Last updated on August 3rd, 2023 at 08:28 pm
ಕುಡ್ಲ, ಒಡಿಪು ಜಿಲ್ಲೆದ ಜವನೆರ್ ಊರು ಬುಡ್ದ್ ದೂರದ ಪರವೂರು ಡೆನ್ಮಾರ್ಕ್‌ಡ್ ಬಂಜಿದ ಪಡಿಕ್ ಪೋದು ಅಲ್ಪ ‘Tuluvas in Denmark’ ಪನ್ಪಿನ ಕೂಪೆ ಕಟ್ಟೊಂದೆರ್. ಈ ಕೂಪೆದ ಜನಕುಲೆನ ಮಿನದನ ಕೋಡೆ ನಡತ್ಂಡ್.
ಮುಲ್ಪದ ಜನಕುಲು ಊರುದ ತಿಂಡಿ ತೆನಸ್‌ಲೆನ್ ಮಲ್ತ್ ಪಟ್ಟೊಂದು ತಿನಿಯೆರ್. ಕೋರಿ ರೊಟ್ಟಿ, ಕೋರಿ ಸುಕ್ಕ, ಕೋರಿ ಘೀ ರೋಸ್ಟ್, ಕೋರಿ ಗಸಿ, ಕೋರಿ ಬಿರಿಯಾನಿ, ಗುಜ್ಜೆ ಬಿರಿಯಾನಿ, ನೀರ್ ದೋಸೆ, ಕಲ್ತಪ್ಪ, ಪಾಯಸ, ಹಿಂಗ ಉದ್ದ, ಗೋಲಿ ಸೋಡಾ ಮಾತಲಾ ಇತ್ತ್ಂಡ್.
ತುಳುನಾಡ್‌ದಕುಲು ಒಂಜಾದ್ ತುಳು, ಕೊಂಕಣಿಡ್ ಪಾತೆರೊಂದು ಒರಿಯರ್ದೊರಿ ಗುರ್ತ ಮಲ್ತೊಂಡೆರ್. ಅಲ್ಪ ಪುಟೇಟು ಬಲತಿನ ಜೋಕುಲೆಗ್ಲಾ ಊರುದ ತೆನಸ್‌ಲೆನ ಪೊಲಬು ಮಲ್ಪಾವೊಂಡೆರ್.
ಡೆನ್ಮಾರ್ಕ್‌ದ ಕೋಂಟು ಕೋಂಟುಡು ಇತ್ತಿನ ತುಳುವೆರೆನ್ ಒಂಜಿ ಮಲ್ಪುನ ಪುನೆಪುನು ವಿಜಯೇಂದ್ರ ಶೆಣೈ ಮೇರ್ ಮಲ್ತೆರ್. ಮೆರೆಗ್ ಒತ್ತಾದ್ ಅಶ್ಮಿತಾ ಲೋಕನಾಥ್ ಮೇರ್‌ಲಾ ಇತ್ತೆರ್. ಡೆನ್ಮಾರ್ಕ್‌ಡ್ ಸುಮಾರ್ 100 ಜನ ತುಳುವೆರ್ ಉಲ್ಲೆರ್. ನಮ್ಮ ಜನಕುಲೆನ್ ಪರವೂರುಡು ಒಂಜಿ ಮಲ್ಪೊಡು, ನಮ್ಮ ಊರುದ ಪರತಿರಿ, ಪರಪೋಕು ತೆರಿಪಾವೊಡು ಪನ್ದ್ ವಿಜಯೇಂದ್ರೆರ್ ಪನ್ಪೆರ್.