Last updated on August 3rd, 2023 at 08:26 pm
ಕೇಂದ್ರ ಸರಕಾರ ಕನದಿನ ಪೊಸ ಶಿಕ್ಷಣ ನೀತಿನ್ ಕರ್ನಾಟಕ ರಾಜ್ಯ ಸರಕಾರ ಕೈ ಬುಡ್ತ್ಂಡ್. NEP ನ್ ಕೈಬುಡ್ತಿನೆನ್ ಸಿದ್ದರಾಮಯ್ಯೆರ್ ಬಜೆಟ್ ಮಂಡನೆ ಮಲ್ಪುನ ಪೊರ್ತುಡು ತೆರಿಪಾಯೆರ್. ಆತೆ ಅತ್ತಾಂದೆ 10ನೇ ಮುಟದ ಜೋಕುಲೆಗ್ ವಾರಡ್ ರಡ್ಡ್ ದಿನ ತೆತ್ತಿ ಕೊರ್ಪ ಪಂದ್ ಘೋಷಣೆ ಮಲ್ತೆರ್.
ಬೇತೆ ಬೇತೆ ಸಂಸ್ಕೃತಿ, ಬಾಸೆ ಇಪ್ಪುನ ನಮ್ಮ ದೇಸೊಡು ಒಂಜೇ ಬಾಸೆ ಬೊಕ್ಕ ಒಂಜೇ ಲೆಕಂತಿನ ಶಿಕ್ಷಣನ್ ಇಡೀ ದೇಸೊಗು ಕೊರ್ರೆ ಆಪುಜಿ ಪಂದ್ ಸಿಎಂ ಪಂಡೆರ್.
ಕರ್ನಾಟಕ ಸರಕಾರದ ಈಯೋಡುದ ಬಜೆಟ್‌ಡ್, ಕರಿನ ಸಲ ಬಿಜೆಪಿ ಸರಕಾರ ಕನತಿತ್ತಿನ ಜಿಲ್ಲೆಗೊಂಜಿ ಗೋಶಾಲೆ ಯೋಜನೆನ್ ಕೈಬುಡಿಯೆರ್. ಪೊಸ ಬಜೆಟ್ ಮಂಡನೆ ಮಲ್ಪುನ ಪೊರ್ತುಡು ಸಿಎಂ ಸಿದ್ದರಾಮಯ್ಯೆರ್ ಜಿಲ್ಲೆಗೊಂಜಿ ಗೋಶಾಲೆ ಯೋಜನೆನ್ ಕೈ ಬುಡೊಂದುಲ್ಲ ಪಂದ್ ತೆರಿಪಾಯೆರ್.