Last updated on August 15th, 2023 at 06:40 pm
ಮೂಜಿ-ನಾಲ್ ಮಾರ್ಗ ಸೇರುನ ಜಂಕ್ಷನ್‌‌ಲು ಇತ್ತೆ ಬಿ.ಸಿ.ರೋಡ್- ಅಡ್ಡಹೊಳೆ ಚತುಷ್ಪಥ ಪೆರ್ಸಾದಿ ನಿರ್ಮಾಣೊದ ಬೇಲೆಡ್ ಸಂದರ್ಭ ಅಂಡರ್ಪಾಸ್ ಆದ್ ಪರಿಮಾರ್ ಆತ. ಈ ಅಂಡರ್‌ಪಾಸ್‌ಲೆಡ್ ಪಾಣೇರ್, ಮೆಲ್ಕಾರ್ ಬೊಕ್ಕ ಮಾಣಿಡುಪ್ಪುನ ಅಂಡರ್‌ಪಾಸ್‌ಲು ತೂನಗ ಎಚ್ಚಿನ ಬೇಲೆ ಆತಿಲೆಕ ತೋಜಿಂಡಲಾ, ಎಲ್ಯ ಎಲ್ಯ ಬರ್ಸೊಲೆಗೇ ಅಂಡರ್‌ಪಾಸ್‌‌ದ ಅಡಿಟ್ ಕೆಸರ್‌ದೊಟ್ಟುಗು ನೀರ್ ಉಂತುದು ಜನೊಕ್ಲೆಗ್ ಉಪದ್ರ ಕೊರೊಂದುಂಡು.
ಅಂಡರ್ಪಾಸ್ ಮಲ್ದಿನ ಜಂಕ್ಷನ್‌ಲೆಡ್ ಎಚ್ಚಿನ ಪ್ರಮಾಣೊಡು ಮಣ್ಣ್ ದಿಂಜಾಯಿನೆರ್ದಾವರ ಬರ್ಸ ಬನ್ನಗ ಜಪ್ಪೆಲ್ ಜಾಗೆಲೆಡ್ ಬಾರಿ ಬಂಙ ಆಪುಂಡು. ಬಂಟ್ವಾಳದ ಮೆಲ್ಕಾರ್ ಜಂಕ್ಷನ್‌ಡ್ ಬರ್ಸದ ನೀರ್ ಪೋಯೆರನನಲಾ ಸಮ ಡ್ರೈನೇಜ್ ವ್ಯವಸ್ಥೆ ಮನ್ಪಂದಿನೆರ್ದಾವರ ಮುಲ್ಪದಕ್ಲೆಗ್ ಅಂಚೆನೇ ಈ ಸಾದಿಯೇ ಪೋಪಿನಕ್ಲೆಗ್ ಬಾರಿ ಬಂಙ ಆತ್ಂಡ್. ಅಂಡರ್‌ಪಾಸ್‌‌ದ ಅಡಿಟ್ ಕೆಸರು ಮಣ್ಣ್ ಉಂತುದ್, ಜೋರು ಬರ್ಸ ಬತ್ತ್ಂಡ, ಮೆಲ್ಕಾರ್‌ರ್ದ್ ಕೊಣಾಜೆ ರೋಡ್ ಮುಟ್ಟ ನೀರ್ ತೋಡುಡು ಪೋಯಿನಂಚ ರೋಡ್‌ಡ್ ಪೋಪುಂಡು.
ಕೆಲಕಡೆಟ್ ಬರ್ಸದ ನೀರ್ ಪರತ್ ಪೋಯೆರ ಸಮಕಟ್ಟ್‌ದ ಡ್ರೈನೇಜ್ ವ್ಯವಸ್ಥೆಲಾ ಇಜ್ಜಿ. ನನ ಮಲ್ಲ ಬರ್ಸೊಗು ದಾದ ಆಪುಂಡಾ ಪಂದ್ ಕಾತ್ ತೂವೊಡಾತೆ. ಕಲ್ಲಡ್ಕಡ್ ಬೇಲೆ ಬಾರಿ ಮೆಲ್ಲ ಸಾಗೊಂದಿತ್ತ್‌ದ್, ಇಂಚೆನೇ ಪೋಂಡ ಮರ್ಯಲದ ನನದ ದಿನೊಟು ಬಾರಿ ಬಂಙ ಆಪಿಲೆಕ ತೋಜುಂಡು.
ಕರಿನ ವರ್ಸ ಬೇಲೆ ಸುರು ಆಯಿನೆರ್ದಾವರ ಮಸ್ತ್ ತೊಂದರೆಲಾದಿತ್ತ. ಅಂಚಾದ್ ಈ ಸರ್ತಿ ಬರ್ಸದ ನೀರ್ ಪೋಯೆರ ಚರಂಡಿದ ವ್ಯವಸ್ಥೆ ಮಲ್ತ್‌ದ, ಅಂಚಾದ್ ದಾಲ ತೊಂದರೆ ಆವಂದ್ ಪಂದ್ ಬೇಲೆ ಮನ್ಪುನಕ್ಲ್ ಪನ್ಪೆರ್.