Last updated on August 18th, 2023 at 05:01 pm
ಕುಡ್ಲ: ಯಾಪೊಲ ಡಿಜೆದಕುಲು ಮದ್ಮೆ ಲೇಸ್, ರೋಸ್, ಮದ್ರೆಂಗಿ, ಪುಟ್ಟು ಪರ್ಬ ಬೊಕ್ಕ ಬೇತೆ ಲೇಸುಲೆಡ್ ಡಿಜೆ ಮಲ್ತ್ ಜನಕುಲೆನ್ ರಂಜನೆ ಮಲ್ಪುವೆರ್. ಅಕುಲು ನಾನ್ ಸ್ಟಾಪ್ ಪದ್ಯೊಲೆನ್ ಪಾಡೊಂದು ಆ ಪದ್ಯೊಲೊನ್ ಬೇತೆ ಬೇತೆ ಬಗೆಟ್ ಮಿಕ್ಸ್ ಮಲ್ತ್ ಜನಕ್ಲೆನ್ ನಲ್ಪಾವೆರ್. ಆಂಡ ಆಗಸ್ಟ್ 14 ಕ್ಕ್ ಕುಡ್ಲಡ್ ಡಿಜೆನಕುಲು ನೆತ್ತೆರ್ ಉಂಬೊಲಿ ಮಲ್ತ್ 77 ನೇ ತನ್ನಾಲ್ಮೆ ದಿನೊನು ಆಚರಿತ್ ಸಮಾಜೊಗು ಎಡ್ಡೆ ಸೇವೆ ಕೊರ್ಪಿನ ಬಿರ್ಸಾದಿಗೆದ ಕಜ್ಜ ಮಲ್ತೆರ್. ಡಿಜೆ ಸರ್ಕಲ್ ಪನ್ಪಿ ಸಂಘಟನೆನ್ ಉಂಡು ಮಲ್ತ್
ದುಂಬಗ್ ಸಮಾಜ ಸೇವೆ ಮಲ್ಪರೆ ಪಿದಡ್ದೆರ್. ಡಿಜೆ ಪದುಕೆರೆಗ್ ಬಂಗದ ಪೊರ್ತುಡು ಸಕಾಯ ಮಲ್ಪರೆ ಯೋಜನೆ ಮಲ್ತೊಂದೆರ್.
ಡಿಜೆ ಸರ್ಕಲ್ ಕುಡ್ಲ ವತಿರ್ದ್ 77ನೇ ತನ್ನಾಲ್ಮೆ ದಿನೊತ ಆಗಸ್ಟ್ 14 ಕ್ಕ್ ಅತ್ತಾವರ ಕೆಎಂಸಿ ಆಸ್ಪತ್ರೆದ ಅಂಗನೊಡು ನೆತ್ತೆರ್ ಉಂಬೊಲಿ ಮಲ್ಪಿನ ಒಟ್ಟುಗು ವಿಶಿಷ್ಟವಾದ್ ಆಚರಿಪರೆ ನಿರ್ದಾರ ಮಲ್ತೆರ್. ಡಿಜೆ ಸರ್ಕಲ್ ಕುಡ್ಲ ಮೊಕುಲು ಕೆಎಂಸಿ ಆಸ್ಪತ್ರೆ ಅತ್ತಾವರ ಒಟ್ಟುಗು ಶಿಬಿರೊನು ಮಲ್ದಿತ್ತೆರ್.