Last updated on August 14th, 2023 at 10:19 pm
ಸುಳ್ಯದ ನೆಹರೂ ಸ್ಮಾರಕ ಪದವಿ ಪೂರ್ವ ಕಾಲೇಜ್‌ದ ಜೋಕುಲು ತುಳು ಸಂಸ್ಕೃತಿ ಬೊಕ್ಕ ಸಂಪ್ರದಾಯೊನಿ ದೆರ್ತ್ ಪತ್ತುಲೆಕ್ಕ ಇನಿ ಆಟಿದ ಕೂಟ ಮಲ್ತೆರ್. ಕೆವಿಜಿ ಮೆಡಿಕಲ್ ಕಾಲೇಜಿದ ಆಡಳಿತಾತ್ಮಕ ಅಧಿಕಾರಿಯಾಯಿನ ಜಗದೀಶ್ ಅಡ್ತಲೆ ಮೇರ್ ಮಲ್ಲ ಬಿನ್ನೆರಾದಿತ್ತೆರ್. ಚೆನ್ನೆಮನೆ ಗೊಬ್ಬುದು ಲೇಸ್‌ದ ಉದಿಪನ ಆಂಡ್.
ಕಾಲೇಜ್‌ದ ಜೋಕುಲೆನ ಬೇತೆ ಬೇತೆ ಕೂಪೆಲೆದ ನಡುಟು ಪಂತ ನಡತ್ಂಡ್. ತುಳುನಾಡ್‌ದ ಪರಪೋಕುದ, ದುಂಬುದ ಕಾಲೊಡು ಗಲಸೊಂದಿತ್ತಿನ ಸೊತ್ತುಲೆನ್ ಜೋಕುಲು ಕನತ್ ವಸ್ತು ಪ್ರದರ್ಶೊನೊಗು ದೀದಿತ್ತೆರ್. ಬಗೆಬಗೆತ ತೆನಸ್‌ಲೆನ್ ಮಲ್ತ್ ತಿನ್ಪಿನಕಲೆಗ್ ಬಂಜಿ ದಿಂಜುನಲೆಕ್ಕ ಆಟಿದ ಗಮ್ಮತ್ ತಿನರೆಲಾ ಇತ್ತ್ಂಡ್.
ಈ ಪೊರ್ತುಡು ಕಾಲೇಜ್‌ದ ಪ್ರಾಂಶುಪಾಲೆರಾಯಿನ ಹರಿಣಿ ಪುತ್ತೂರಾಯ, ಜೋಕುಲೆನ ಕ್ಷೇಮಾಧಿಕಾರಿ ರೇಷ್ಮಾ, ಹರೀಶ್ ಸಿ ಬೊಕ್ಕ ಉಪನ್ಯಾಸಕ ವೃಂದದಕುಲು ಮಿತ್ತ ಚಾವಡಿಡ್ ಇತ್ತೆರ್. ಬತ್ತಿನ ಬಿನ್ನೆರ್ ಮಾತೆರ್ಲಾ ವಸ್ತು ಪ್ರದರ್ಶನ, ಜೋಕುಲೆನ ಪದ, ನಲಿಕೆ ತೂದು ಮೆಚ್ಚೊಂಡೆರ್. ಶಾಲೆ ಕಾಲೇಜಿಡ್ ಇತೋರ್ತು ಮದೆಟ್ ಇತ್ತಿನ ತುಳುತ ಕಮ್ಮೆನ ಇತ್ತೆದ ಕಾಲೊಡು ಜೋಕುಲೆನ ಉಮೇದ್‌ಡ್ ಒಂತೊಂತೆನೇ ಪಿದಯಿ ಬರ್ಪಿನವು ಬಾರೀ ಪೆರ್ಮೆದ ಇಸಯೊ. ನನಲಾತ್ ಕಾಲೇಜ್‌ಲೆಗ್ ಇಂಚಿನ ಲೇಸ್ ಮಸ್ತ್ ಜೋಕುಲೆಗ್ ನಮ್ಮ ಪರಪೋಕು ತೆರಿಪಾವರೆ ಉಂದು ಉದಾರ್ಮೆ ಆದ್ ಉಪ್ಪಡ್.
