ಕಾಪು : ಕಜವು ನಿರ್ವಹಣಾ ಘಟಕದ ಬೆತ್ತಡಿ ಪರಡುನ ಸೀಕ್‌ಲೆನ ಪೋಡಿಗೆ

Last updated on August 3rd, 2023 at 08:28 pm

ಕಾಪು ಪುರಸಭಾ ವ್ಯಾಪ್ತಿಡ್ ಒಟ್ಟು ಪಾಡ್ದಿನ ಪಜ್ಜಿ ಕಜವುದಂಚಿನ ತ್ಯಾಜ್ಯೊಲೆನೊಟ್ಟುಗು ಬರ್ಸದ ನೀರ್ ಸೇರ್ದ್ ಅಲ್ಪ ಬೆತ್ತಡಿ ಪೋಪಿನ ಜನಕ್ಲೆಗ್ ದುರ್ನಾತ ಬತ್ತ್ ಅಂಚಿಂಚಿ ಪೋಪಿನ ಜೋಕುಲೆಗ್, ನರಮಾನಿಲೆಗ್ ಪೋವಂದಿಲೆಕ್ಕ ಆತ್ಂಡ್. ಕಾಪು ಪುರಸಭೆ ವ್ಯಾಪ್ತಿದ ಇಲ್ಲಇಲ್ಲಲೆರ್ದ್ ಕನಪಿನ ಕಜವುಲೆನ್ ರಾಷ್ಟ್ರೀಯ ಪೆರ್ಯಾದಿದ ಬರಿಟ್ ಉಪ್ಪುನ ಘನ ತ್ಯಾಜ್ಯ ನಿರ್ವಹಣಾ ಘಟಕಡ್ ಒಟ್ಟು ಪಾಡುವೆರ್. ಮುಲ್ಪ ಅವೆನ್ ವಿಂಗಡನೆ ಮಲ್ಪುವೆರ್. ಉಂದೆಟ್ ಪಜ್ಜಿ ಕಜವುಲೆನ್ ಗೊಬ್ಬರದ ಲೆಕ್ಕ ಗಲಸರೆ ಅಲ್ಪದಕುಲು ಕೊನೊಂದಿತ್ತೆರ್. ಆಂಡ ಈ ಸಲ ಬರ್ಸೊಗು ಬೊದುಲಿನ ಪಜ್ಜಿ ಕಜವು ಅಲ್ಪನೇ ಕುರಿದ್ ದುರ್ನಾತ ಕುಟ್ಟೊಂದುಂಡು. ಮುಲ್ಪ ಕೈತಲ್‌ಡೇ ಶಾಲೆ, ಕಲ್ಕುಡ ಸಾನ, ಪೆಟ್ರೋಲ್ ಬಂಕ್, ಹೊಟೇಲ್ ಮಾತಲಾ ಉಂಡು. ಒಂತೆ ದೂರೊಡೇ ಪರ ಮಾರಿಗುಡಿ, ಕಾಲೇಜಿಲಾ ಉಂಡು. ಮುಲ್ಪ ಪೂರಾ ಮೂಕು ಮುಚ್ಚೊಂದು ಪೋಪಿಲೆಕ್ಕ ಆತ್ಂಡ್. ಈ ಒಯಿಲ್‌ಗ್ ಸದು ಕೊರಿನ ಶಾಸಕೆ ಗುರ್ಮೆ ಸುರೇಶ್ ಶೆಟ್ಟಿ ಮೇರ್, ಬೇಗೊಡೆ ಉಂದೆಕ್ ಶಾಶ್ವತ ಪರಿಹಾರ ಮಲ್ಪೊಡು ಪನ್ದ್ ಪುರಸಭೆಕ್ ಪನ್ತೆರ್. ಅಂಚೆನೆ ಜನವಸತಿ ಪ್ರದೇಶೊಡು ಉಪ್ಪುನ ಮಾತಾ ತ್ಯಾಜ್ಯೊಲೆನ್ ಆಯಿನಾತ್ ಬೇಗ ಎಲ್ಲೂರುದ ಘಟಕೊಗು ಕೊನೊವರೆ ಸೂಕ್ತ ಕ್ರಮ ದೆತೊನುವ ಪನ್ತೆರ್. ಸದ್ಯೊಗು ಕೆಮಿಕಲ್ ಪಾಡ್‌ದ್ ಒಂತೆ ವಾಸನೆ ಕಮ್ಮಿ ಮಲ್ಪುಲೆಕ್ಕ ಪುನೆಪುಡು ಪುರಸಭೆ ಉಂಡು.