ಶಕ್ತಿ ಯೋಜನೆಗ್ ಒಂಜಿ ತಿಂಗೊಲು: ಸರಕಾರ ಇಲಾಖೆಲೆಗ್ ಏತ್ ಕಾಸ್ ಕೊರೊಡು? ಪ್ರಯಾಣ ಮಲ್ದಿನ ಪೊಂಜೊವುನಕುಲೇತ್?

Last updated on August 3rd, 2023 at 08:26 pm

ರಾಜ್ಯೊಡು ಪೊಸ ಸರ್ಕಾರ ಬತ್ತಿನೇ ಕಡೀರ್ದ ಗ್ಯಾರಂಟಿ ಯೋಜನೆ ಶಕ್ತಿ ಯೋಜನೆ ಜಾರಿಯಾದ್ ಒಂಜಿ ತಿಂಗೊಲು ಆಂಡ್.

ಶಕ್ತಿ ಯೋಜನೆ ಜಾರಿಗ್ ಬತ್ತಿ ಬೊಕ್ಕ ಪೊಂಜೊವುನಕ್ಲೆನ ತಿರ್ಗಟ ಎಚ್ಚ ಆತ್ಂಡ್ ಪಂಡ ದಾಲ ತಪ್ಪಾವಂದ್. ಧಾರ್ಮಿಕ ಕ್ಷೇತ್ರೊಲೆನ ಪರಕೆ ಡಬ್ಬಿಲು ದಿಂಜೊಂದುಲ್ಲ, ಅಂಚೆನೇ ಪ್ರವಾಸಿ ಕ್ಷೇತ್ರೊಲೆನ ಆದಾಯೊಲಾ ಎಚ್ಚ ಆತ್ಂಡ್. ಆಂಡ ಈ ಯೋಜನೆರ್ದಾವರ ಸಾರಿಗೆ ಇಲಾಖೆಗ್ ಆತಿನ ನಷ್ಟ ಏತ್? ಸರ್ಕಾರೊದ ಕೊಪ್ಪರಿಗೆರ್ದ್ ಖಾಲಿ ಆತಿನ ಕಾಸ್ ಏತ್ ಪನ್ಪಿನ ಒಲವು ಮುಲ್ಪ ಉಂಡು.

ಕರಿನ ಒಂಜಿ ತಿಂಗೊಲುಡು ಕೆಎಸ್ಆರ್‌ಟಿಸಿ ಬಸ್ಸ್‌ಡ್ 52.52 % , ಬಿಎಂಟಿಸಿಡ್ 48.16 % , ವಾಯುವ್ಯ ಕರ್ನಾಟಕ ಸಾರಿಗೆಡ್ 55.52 % ಬೊಕ್ಕ ಕಲ್ಯಾಣ ಸಾರಿಗೆಡ್ 46.75 % ಪೊಂಜೊವುಲು ಪ್ರಯಾಣ ಮಲ್ದೆರ್. ಪೊಂಜೊವುಲೆ ಬಸ್ ಪ್ರಯಾಣೊರ್ದಾವರ ಸರ್ಕಾರ ಕೆಎಸ್ಆರ್‌ಟಿಸಿಗ್ 151.25 ಕೋಟಿ, ಬಿಎಂಟಿಸಿಗ್ 69.56 ಕೋಟಿ , ವಾಯುವ್ಯ ಕರ್ನಾಟಕ ಸಾರಿಗೆಗ್ 103.51 ಕೋಟಿ ಅಂಚೆನೇ ಕಲ್ಯಾಣ ಸಾರಿಗೆಗ್ 77.62 ಕೋಟಿ ರೂಪಾಯಿ ಕಟ್ಟೆರೆ ಉಂಡು.

ಕರಿನ ಒಂಜಿ ತಿಂಗೊಲುಡು ಒಟ್ಟು 16.73 ಕೋಟಿ ಟಿಕೆಟ್‌ಲು ಶಕ್ತಿ ಯೋಜನೆದ ಅಡಿಟ್ ಆತ, ಅವೆನೇ 16.73 ಕೋಟಿ ಪೊಂಜೊವುಲು ಪ್ರಯಾಣ ಮಲ್ದೆರ್ಂದ್ ಪನೊಲಿ. ಅಂಚಾದ್ ಸಾರಿಗೆ ಇಲಾಖೆಗ್ 401.94 ಕೋಟಿ ರೂಪಾಯಿ ನಷ್ಟ ಆತ್ಂಡ್. ಸರಕಾರೊನೇ ಇಲಾಖೆಲೆಗ್ ಕಾಸ್ ಕೊರ್ಪುನೆರ್ದಾವರ ಈ ನಷ್ಟೊನು ಇಲಾಖೆಗ್ ನಷ್ಟ ಪಂದ್ ಪನರೆ ಆಪುಜಿ.