Last updated on August 7th, 2023 at 06:47 pm
ವಿಮಾನ ಪ್ರಯಾಣೊಡು ಪೊರ್ತು ಬಾರಿ ಮುಖ್ಯ. ಒಂಜಿ ಐನ್ ನಿಮಿಷ ಕಡೆಸ್ಸ್ಂಡಲಾ ವಿಮಾನ ಅಕಲೆನ್ ಬುಡ್ದು ಟೇಕ್ ಆಫ್ ಆತಿನ ಅವೇತೋ ಉದಾರ್ಮೆಲುಲ್ಲ. ಇಂಚಿಪ್ಪೊಗು ಕರ್ನಾಟಕೊದ ರಾಜ್ಯಪಾಲೆರೆನೇ ಬುಡ್ದು ವಿಮಾನ ರಾದಿತ್ತ್ಂಡ್. ಆಂಡ ಇತ್ತೆ ಇಂಡಿಗೋ ವಿಮಾನ 12 ನಿಮಿಷ ದುಂಬೇ ಟೇಕ್ ಆಫ್ ಆಯಿನೆರ್ದಾನರ 6 ಪ್ರಯಾಣಿಕೆರ್ ಬೆಂಗ್ಳೂರ್ ವಿಮಾನ ಉಂತಡೆಡೇ ಬಾಕಿಯಾವೊಡಾಂಡ್. ಆತೇ ಅತ್ತಂದೆ ಈ ಪ್ರಯಾಣಿಕೆರ್ ಸುಮಾರ್ 6 ಗಂಟೆ ಕಾತ್‌ದ್ ತನ್ಕುಲೆ ಪ್ರಯಾಣೊನು ದುಂಬರಿತಿನ ನಡಕೆ ನಡತ್‌ದ್ಂಡ್.
ಬೆಂಗ್ಳೂರ್‌ರ್ದ್ ಕುಡ್ಲಗ್ ಪಿದಡ್ದಿತ್ತಿನ ಇಂಡಿಗೋ 6E 6162 ವಿಮಾನ ಮಧ್ಯಾಹ್ನ 2.55 ನಿಮಿಷೊಗು ಬೆಂಗ್ಳೂರ್ ಕೆಂಪೇಗೌಡ ವಿಮಾನ ಉಂತಡೆರರ್ದ್ ಟೇಕ್ ಆಫ್ ಆವೊಡಿತ್ತ್ಂಡ್. ಆಂಡ ಇಂಡಿಗೋ ಏರ್‌ಲೈನ್ಸ್ ಈ ಪೊರ್ತುನು ಕಡೇ ಗಲಿಗೆಡ್ ಪಗತ್‌ದೆರ್ 2.55ತ ಪಗತೆಗ್ 2.42ಕ್ ವಿಮಾನ ಟೇಕ್ ಆಫ್ ಆತ್ಂಡ್. ಕೆಲ ಪ್ರಯಾಣಿಕೆರ್ ವಿಮಾನ ಟೇಕ್ ಆಫ್ ಆಯೆರೆ ನನಲಾ 3 ರ್ದ್ 5 ನಿಮಿಷ ಇಪ್ಪುನಗನೇ ಮಾತಾ ಚೆಕ್ಕಿಂಗ್ ಮುಗಿತ್‌ದ್ ಹಾಜಿರಾದಿತ್ತೆರ್. ಆತೆಟೇ ವಿಮಾನ ಬಾನೊಗು ರಾದಾದಿತ್ತ್ಂಡ್. ಅಂಚಾದ್ 6 ಪ್ರಯಾಣಿಕೆರ್ ಉಂತಡೆಡೇ ಬಾಕಿಯಾವೊಡಾಂಡ್.
ಇಂಡಿಗೋ ವಿಮಾನ ಅಧಿಕಾರಿಲೆನ ವಿರುದ್ಧ 6 ಪ್ರಯಾಣಿಕೆರ್ ಆಕ್ರೋಶ ಪಿದಯಿ ಪಾಡ್ದೆರ್. ವಿಮಾನೊದ ಪೊರ್ತುನು ಕಡೆ ಗಲಿಗೆಡ್ ಪಗತ್‌ದೆರ್. ಈ ಬಗ್ಗೆ ಒವ್ವೇ ಸೊಲ್ಲಂಜ ಬೈಜಿ. ವೆಬ್‌ಸೈಟ್‌ಡ್ ಪಗತಿನ ಪೊರ್ತು ಪಾಡ್ದೆರ್. ಆಂಡ ಟಿಕೆಟ್ ಬುಕ್ ಮಲ್ತ್‌ದ್, ವೆಬ್‌ಚೆಕಿನ್ ಮಲ್ತಿಬೊಕ್ಕ ಏರ್ಲಾ ಗಡಿ ಗಡಿ ವೆಬ್‌ಸೈಟ್ ಓಪನ್ ಮಲ್ತ್ ತೂಪುಜೆರ್. ಉ್ಂದು ಅದಿಕಾರಿಲೆನ ಬೇಜವಾಬ್ದಾರಿತನ ಪಂದ್ ಪ್ರಯಾಣಿಕೆರೆಡೊರಿ ಆಕ್ರೋಶ ತೂಪಾದೆರ್.
ಮಧ್ಯಾಹ್ನ 2.55ತ ವಿಮಾನ ತತ್ತಿನ 6 ಪ್ರಯಾಣಿಕೆರ್ ಸುಮಾರ್ 6 ಗಂಟೆ ಕಾತ್‌ದ್ ರಾತ್ರೆ 8.20ದ ವಿಮಾನೊಡು ಕುಡ್ಲಗ್ ಬತ್ತ್‌ದೆರ್.