Last updated on August 3rd, 2023 at 08:25 pm
ಗಣರಾಜ್ಯೋತ್ಸವ ಪೆರೇಡ್‌ ಡ್ ನೌಕಾಪಡೆತ ತುಕಡಿನ್ ದುಂಬರಿತ್ ತುಳುನಾಡ್‌ಗ್ ಪೆರ್ಮೆ ಕನದಿನ ಲೆಫ್ಟಿನೆಂಟ್ ಕಮಾಂಡರ್ ಕುಡ್ಲಡ ದಿಶಾ ಅಮೃತ್ ಈ ಸಲ ಪ್ಯಾರಿಸ್‌ದ ಬಾಸ್ಟಿಲ್ ಡೇ ಪರೇಡ್‌ಡ್ ಪಾಲ್ ಪಡೆಯರೆ ಉಲ್ಲೆರ್, ತುಳುನಾಡ್‌ಗ್ ನನೊಂಜಿ ಪೆರ್ಮೆ ಕನರೆ ಉಲ್ಲೆರ್.
ಫ್ರಾನ್ಸ್‌ನ ಪ್ಯಾರಿಸ್‌ಡ್ ಜು.14ದಾನಿ ಬಾಸ್ಟಿಲ್ಸ್ ಡೇ ಪರೇಡ್ (ಫ್ರಾನ್ಸ್ ರಾಷ್ಟ್ರೀಯ ದಿನಾಚರಣೆ) ನಡಪುಂಡು. ಈ ಲೇಸ್‌ಡ್ ಪ್ರಧಾನಿ ನರೇಂದ್ರ ಮೋದಿ ಪಾಲ್ ಪಡೆಯರೆ ಉಲ್ಲೆರ್. ಈ ಐತಿಹಾಸಿಕ ಲೇಸ್‌ಡ್ ಭಾರತದ ನೌಕಾ ದಳ, ಭೂ ದಳ, ವಾಯು ದಳ ಗೋಡಿದ್ ಮೂಜಿ ತುಕಡಿಲುಲಾ ಬರ್ಪುಂಡು.
ಜು.14 ದಾನಿ ನಡಪುನ ಬ್ಯಾಸ್ಟಿಲ್‌ ಪರೇಡ್‌ಡ್ ಪಾಲ್ ಪಡೆಯರೆ ಇತ್ತೆ ನೌಕಾಪಡೆತ 4 ಜನ ಅಧಿಕಾರಿಲು ಅಂಚೆವೆ 64 ನಾವಿಕೆರೆ ತಂಡ ಪ್ಯಾರಿಸ್‌ ಎತ್ತ್‌ದೆರ್. ಈ ನಾಲ್ವೆರ್ ಅಧಿಕಾರಿಲೆಡ್ ದಿಶಾ ಅಮೃತ್ ಮೇರ್ಲಾ ಒರ್ತಿ ಆದುಲ್ಲೆರ್. ನೌಕಾ ತುಕಡಿನ್ ಕಮಾಂಡರ್ ವ್ರತ್‌ ಬಘೇಲ್‌ ದುಂಬರಿಪೆರ್, ಲೆ. ಕಮಾಂಡರ್ ದಿಶಾ ಅಮೃತ್ ಅಂಚೆನೆ ಲೆಫ್ಟಿನೆಂಟ್ ಕಮಾಂಡರ್ ರಜತ್‌ ತ್ರಿಪಾಠಿ, ಲೆಫ್ಟಿನೆಂಟ್ ಕಮಾಂಡರ್ ಜಿತಿನ್‌ ಲಲಿತಾ ಧರ್ಮರಾಜ್‌ ಮೊಕುಲು ತುಕಡಿನ್ ಪ್ರತಿನಿಧಿಸಾವೆರ್.
ಫ್ರಾನ್ಸ್‌ದ ರಾಷ್ಟ್ರೀಯ ದಿನಾಚರಣೆ ಮಾತ್ರ ಅತ್ತಂದೆ, ಅವ್ವೇ ದಿನ ಇಂಡೋ-ಫ್ರಾನ್ಸ್ ಕಾರ್ಯತಂತ್ರ ಪಾಲುದಾರಿಕೆದ 25ನೇ ವಾರ್ಷಿಕೋತ್ಸವಲಾ ನಡತೊಂದುಂಡು.
ದಿಶಾ ಮೇರ್ ಕುಡ್ಲದ ಬೋಳೂರು ತಿಲಕ್ ನಗರದ ಅಮೃತ್ ಕುಮಾರ್ ಬೊಕ್ಕ ಲೀಲಾ ಅಮೃತ್ ದಂಪತಿಲೆನ ಮಗಲ್. ಎಲ್ಲಿಡೇ ನೌಕಾಪಡೆ ಅಧಿಕಾರಿಯಾವೊಡು ಪನ್ಪಿ ಕನ ಕಟ್ಟಿನಾರ್ ದಿಶಾ ಅಮೃತ್. ದಿಶಾ ಮೇರ್ ಕುಡ್ಲದ ಕೆನರಾ, ಅಲೋಶಿಯಸ್ ಶಿಕ್ಷಣ ಸಂಸ್ಥೆಡ್ ವಿದ್ಯಾಭ್ಯಾಸ ಮಲ್ತ್, ಬೆಂಗಳೂರುದ ಬಿಎಂಎಸ್ ಶಿಕ್ಷಣ ಸಂಸ್ಥೆಡ್ ಬಿಇ ಕಂಪ್ಯೂಟರ್ ಸೈನ್ಸ್ ಕಲ್ತ್ ಬೊಕ್ಕ ತನ್ನ ಇಚ್ಚೆದಂತೆ ನೌಕಾಪಡೆ ಸೇರಿಯೆರ್. 2016ಟ್ಟ್ ನೌಕಾಪಡೆ ಸೇರಿನ ಮೇರ್ ಇತ್ತೆ ಲೆಫ್ಟಿನೆಂಟ್ ಕಮಾಂಡರ್ ಆದುಲ್ಲೆರ್, ಮೆರೆನ ಕಂಡನೆ ರಾಹುಲ್ ಭಾರತೀಯ ಸೇನೆಡ್ ಜನರಲ್ ಆದುಲ್ಲೆರ್.