Last updated on August 3rd, 2023 at 08:25 pm
ರಾಮಕುಂಜ: ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆ ಬೊಕ್ಕ ನೇತ್ರಾವತಿ ತುಳುಕೂಟ (ರಿ) ರಾಮಕುಂಜ ಮೊಕ್ಲೆನ ಮುತಾಲಿಕೆಡ್ ಶಾಲೆಡ್ ಕೋಡೆ ಜೋಕುಲು, ಪೆದ್ದಿನಕುಲು, ಕಲ್ಪಾದಿಲು ಸೇರ್ದ್ ಆಟಿ ಅಮಾಸೆನ್ ಕರಿತೆರ್.
ಜೋಕುಲೆನ ನಲಿಕೆಲು ಮುಗಿನ ಬೆರಿಕೇ ಮದ್ಯಾನ ನಡತಿನ ಸಭಾ ಕಾರ್ಯಕ್ರಮೊಡು ಬಿನ್ನೆರಾದಿತ್ತಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಪದುಕೆರ್, ನ್ಯಾಯವಾದಿ ದುರ್ಗಾಪ್ರಸಾದ್ ರೈ ಕುಂಬ್ರ ಪಾತೆರ್ದ್, ನಾಗಾರಾಧನೆ, ಯಕ್ಷಾರಾಧನೆ, ಭೂತಾರಾಧನೆಗ್ ತುಳುನಾಡ್ ಪುದರ್ ಪಡೆವೊಂದುಂಡು. ತುಳು ಪರತಿರಿ ಬಾರೀ ಗಂತ್‌ದವು. ಮುಲ್ಪ ಜಾತಿ, ವಿದ್ಯೆ ಅಡ್ಡ ಬರ್ಪುಜ, ಒರಿಯನೊರಿ ಮೋಕೆಡ್ ತೂಪೆರ್. ದುಂಬು ಆಟಿ ಬಾರೀ ಬಂಙೊದ ತಿಂಗೊಲು. ಇತ್ತೆ ಅಪಗದ ಬಂಙೊಲೆನ ನೆಂಪು ಮಾತ್ರೆ ಪಂದ್ ಪಂಡೆರ್. ಅಂಚೆನೇ ತುಳುವ ಪರತಿರಿತ ಪೊಲಬುನು ಜೋಕುಲೆಗ್ ಕೊರ್ದು ಪರತಿರಿತ ಒರಿಪುಗು ಪುನೆಯೊಂದುಪ್ಪು ಶ್ರೀ ರಾಮಕುಂಜೇಶ್ವರ ಆಂಗ್ಲಮಾಧ್ಯಮ ಶಾಲೆದ ಕಜ್ಜೊನು ಪುಗರ್ಯೆರ್.
ಮಿತ್ತರ್ಮೆಡ್ ಬೆಂಗ್ಳೂರ್ ಯೂನಿವರ್ಸಿಟಿದ ಸಿಂಡಿಕೇಟ್ ಪದುಕೆ ಡಾ. ಅನಿಲ್ ಈಶೋ, ದೈವನರ್ತಕೆರ್ ಕಿಟ್ಟು ಕಲ್ಲುಗುಡ್ಡೆ, ಶಿಕ್ಷಕ ರಕ್ಷಕ ಸಂಘೊದ ಗುರ್ಕಾರೆ ಉಮೇಶ್ ಶೆಟ್ಟಿ ಸಾಯಿರಾಮ್, ಶಾಲೆದ ಕಾರ್ಯಂತೆರ್ ಸೇಸಪ್ಪ ರೈಕುಲು ಇತ್ತೆರ್. ಈ ಪೊರ್ತುಡು ಆಗಸ್ಟ್ 6 ಪೋಪುನಾನಿ ಕರಿನ ಸರ್ತಿ ಎಸ್‌ಎಸ್‌ಎಲ್‌ಸಿಡ್ ತುಳು ಬಾಸೆಡ್ 100 ಅಂಕೊ ದೆತ್ತಿನ 222 ಜೋಕುಲೆಗ್ ಕಡೀರ ಸರ್ತಿ ತುಳು ಬಾಸೆ ಕಲ್ಪಾದಿನ ಈ ಶಾಲೆಡ್ ಮಾನಾದಿಗೆ ಮನ್ಪ ಪಂದ್ ಶಾಲೆದ ಕಾರ್ಯಂತೆರ್ ಪಂಡೆರ್.
ಈ ಲೇಸ್‌ಡ್ ಜೋಕುಲೆನ ಅಪ್ಪೆಅಮ್ಮಗ್ ಬೇತೆ ಬೇತೆ ಪಂತೊಲೆನ್ ದೀದಿತ್ತೆರ್. ಪಾಡ್ದನ, ಬೀಜ ಕುಟ್ಟುನ, ಚೆನ್ನೆಮಣೆ, ಗೇನಸಕ್ತಿ ಪಂತ, ಸಬಿ ಸವಾಲ್ ಇಂಚ ಐನ್ ಪಂತೊಲು ಇತ್ತ. ಶಾಲೆದ ಮಲ್ಲಗುರುಕುಲು ಮಾತೆರೆನ್ ಎದುಕೊಂದು, ಮ್ಯಾನೇಜರ್ ರಮೇಶ್ ರೈ ಸೊಲ್ಮೆ ಸಂದೈತೆರ್. ಸರಿತಾ ಬೊಕ್ಕ ಅಕ್ಷತಾ ಲೇಸ್ ಸುದಾರ್ಮೆ ಮಲ್ತೆರ್.
ಈ ಲೇಸ್‌ಗ್ ಬತ್ತಿನಕಲೆಗ್ ಪಾಲೆಕೆತ್ತೆದ ಕಸಾಯದೊಟ್ಟುಗು ನೆಲನೆಲ್ಲಿ ಕಸಾಯ, ಕುಂಟೋಲು ಕಸಾಯ, ಕಡೀರಬೇರ್‌ದ ಕಸಾಯ, ಪುನರ್ಪುಳಿ ಸಾರ್, ನುರ್ಗೆತಪ್ಪುದ ಸಾರ್, ಚೀಮುಳ್ಳು ಸಾರ್, ಲಿಂಬೆಪುಳಿ ಸಾರ್, ಜಾರಿಗೆಪುಳಿ ಸಾರ್, ಮಂತ್‌ಪುಳಿ ಸಾರ್, ನಾಚಿಗೆಮುಲ್ಲುದ ಬೇರ್‌ದ ಕಸಾಯ, ಪುದಿನಾ ತಪ್ಪುದ ಚಟ್ನಿ, ಪೂಂಬೆ ಚಟ್ನಿ, ಸೇರೆದ ಕೊಡಿತ ಚಟ್ನಿ, ತಿಮರೆ ಚಟ್ನಿ, ಕುಡು ಚಟ್ನಿ, ಉಪ್ಪಡ್‌ಪಚ್ಚಿರ್‌ದ ಉಂಡ್ಲುಗ, ಪೆಲಕಾಯಿದ ಉಂಡ್ಲುಗ, ಮರಕೆರೆಂಗ್ ಚಿಪ್ಸ್, ಬಾರೆದಕಾಯಿದ ಉಪ್ಪುಕರಿ, ಮರಕೆರೆಂಗ್ ಉಪ್ಪುಕರಿ, ಪೆಲತ್ತರಿ ಉಪ್ಪುಕರಿ, ಪೆಲಕಾಯಿದ ಮನ್ನಿ, ಮುಂಗೆಬರ್ಪಾದಿನ ಪದೆಂಜಿದ ಕೋಸಂಬರಿ, ಪತ್ರೊಡೆ, ಪೆಲಕಾಯಿ ಗಟ್ಟಿ, ಪೆಲಕಾಯಿದ ಪಾಯಸ, ಮಂಜಲ್ದಿರೆತಡ್ಯೆ, ಮಾಂಬಲ ಗಸಿ, ಕುಕ್ಕುಅಂಬಟೆ ಗಸಿ, ಕುಕ್ಕುದ ರಸಾಯನ, ನನ್ಯೆರಿ, ಪರ್ನ್ದ್‌ದ ರಸಾಯನ, ಹಾಲ್‌ಬಾಯಿ ಮನ್ನಿ, ಆಟಿದ ಪಾಯಸ, ತಜಂಕ್ ಕನಿಲೆ ದೋಸೆ, ಪೇರಡ್ಯೆ ಪಾಯಸ, ಚೇವುದಿರೆತ ವಡೆ, ಚಂಗುಳಿ, ತುಪ್ಪೆರೆಂಗ್ ಗಸಿ, ಸೂನೆಕೆರೆಂಗ್ ಗಸಿ, ಚೇವುದ ಕಂಡೆದ ಗಸಿ, ಚೀಪೆಕೆರೆಂಗ್‌ದ ಉಪ್ಪುಕರಿ, ಪುಂಡಿಕೇನೆಗಸಿ, ಅಡ್ಕರೆಕಾಯಿ ಪಲ್ಯ, ಕಂಚಲ್ ಪಲ್ಯ, ನೀರ್‌ಕುಕ್ಕು ಪಲ್ಯ, ತಜಂಕ್ ಪೆಲತ್ತರಿ ಪಲ್ಯ, ಬಾರೆದಂಡ್‌ದ ಪಲ್ಯ, ಕಂಚಲ್ಅಂಬಟೆ ಪಲ್ಯ, ಮರಮನೊಲಿದ ಪಲ್ಯ, ಸೇರೆಕೆತ್ತೆದ ಗಂಜಿ, ಮೆತ್ತೆದ ಗಂಜಿ, ಪೆಲಕಾಯಿಮಾಂಬಲ ಗಸಿ, ಪುದೆಲ್‌ಕೇನೆ ಗಸಿ, ನೆಲ್ಲಿಂಡಿ ತಂಬುಳಿ, ಪರಂಗಿಲಕಾಯಿದ ಗಸಿ, ಕನಿಲೆ ಪದೆಂಜಿ ಇಂಚ 70 ಬಗೆತ ತುಳುವ ತೆನಸ್‌ದ ಅಟ್ಟನೆ ಆದಿತ್ತ್ಂಡ್.
ಲೇಸ್‌ಡ್ ಇಂಚಿಪ್ಪೊಗು ಜೀ ಕನ್ನಡ ವಾಹಿನಿದ ಛೋಟಾ ಚಾಂಪಿಯನ್ ಗೊಬ್ಬುಡು ಗೆಂದಿನ ಬಾಲೆ ಆತ್ಮಿ ಗೌಡಗ್ ಆರೆನ ಪೆದ್ದಿನಕಲೆನೊಟ್ಟುಗು ಮಾನಾದಿಗೆ ಮಲ್ತೆರ್