಲೆ ಉಂತಾವುನ ಜೋಕುಲೆನ್ ಪಿರ ಶಾಲೆಗ್ ಬರ್ಪುಲೆಕ ಮನ್ಪೆರ ಬೋಡಾಪಿ ಸಕಾಯೊಲೆನ್ ಮನ್ತೊಂದುಲ್ಲೆರ್.