Last updated on August 3rd, 2023 at 08:21 pm
ಕುಡ್ಲ: 12 ವರ್ಸ 10 ತಿಂಗೊಲು ಪ್ರಾಯೊದ ಪೊಣ್ಣು ಬಾಲೆನ್ ಅತ್ಯಾಚಾರ ಮಲ್ದಿನ ಆರೋಪಿ ಶಾಫಿನ್ ಕುಡ್ಲದ ಮಹಿಳಾ ಪೊಲೀಸ್ ಸ್ಟೇಶನ್ ಪೊಲೀಸೆರ್ ಕೈದ್‌ಮಲ್ತ್‌ದ್ ಕರ್ಪಿಲ್ಲ್‌ಗ್ ಗೆಡತ್‌ದೆರ್.
ಈ ಪೊಣ್ಣು ಜುಲೈ 15 ತಾನಿ ತನ್ನ ಅಪ್ಪೆನೊಪ್ಪ ಕುಡ್ಲ ಮಹಿಳಾ ಪೊಲೀಸ್ ಸ್ಟೇಶನ್‌ಗ್ ಬತ್ತ್‌ದ್ ಈ ಬಗ್ಗೆ ಒಯಿಲ್ ಕೊರ್ದಿತ್ತೆರ್. ಪೋಣ್ಣು ಎಣ್ಮನೇ ಕ್ಲಾಸ್‌ಡ್ ಕಲ್ತೊಂದುಲ್ಲಲ್. ಮೋಲೆಗ್ ಉಳ್ಳಾಲ ಪೇಂಟೆದ ಮಹಮ್ಮದ್ ಶಾಫಿ ಯಾನೆ ಶಾಫಿ ಪನ್ಪಿನಾಯನ ಗುರ್ತ ಇತ್ತ್‌ದ್ ಸಾದಿಡ್ ತಿಕ್ಕ್ಂಡ ಪಾತೆರೊಂದಿಪ್ಪೆದೆ.
ಉ್ಂಬ್ಯೆ 2023ತ ಜನವರಿ ತಿಂಗೊಲುಡು ಈ ಎಲ್ಯ ಪ್ರಾಯೊದ ಪೊಣ್ಣು ಇಲ್ಲಡ್ ಒರ್ತಿಯೇ ಇಪ್ಪುನ ಪೊರ್ತು ತೂದು ಪೊಣ್ಣನ ಬಾಯಿಗ್ ಕೈ ಪತ್ತ್‌ದ್ ಬರಿತ ಅದೆಕ್ ಒಯ್ತೊಂದು ಪೋದು ಅಲೆನ ಮಿತ್ತ್ ಅತ್ಯಾಚಾರ ಮಲ್ತ್‌ದೆ. ಅತ್ತಂದೇ ಆಲ್ ಇಲ್ಲಡೊರ್ತೇ ಇಪ್ಪುನ ತೆರಿನಗ ಮಾತ ಇಲ್ಲಗ್ ಪೋದು ಅತ್ಯಾಚಾರ ಮಲ್ತೊಂದಿತ್ತೆ. ಉ್ಂದೆರ್ದಾವರ ಈ ಪೊಣ್ಣು ಆಜಿ ತಿಂಗೊಲ್ದ ಬಂಜಿನಾಲಾತಲ್.
ಪೊಣ್ಣು ಕೊರ್ತಿನ ಒಯಿಲ್‌ದ ಪ್ರಕಾರ ಕುಡ್ಲ ಮಹಿಳಾ ಪೊಲೀಸ್ ಸ್ಟೇಶನ್‌ಡ್ ಪೋಕ್ಸೋ ಕಾಯ್ದೆದಡಿಟ್ ಪ್ರಕರಣ ದಾಕಲಾತ್ಂಡ್. ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಆರೋಪಿನ್ ಕೋಡೆ ಕಾಂಡೆ ಕೈದ್ ಮಲ್ತ್‌ದ್ ನ್ಯಾಯಂತಡೆಗ್ ಹಾಜಿರ್ ಮನ್ಪಾದೆರ್.