Last updated on August 3rd, 2023 at 08:26 pm
ಸೌಜನ್ಯನ ರೇಪ್ ಅಂಡ್ ಮರ್ಡರ್ ಕೇಸ್‌ಡ್ ಮಾತ ಕಡೆತ್ತ ವಾದೊಲೆನ್ ಕೇನಿನ ಕೋರ್ಟ್ ಕಡೆಕ್ಕ್ ಆರೋಪಿ ಆದಿತ್ತಿನ ಸಂತೋಷ್ ರಾವ್‌ನ್ ಸರಿಯಾಯಿನ ಸಾಕ್ಷಿ ಇಜ್ಜಿ ಪಂದ್ ಕುಲಾಸೆ ಮಲ್ದಿನವು ಮಾತೆರೆಗ್ಲಾ ಗೊತ್ತುಂಡು. ಆಂಡ ಜಡ್ಜ್‌ಮೆಂಟ್‌ದ ಓಲೆಡ್ ಎಂಚಿನ ಉಂಡು ಜಡ್ಜ್ ಎಂಚಿನ ಪಂಡೆರ್ ಪಂದ್ ಒಂಜಿ ಒಂಜೇ ತೆರಿಯೊನುಗ. ಸುರುಕ್ಕು ಜಡ್ಜ್ ಸೌಜನ್ಯನ್ ಕೆರ್ತಿನವು ಅಂದ್ ಅಲೆನ ಕೆಕ್ಕಿಲ್ದ ಸುತ್ತ ಬಿಗಿತ್ತ್ ಕೆರ್ತಿನ ಅಚ್ಚಿ ಉಂಡು ಪಂದ್ ಪಂಡೆರ್. ಸೌಜನ್ಯನ ಮಿತ್ತ್ ಅತ್ಯಾಚಾರ ಆತಿನವುಲಾ ಸತ್ಯ, ಗುಪ್ತಾಂಗಡ್ ಮಣ್ಣ್ ಬೊಕ್ಕ ಗಾಯೊಲಾದಿತ್ತ್ಂಡ್ ಪಂದ್ ಜಡ್ಜ್ ತೆರಿಪಾಯೆರ್.
ವೈದ್ಯ ಸಾಲೆದ ಪ್ರಕಾರ ಈ ತೆಟ್ಟ್ ಕೆಲಸ ಒರಿ ಅತ್ತ್ ಮೂಜಿ ನಾಲ್ ಜನರ್ದ್ ಆದಿಪ್ಪು ಪಂದ್ ಉಂಡು. ಪೊಣ್ಣನ ಗುಪ್ತಾಂಗರ್ದ್ ಗೈದಿನ ಸ್ಯಾಂಪಲ್ಸ್ ಸಮ ಅತಿಜಿ ಅವೆಟ್ಟ್ ಇಪ್ಪುನ ಡಿಎನ್‌ಎ ಬೊಕ್ಕ ಆರೋಪಿನ ಡಿಎನ್‌ಎ ಒಂಜೇ ಲೆಕ್ಕ ಉಂಡಾ ಪಂದ್ ತೂವರೆ ನೆರ್ದಾವರ ಆತಿಜಿ ಪಂದ್ ಪಂಡೆರ್. ಆತೆ ಅತ್ತಾಂದೆ ಸಂತೋಷ್ ರಾವ್‌ಗ್ ಇತ್ತಿನ ಸೀಕ್‌ರ್ದ್ ಲೈಂಗಿಕ ಸಂಪರ್ಕ ಮಲ್ತ್ಂಡ ಆಯನ ಗುಪ್ತಾಂಗಡ್ ಗಾಯ ಆಪುಂಡು, ಆಂಡ ಆರೋಪಿನ ಮೆಡಿಕಲ್ ರಿಪೋರ್ಟ್‌ಡ್ ಒವ್ವೆ ಗಾಯ ಆತಿಜಿ ಪಂದ್ ಉಂಡು ಪಂದ್ ಜಡ್ಜ್ ಪಂಡೆರ್.
35 ಸಾಕ್ಷಿಲೆಡ್ ಒಂಜಿಲಾ ಕಣ್ಣಾರೆ ತೂತಿನ ಸಾಕ್ಷಿ ಇಜ್ಜಿ. ಮಲಿಕ್ ಜೈನ, ಉದಯ್ ಜೈನ ಬೊಕ್ಕ ಧೀರಜ್ ಜೈನನ್ ತನಿಖಾಧಿಕಾರಿ ತನಿಖೆ ಮಲ್ದಿನ ಒವ್ವೆ ರೆಕಾರ್ಡ್ಸ್ ಇಜ್ಜಿ ಪಂದ್ ಕೋರ್ಟ್ ಪಂಡ್. ಸೌಜನ್ಯನ ಅಮ್ಮೆರ್ ಮಲಿಕ್ ಜೈನ್, ಉದಯ್ ಜೈನ ಬೊಕ್ಕ ಧೀರಜ್ ಜೈನನ್ ಸಹ ಆರೋಪಿ ಮಲ್ಪೊಡು ಪಂದ್ ಪಾಡಿನ ಸಮನ್ಸ್‌ನ್ ಕ್ರಿಮಿನಲ್ ಪಿಟೀಷನ್ ಪಾರ್ದ್ ಹೈ ಕೋರ್ಟ್‌ಡು ವಜಾ ಮಲ್ತೆರ್ ಪಂದ್ ಜಡ್ಜ್ ಪಂಡೆರ್. 1ರ್ದ್ 28 ಮುಟ್ಟದ ಸಾಕ್ಷಿಲು ಸಂತೋಷ್ ರಾವ್ ಅಪರಾಧಿ ಪಂದ್ ಪನ್ಪುಜಿ, 29ರ್ದ್ 31 ಮುಟ್ಟದ ಸಾಕ್ಷಿಲು ಆಯೆ ಅನುಮಾನಾಸ್ಪದ ರೀತಿಡ್ ತಿರ್ಗೊಂತಿನೆಕ್ಕ್ ಪತ್‌ಕೊರಿಯ ಪಂದ್ ಪನ್ಪುಂಡು ಆಂಡ ಆಯೆನೇ ಮಲ್ದಿನಿ ಪನ್ರೆ ಒವ್ವೆ ಮಲ್ಲ ಸಾಕ್ಷಿ ಇಜ್ಜಿ ಪಂದ್ ಪಂಡೆರ್.
ಸುರುತ್ತ ಮೂಜಿ ನಾಲ್ ದಿನ ತನಿಖಾಧಿಕಾರಿ ಸಮ ತನಿಖೆ ಮಲ್ದಿಜೆರ್. ಪೊಣ್ಣನ ಜೀವರ್ದ್ ಸಮ ಸ್ಯಾಂಪಲ್ಸ್ ದೆತೊನ್ದಿಜೆರ್. ಕೊಡೆ, ಚಪ್ಪಲ್ ಬೊಕ್ಕ ಉಲಯಿದ ಕುಂಟು ಕಲೆಕ್ಟ್ ಮಲ್ದಿಜೆರ್. ಆನಿ ಜೋರು ಬರ್ಸ ಬೈದ್ಂಡಲ ಪುಸ್ತಕ ದಾನೆ ಚಂಡಿ ಆತಿಜಿ ಪಂದ್ ತನಿಖೆ ಮಲ್ದಿಜೆರ್, ಅಲ್ಪನೇ ಇತ್ತಿನ ಪ್ರಕೃತಿ ಚಿಕಿತ್ಸಾಲಯದ ಸಿಸಿ ಕ್ಯಾಮೆರಾ ತೂತಿಜೆರ್ ಪಂದ್ ಜಡ್ಜ್ ಪಂಡೆರ್. ನೆರ್ದಾವರ ಸಂತೋಷ್ ರಾವ್‌ನ್ ಅಪರಾಧಿ ಪಂದ್ ಪನರೆ ಸಾಕ್ಷಿದ ಕೊರತೆ ಇಪ್ಪುನೆರ್ದ್, ಆರೋಪಿನ್ ಈ ಪ್ರಕರಣರ್ದ್ ಕುಲಾಸೆ ಮಲ್ದ ಪಂದ್ ಜಡ್ಜ್ ಪಂಡೆರ್.