Last updated on August 3rd, 2023 at 08:21 pm
ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಾಚೀನ ಇತಿಹಾಸ ಪನ್ಪಿ ಬೂಕುನು 1924ನೇ ಇಸವಿಡ್ ಬರೆತಿನ ಗಣಪತಿ ರಾವ್ ಐಗಳ್ ಮೇರ್ ತನ್ನ ಮಂಜೇಶ್ವರ ಸ್ಥಳಪುರಾಣ ಪನ್ಪಿನ ಕೃತಿಟ್ ಈ ಬೊಲ್ಲದ ಬಗೆಟ್ ತೆರಿಪಾದೆರ್. ಅವೆಟ್ ಬರೆಯೊಂದು ಆರ್ ಪನ್ಪೆರ್, ಮಂಜೇಶ್ವರದ ಅನಂತೇಶ್ವರ ದೇವಲ್ಯೊಗು ಕೆಳದಿ ಅರಸೆರ್, ಬಂಗರಸೆರ್, ಕುಂಬಳೆ ಬೊಕ್ಕ ವಿಟ್ಲದ ಅರಸೆರ್ ಉಂಬಳಿ ಕೊರ್ತಿನ ಶಾಸನ, ಬಂಟ್ವಾಳ, ಪಾಣೇರ್, ಕುಡ್ಲ, ಮುಲ್ಕೆ, ಮಂಜೇಶ್ವರ, ಕಲ್ಲಿಕೋಟೆದ ಪೇಂಟೆದ ಗೌಡಸಾರಸ್ವತ ಬೆರನೆರ್ ಬರೆದ್ ಕೊರ್ತಿನ ಪಟ್ಟೆದ ನಕಲ್ ನನಲಾತ್ ಅಮೂಲ್ಯ ಮಾಯಿತಿಲು ಇತ್ತಿನ ಕಡ್ತಾವುಲು ಅಗೋಸ್ಟುದ 7 ತಾರೀಕ್ ಗ್ ಬತ್ತಿನ ಭಯಂಕರ ಬೊಲ್ಲ ಬಂಟ್ವಾಳದ ಊರುರ್ದ್ ಊರುಗೇ ನೆಲಸಮ ಮಲ್ಪುನಗ ಎನ್ನ ಬಂಟ್ವಾಳದ ಇಲ್ಲಡಿತ್ತಿನ ಬೂಕು, ದಾಖಲೆಲುಲಾ ಜಲಸಮಾಧಿ ಆಂಡ್ ಪನ್ದ್.
ಉಂದೇ ಪೊರ್ತುಡು ಗಣೇಶಪುರಿತ ಸದ್ಗುರು ನಿತ್ಯಾನಂದ ಸ್ವಾಮಿಲುಲಾ ಬಂಟ್ವಾಳೊಗು ಬೈದಿತ್ತೆರ್ಗೆ. ಆನಿ ಬೈದಿನ ಬೊಲ್ಲದ ಗುರ್ತೊಲು ಇತ್ತೆಲಾ ಆ ಪರ ಕಟ್ವಾನೊಲೆಡ್ ದೀತೆರ್. ಪಾಣೇರ್ ಪೇಂಟೆದ ಮೂಜಿಮಾರ್ಗ ಕೈತಲ್ದ ಪರ ಹೋಟೇಲ್ದ ಕೈತಲ್ ಉಪ್ಪುನ ಕಟ್ವಾಣೊಡು ” ತಾ 7.8.1923 ಕುಜವಾರ ಇ ಕಲ್ಲಿನ ತನಕ ನೆರೆ ಬಂದಿದೆ’ ಪನ್ದ್ ಬರೆತೆರ್. ಆಗಸ್ಟ್ 7ಕ್ಕ್ ಈ ಬೊಲ್ಲೊಗು 100 ವರ್ಸ ಆಪಿನೆರ್ದಾವರ ಅವೆನ್ ನೆಂಪು ಮಲ್ತೊನರೆ ಲೇಸ್ ಮಲ್ಪುನ ಅಟ್ಟನೆಡ್ ಅಲ್ಪದಕುಲು ಉಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
1923ತ್ತ ದುಂಬು ಬಂಟ್ವಾಳ ಒಂಜಿ ಮಲ್ಲ ಬೇರದ ಪೇಂಟೆ ಆದಿತ್ತ್ಂಡ್. ಆಂಡ ಬೊಲ್ಲ ಮಾತಾ ನಾಶ ಮಲ್ತಿನೇ ಜನ ಬಂಟ್ವಾಳ ಬುಡ್ದ್ ಎತ್ತರದ ಜಾಗೊಗು ಪೋಯೆರ್ ಅಂಚಾದ್ ಬಂಟ್ವಾಳ ಇತಿಹಾಸೊಡು ಇತ್ತಿನ ಮಹತ್ವೊನು ಮೆಲ್ಲನೇ ಕಳೆಯೊಂದು ಬತ್ತ್ಂಡ್. 1923 ತ್ತ ಬೊಲ್ಲೊಡು ಬಂಟ್ವಾಳೊಡಿತ್ತಿನ 3500 ಮುಡಿ ಅರಿ ನೀರ್ ಪಾಲ್ ಆದಿತ್ತ್ಂಡ್. ಈ ಬೊಲ್ಲೊರ್ದು ಬೊಕ್ಕ ಬಂಟ್ವಾಳದ ಸರಕಾರಿ ಕಛೇರಿಲು ಪೂರಾ ಬಿ.ಸಿ ರೋಡ್ ಗ್ ಶಿಫ್ಟ್ ಆಂಡ್.
ಈ ಬೊಲ್ಲ ತುಳುನಾಡ್ ದ ಇತಿಹಾಸೊಡ್ ದಾಖಲಾತಿನ ಮಲ್ಲ ಬೊಲ್ಲ ಪನ್ಪಿ ಪುಗಾರ್ತೆ ಪಡೆಯೊಂದುಂಡು. ಬಂಟ್ವಾಳ, ಪಾಣೇರ್, ಉಬಾರ್ದ ಸಾರ ಸಾರ ಇಲ್ಲುಲು ನೆಲಸಮ ಆದಿತ್ತ. ಈ ಬೊಲ್ಲೊರ್ದಾತ್ರ ತಾಲೂಕು ಕೇಂದ್ರ ಆದಿತ್ತಿನ ಉಬಾರ್ ನ್ ಹೋಬಳಿ ಮಲ್ತ್ ತಾಲೂಕುನು ಅಲ್ಪೊರ್ದು ಬೇತೆ ಕಡೆಕ್ ಕೊನೊಯೆರ್.