Last updated on August 3rd, 2023 at 08:26 pm
ಬೊಲ್ತೇರ್ ತಾಲೂಕ್‌ದ ವೇಣೂರ್ ಗ್ರಾಮೊದ ಬಾಡಾರ್‌ದಲ್ಪ ಕೊರಗಕಲ್ಲ್ ಪನ್ಪಿನವುಲು ಒರಿ ಕೊರಗಜ್ಜನ ಸಾನೊಗು ಸೂ ಕೊರ್ತಿನೆರ್ದಾವರ ಸಾನದ ಮಿತ್ತ್‌ಪಾಡ್ದಿನ ಚಪ್ಪರ ಪೊತ್ತ್‌ದ್ ಪೋತ್ಂಡ್.
ಈ ಜಾಗೆಡ್ ಸಾರ್ವಜನಿಕೆರ್ ಸಮಿತಿ ಉಂಡುಮಲ್ತ್‌ದ್ ವರ್ಸೊಲಾ ಕೊರಗಜ್ಜನ್ ನಂಬೊಂದು ಆರಾಧನೆ ಮಲ್ತೊಂದಿತ್ತೆರ್. ಅಜ್ಜಗ್ ವರ್ಸೊಲಾ ಕೋಲ ಕೊರೊಂದಿತ್ತೆರ್.
ಆಂಡ, ಕೊರಗಜ್ಜನ ಸಾನ ಇಪ್ಪುನ ಜಾಗೆದ ಬಗ್ಗೆ ಮುಟ್ಟದ ಒರಿ ಆಕ್ಷೇಪ ತೋಜಾದಿತ್ತೆರ್. ಸಾನ ಇಪ್ಪುನ ಜಾಗೆ ಖಾಸಗಿ ಕುಟುಮೊದವು, ಸಾರ್ವಜನಿಕೆರ್ ನಡುಕ್ ತರೆ ಪಾಡ್ರಬಲ್ಲಿ ಪಂದ್ ಪನ್ತೆರ್. ಈ ಇಸಯೊಡು ಈ ಜಾಗೆಡ್ ದುಂಬುರ್ದೇ ಲಡಯಿ ಆವೊಂದಿತ್ತ್ಂಡ್ಂದ್ ಕೇಂದ್ ಬೈದ್ಂಡ್.
ಇತ್ತೆ ಈ ಲಡಯಿ ಜೋರಾದ್ ಆ ಜನ ಬತ್ತ್‌ದ್ ಕೊರಗಜ್ಜನ ಸಾನೊಗು ಸೂ ಕೊರ್ಪುನಡೆ ಮುಟ್ಟ ಎತ್ತ್‌ದ್ಂಡ್.
ಈ ನಡಕೆದ ಬಗ್ಗೆ ಆರಾಧನಾ ಸಮಿತಿ ವೇಣೂರ್ ಪೋಲೀಸ್ ಸ್ಟೇಷನ್‌‌ಡ್ ಒಯಿಲ್ ಕೊರ್ದು, ಆರೋಪಿನ ಮಿತ್ತ್ ಕ್ರಮ ಗೆತೊನೊಡು ಪಂದ್ ಒತ್ತಾಯ ಮಲ್ದೆರ್.