Last updated on August 3rd, 2023 at 08:25 pm
✍️ ಸತೀಶ್ ಎಂ ಶೆಟ್ಟಿ, ಪೆರಾರ
ಅವಧೂತ ನಿತ್ಯಾನಂದ ಸ್ವಾಮಿಲೆನ್ ತೂಪಿನ ಸೌಭಾಗ್ಯ ನಮಕಿಜ್ಜಿ. ಆಂಡ ಅರೆನ್ ತೂತಿನಕಲೆನ, ತೂದು ಪಾತೆರ್ಪಾಯಿನಕಲೆನ್ ತೂಪುನ ಭಾಗ್ಯ ನಮ್ಮೆಟ್ಟ್ ಕೆಲವೆರೆಗ್ ಉಂಡು. ಎಂಕ್ಲೆ ತಮ್ಮಲೆ (ಬೊಡೆದಿನ ಅಮ್ಮೆರ್) ಬೊಕ್ಕ ನೇಲ್ಯಮ್ಮೆರ್ ನಿತ್ಯಾನಂದ ಸ್ವಾಮಿಲೆನ್ ತೂತೆರ್ ಅಂಚೆನೆ ಪಾತೆರ್ಪಾದೆರ್. ಗುರುಕುಲೆನ ಬಗೆಟ್ ಅರೆನ ಅನುಭವದ ಪಾತೆರೊಲೆನ್ ಎಂಕ್ಲೆ ತಮ್ಮಲೆ ಅಂಚೆನೆ ನೇಲ್ಯಮ್ಮೆರೆ ಬಾಯಿರ್ದ್ ಕೇನೊಂದಿತ್ತಿಲೆಕ್ಕನೇ ಗುರುಕುಲೆನ ಚಿತ್ರ ಚಿತ್ತದ ಮಿತ್ತ್ ತೋಜಿದ್ ಬರೊಂದಿತ್ತ್ಂಡ್.
ಎಂಕ್ಲೆನ ನೇಲ್ಯಮ್ಮೆರ್ ಕುಡೆತ್ತೂರು ಮಾಗಂದಡಿ ದಿ. ಶ್ಯಾಮ ಶೆಟ್ಟ್ರ್ ಆ ಕಾಲೊಡು ಕಟೀಲ್‌ದಲ್ಪ ಮಲ್ಲ ಪುದರ್ ಪೋತಿನ ಅಂಚಿನೆ ಎಡ್ಡೆ ಅನುಕುಲ ಇತ್ತಿನ ಜನ. ಒರ ಆರ್ ಅರೆನ ಜೀವಿತ ಕಾಲೊಡು ನಿತ್ಯಾನಂದ ಸ್ವಾಮಿಲೆನ್ ತೂವರೆ ಪೋನಗ ಸ್ವಾಮಿಲು ಅರೆಗ್ ಎಲ್ಯ ಬೀಸತ್ತಿ (knife) ಕೊರ್ದು ಪನ್ದಿತ್ತೆರ್ಗೆ “ಉಂದು ನಿನ್ನ ಸ್ವಯಂ ರಕ್ಷಣೆಗ್. ಉಂದೆನ್ ಬೊಡ್ಚಾಂದಿನೆಕ್ಕ್ ಗಲಸಡ.” ಆ ಬೀಸತ್ತಿ ನೇಲ್ಯಮ್ಮೆರೆ ಒಟ್ಟುಗು ಜೀವನದ ಅಕೇರಿ ಮುಟ್ಟಲ ಇತ್ತ್ಂಡ್, ತೆಟ್ಟ್ ಕಜ್ಜೊಗು ಗಲಸಂದಿ ಲೆಕ್ಕ.
ಮಲ್ಲ ಜೀವ, ಕಪ್ಪು ರಂಗ್, ಎಲ್ಯ ಮಂಡೆ, ಮಲ್ಲ ಬಂಜಿ ವಿಚಿತ್ರ ಒರು ನಿತ್ಯಾನಂದ ಸ್ವಾಮಿಲೆನ. ಆಂಡ ಅರೆನ ಆ ಮೋನೆನ್ ಒರ ದಿಟ್ಟಿ ದೀದ್ ತೂಂಡ ಅಲ್ಪ ಸುಖದ ಅನುಭವ. ನೆಮ್ಮದಿದ ಸಾಗರ.
ಕೋಮನ ಕಟ್ಟೊಂದು ಗಣೇಶ್ಪುರಿ ಪನ್ಪಿನ ಎಲ್ಯ ಊರುಡು ನಿಲೆಯಾದ್ ಭಕ್ತಿರ್ದ್ ಬತ್ತಿನ ಪಾಪದ ಭಕ್ತರೆಗ್ ಬಡವ ಸಿರಿವಂತೆ ಪನ್ಪಿ ಮಿತ್ತ್ ತಿರ್ತ್ ತೂಪಾವಂದೆ ತನ್ಕುಲೆ ಕಾರ್ನಿಕ ಶಕ್ತಿನ್ ತೂಪಾಯೆರ್‌. ತ್ರಿಕಾಲ ಜ್ಞಾನಿಯಾದ್ ಮೆರೆಯೆರ್. ಅಪ್ಪೆ ಅಮ್ಮೆರೆನ ಚಾಕಿರಿರ್ದ್ ಮಲ್ಲ ಸೇವೆ ನನೊಂಜಿ ಇಜ್ಜಿ ಪನ್ದ್ ತೆರಿಪಾಯೆರ್. ತೆಟ್ಟ್ ವ್ಯಸನಲೆನ ಚಕ್ರವ್ಯೂಹಡ್ ತಿಕ್ಕೊಂದು ಪಿದಯಿ ಬರಿಯರೆ ಆವಂದೆ ತುಲ್ಲಾರೊಂದಿತ್ತಿನಕಲೆಗ್ ತುಡರಾಯೆರ್. ಜೋಕುಲುಪ್ಪಂದೆ ಬುಲ್ಪುನಕಲೆಗ್ ಸಂತಾನ ಭಾಗ್ಯ ಕೊರಿಯೆರ್.
ಜನ ಇಲ್ಲ ಇಲ್ಲಡ್ ನಿತ್ಯಾನಂದೆರೆ ನಿತ್ಯ ಭಜನೆ ಮಲ್ತೆರ್. ಪಾನ್ ಶಾಪುರ್ದ್ ಪತ್‌ದ್ ಪಂಚತಾರಾ ಹೋಟೆಲ್ ಮುಟ್ಟ ನಿತ್ಯಾನಂದೆರೆ ಫೋಟೋ ದೀದ್ ನಿತ್ಯ ವಂದನೆ ಸಂದೈತೆರ್.
ನಮ್ಮ ಸದ್ಗುರು ನಿತ್ಯಾನಂದೆರ್ ಮದಪರೆ ಆವಂದಿನ ಮಹನೀಯೆರ್. ನಮ್ಮ ದುಂಬುದ ಜೋಕುಲೆಗ್ ನಿತ್ಯಾನಂದ ಸ್ವಾಮಿಲೆನ ಬಗೆಟ್ ತೆರಿಪಾದ್ ಕೊರೊಡು. ಗಣೇಶ್ಪುರಿತ ದರ್ಶನ ಮಲ್ಪಾವೊಡು.
ಮನಸ್ಸಾನಗ ಯಾನ್ ಎನ್ನ ಸಂಸಾರದೊಟ್ಟುಗು ಇಜಿಂಡ ಒರೊರ ಒರಿಯೇ ನಿತ್ಯಾನಂದ ಸ್ವಾಮಿಲೆನ ದರ್ಶನೊಗು ಗಣೇಶ್ಪುರಿಗ್ ಪೋಪೆ. ಮಿತ್ತರ್ಮೆಡ್ ಕುಲ್ದಿನ ವಜ್ರೇಶ್ವರಿತ ತ್ರಿದೇವಿಯೆರ್ನ ದರ್ಶನೊರ್ದು ಬೊಕ್ಕ ಗಣೇಶ್ಪುರಿತ ಸ್ವಾಮಿಲೆನ ಸಮಾಧಿದ ದುಂಬು ಉಂತುದು ಭಕ್ತಿಡ್ ಬಾವುಕೆರಾಪಿನ ಒಂಜಿ ವಿಲಕ್ಷಣ ಅನುಭವ. ಕುಡ ದೇವಸ್ತಾನದ ಕೈತಲ್ ಉಪ್ಪುನ ಮ್ಯುಸಿಯಂಡ್ ಕ್ರಮಬದ್ಧವಾದ್ ನೇಲಾದಿನ ನಿತ್ಯಾನಂದ ಸ್ವಾಮಿಲೆನ ಜೀವಿತ ಪೊರ್ತುದ ಪಟೊಕುಲೆನ್ ತೂಪಿನವು ಕಣ್ಣಿಗ್ ಪರ್ಬವಾದ್ ಮನಸ್‌ಗ್ ಆನಂದ ಕೊರ್ಪುಂಡು.
ವರ್ಸೊಡು ರಡ್ಡ್ ದಿನ ಪನ್ಡ ಒಂಜಿ ಗುರು ಪೂರ್ಣಿಮೆ ಕುಡೊಂಜಿ ನಿತ್ಯಾನಂದೆರ್ ಸಮಾಧಿ ಆತಿನ ದಿನತಾನಿ ಸ್ವಾಮಿಲೆನ ಬಿಂಬದ ಕೈತಲ್ ಮಾತಾ ಭಕ್ತಾದಿಲು ದರ್ಶನ ದೆತೊನ್ದು ಬಿಂಬೊನು ಮುಟುದು ಪಾವನೆರಾಪಿನ ಸುಯೋಗ ಉಂಡು.
ಇಂಚೊಗು 04.07.2023 ತಾನಿ ಯಾನ್ ಗುರು ಪೂರ್ಣಿಮೆದ ದಿನ ನಿತ್ಯಾನಂದ ಸ್ವಾಮಿಲೆನ ದರುಶನ ಮಲ್ಪರೆ ಗಣೇಶ್ಪುರಿಗ್ ಪೋದಿತ್ತೆ. ಮಸ್ತ್ ಜನ ಭಕ್ತೆರ್ ಬೈದಿತ್ತೆರ್. ರಡ್ಡ್ ಗಂಟೆರ್ದ್ ಬೊಕ್ಕ ಸ್ವಾಮಿಲೆನ ಪಾದ ಸ್ಪರ್ಶ ಮಲ್ತ್ ಪುಡ್ಯಡುನ ಯೋಗ ಎಂಕ್ ಕೂಡ್ದ್ ಬತ್ತ್ಂಡ್.
ಆನಿದ ಆ ಭಕ್ತ ಜನಕುಲೆಡ್ ಇತ್ತಿನಕುಲು ಮಸ್ತ್ ಜನ ಮರಾಠಿದಕುಲು. ನಮ್ಮ ತುಳುನಾಡ್‌ದ ಬಂಧುಲು ಇತ್ತಿನ್ ಮಸ್ತ್ ಕಮ್ಮಿ. ಮಸ್ತ್ ಬೆಸರಾಂಡ್.
!! ಗುರುಭ್ಯೋನಮಃ !!
Satish M. Shetty Perara