Last updated on August 18th, 2023 at 03:29 pm
ತುಳುನಾಡ್‌ಡ್ ಕಾಲಿ ಇತ್ತಿನ KSRTC ಡ್ರೈವರ್ ಬೇಲೆಲು ಮುಲ್ಪದಕುಲೆಗೇ ತಿಕ್ಕೊಡು ಪನ್ಪಿ ಈಡ್ ದೀದ್ ಶಾಸಕೆ ಅಶೋಕ್ ರೈಕುಲು ಉಮೇದ್ ಇತ್ತಿನಕಲೆಗ್ ಈ ಬೇಲೆದ ಟ್ರೈನಿಂಗ್‌ಗ್ ಅಟ್ಟನೆ ಮಲ್ದಿತ್ತೆರ್. ಇತ್ತೆ ಈ ಟ್ರೈನಿಂಗ್ ಗೆತೊಂದಿನಕ್ಲೆಟ್ ತುಳುನಾಡ್‌ದ 46 ಜನಕ್ ಬೇಲೆ ತಿಕ್ಕ್‌ದ್ ಶಾಸಕೆರೆನ ಈ ಪುನೆಪುನು ಫಲ ತಿಕ್ಕ್‌ದ್ಂಡ್.
KSRTC ಪುತ್ತೂರು ವಿಭಾಗ ಅಂಚೆನೇ ತುಳುನಾಡ ಬೇತೆ ಬೇತೆ ವಿಭಾಗಲೆಡ್ ಡ್ರೈವರ್ ಬೇಲೆ ಕಾಲಿ ಇತ್ತಿನೆನ್ ತೆರಿನ ಶಾಸಕೆರ್, ಈ ಬೇಲೆಲು ಮುಲ್ಪದಕ್ಲೆಗೇ ತಿಕ್ಕೊಡು ಪಂದ್ ಡ್ರೈವರ್ ಬೇಲೆಗ್ ಸೇರುನ ಉಮೇದ್ ಇತ್ತಿನಕಲೆನ ಅರ್ಜೀಗ್ ಲೆಪ್ಪು ಕೊರ್ದಿತ್ತೆರ್. ಬತ್ತಿನ ಸುಮಾರ್ 70 ಅರ್ಜಿಲೆಡ್ ಟ್ರೈನಿಂಗ್ ಗೆತೊಂದಿನ 55 ಜನ ಕಡೀರ ಪರೀಕ್ಷೆಡ್ ಪಾಸ್ ಆತೆರ್. ಈ 55ಟ್ ಸುರೂತ ಬ್ಯಾಚ್‌ಡ್ 46 ಜನಕ್ ಬೇಲೆ ತಿಕ್ಕ್‌ದ್ಂಡ್. ಅಶೋಕ್ ರೈಕುಲು ಡ್ರೈವರ್ ಬೇಲೆದ ಉಮೇದ್ ಇತ್ತಿನಕಲೆನ್ ಮಾತೆರೆನ್ಲಾ ತನ್ನ ರೈ ಚಾರಿಟೇಬಲ್ ಟ್ರಸ್ಟ್‌ದ ಮುಕೇನ ಸ್ವಂತ ಕರ್ಚಿಡೇ ಹಾಸನಗ್ ಲೆತೊಂದು ಪೋದು, ಟ್ರೈನಿಂಗ್ ಕೊರ್ಪಾದಿತ್ತೆರ್.
ಸರ್ಕಾರಿ ಬೇಲೆಲೆಗ್ ನಮ್ಮಕುಲು ಅರ್ಜಿ ಪಾಡುನ ಬಾರೀ ಕಮ್ಮಿ. ನಮ್ಮಕುಲೆಗ್ಲಾ ಸರ್ಕಾರಿ ಬೇಲೆ ತಿಕ್ಕೊಡು ಪನ್ಪಿ ಒಂಜೇ ಒಂಜಿ ಉದ್ದೇಸೊಡು ಶಾಸಕನ ನಿಲೆಟ್ ಪುನೆಪು ಬೈದಿತ್ತೆ. ಇತ್ತೆ 46 ಜನಕ್ ಬೇಲೆ ತಿಕ್ಕ್‌ದಿನ ಎಂಕ್ ಬಾರಿ ಕುಸಿಯಾತ್ಂಡ್ ಪಂದ್ ಶಾಸಕೆ ಅಶೋಕ್ ರೈಕುಲು ಪಂಡೆರ್.