Last updated on August 3rd, 2023 at 08:23 pm
ಮಣಿಪುರೊತ ಕಾಂಗ್‌ಪೊಕ್ಪಿ ಜಿಲ್ಲೆಡ್ ಮೇ 4ತಾನಿ ನಡತಿನ ಹಿಂಸಾಚಾರೊದ ಪೊರ್ತುಡು ರಡ್ಡ್ ಜನ ಪೊಂಜೊವುಲೆನ್ ಉರ್ಬುಲಿ ಮಲ್ತ್‌ದ್ ಮೆರವಣಿಗೆ ಮಲ್ದಿನ ವಿಡಿಯೋ ಒಂಜಿ ಕೋಡೆ, ಬುದಾರದಾನಿ ಸಾಮಾಜಿಕ ಮಾಧ್ಯಮೊಲೆಡ್ ಶೇರ್ ಆವರೆ ಪತ್ತ್‌ದ್ಂಡ್. ಅಂಚಾದ್ ರಾಜ್ಯೊಡು ಹಿಂಸಾಚಾರ ಪಿರ ಗುಮೆಲ್ದ್ಂಡ್.
‘ದೇಶೀಯ ಬುಡಕಟ್ಟ್ ನಾಯಕೆರೆ ಮಿತ್ತರ್ಮೆ’ (ಐಟಿಎಲ್‌ಎಫ್) ಗುರುವಾರ ಅಟ್ಟನೆ ಮಲ್ದಿತ್ತಿನ ಪ್ರತಿಭಟನಾ ಮೆರವಣಿಗೆದ ದುಂಬುನಾನಿಯೇ ಈ ವಿಡಿಯೋ ಪಿದಯಿಬೈದ್ಂಡ್. ರಡ್ಡ್ ಜನ ಪೊಂಜೊವುಲೆನ್ ಕಂಡೊಡೆ ಲೆತೊಂದುಪೋವೊಂದಿತ್ತಿನ ಕೂಟ ಅಕಲೆಗ್ ಚಿತ್ರಹಿಂಸೆ ಕೊರ್ಪುನೆನ್ ವೀಡಿಯೋಡ್ ತೂವೊಲಿ. ಪೊಂಜೊವುಲು ಸಕಾಯೊಗು ಬೋಡಾದ್ ಬುಲ್ಪುನವುಲಾ ವೀಡಿಯೋಡು ದಾಕಲಾತ್ಂಡ್.
ಈ ನಡಕೆ ನಡತಿನೆನ್ ಒತ್ತೊಂದಿನ ಪೋಲೀಸೆರ್ ಕೋಡೆ ಬಯ್ಯಡ್, ದುಷ್ಕರ್ಮಿಲೆನ್ ಕೈದ್ ಮನ್ಪೆರೆ ಮಾತ ರೀತಿದ ಪುನೆಪು ಬರೊಂದುಲ್ಲ ಪಂದ್ ಪನ್ತೆರ್. ಈ ಪಿಸ್ವಾಸಿ ಕೃತ್ಯೊಡು ಪಾಲ್‌ಗೆತೊಂದಿನಕಲೆನ ವಿರುದ್ಧ ಫೆಬಲ್‌ ಜಿಲ್ಲೆದ ನಾಂಗ್‌ಪೋಕ್ ಸೆನ್ನೈ ಪೊಲೀಸ್ ಸ್ಟೇಶನ್‌ಡ್ ಅಪಹರಣ, ಸಾಮೂಹಿಕ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣ ದಾಕಲ್ ಮಲ್ದ ಪಂದ್ ತೆರಿಪಾದೆರ್.
‘ಸಂತ್ರಸ್ತೆದಿ ಪೊಣ್ಣುಲು ಕುಕಿ-ಜೋ ಬುಡಕಟ್ಟ್‌ಗ್ ಸೇರ್ದಿನಕುಲು. ರಡ್ಡ್ ಜನತ ಮಿತ್ತೊ‌ಲಾ ಸಾಮೂಹಿಕ ಅತ್ಯಾಚಾರ ಆತ್ಂಡ್. ಏರ್ ಪಂದ್ ಗೊತ್ತಾಪಿನಂಚ, ಮೋನೆ ತೋಜುನಂಚಿನ ವೀಡಿಯೋನ್ ದುಷ್ಕರ್ಮಿಲು ಸಾಮಾಜಿಕ ಮಾಧ್ಯಮೊಲೆಡ್ ಬುಡುಗಡೆ ಮಲ್ತ್‌ದ್, ಪೊಂಜೊವುಲೆನ್ ತರೆದೆರ್ತ್ ನಡಪೆರಾವಂದಿಲೆಕ ಮಲ್ದೆರ್’ ಪಂದ್ ಐಟಿಎಲ್‌ಎಫ್ ಸಂಘ ತೆರಿಪಾದ್ಂಡ್.
ಈ ನಡಕೆದ ಬಗ್ಗೆ ಇತ್ತೆಗಿತ್ತೆನೇ ಸಮ ಜಡ್ತೆ ಆವೊಡೂಂದು ಸುಪ್ರೀಂ ಕೋರ್ಟ್ ಸರ್ಕಾರೊಗು ಆದೇಶ ಕೊರ್ತುಂಡು. ಪ್ರಧಾನಿ ಮೋದಿಯೆರ್‌ಲಾ ಈ ಕೃತ್ಯೊಗು ಕೈಪಾಡಿನಕಲೆನ್ ಬುಡ್ಪುಜ ಪಂದ್ ಪನ್ತೆರ್.