Last updated on August 11th, 2023 at 07:12 pm
ಪುತ್ತೂರ್: ಪುತ್ತೂರ್‌ಡ್ ಬಾರಿ ಪುದರ್‌ಪೋತಿನ ಕೊಂಬೆಟ್ಟುದ ಜಿ.ಎಲ್ ಟ್ರೇಡ್ ಸೆಂಟರ್‌ಡುಪ್ಪುನ ‘ಪ್ರಭು ಚರುಂಬುರಿ’ ದಕಲೆನ ಕಡೆರ್ದ್ ಆ.12 ರ್ದ್ 15 ಮುಟ್ಟ ‘ಚರುಂಬುರಿ ಜಾತ್ರೆ’ ದಿನೊಲಾ ಬಯ್ಯ 4ರ್ದ್ 11ಗಂಟೆ ಮುಟ್ಟ ನಡಪರೆಗುಂಡು ಪಂದ್ ಪ್ರಭು ಚರುಂಬುರಿ ಸಂಸ್ಥೆದ ಧನಿ ರಾಜೇಶ್ ಪ್ರಭು ಮೇರಾ ಪತ್ರಿಕಾಗೋಷ್ಠಿಡ್ ಪಂಡೆರ್.
ಪುತ್ತೂರ್‌ಗ್ ಈ ಚರುಂಬುರಿ ಪರ್ಬೊದ ಕಲ್ಪನೆನ್ ಕನತ್‌ದ್ ಸುಮಾರ್ ಇರ್ವತ್ತೈನ್ ವರ್ಸೊರ್ದಿಂಚಿ ಚರುಂಬುರಿ ವೈವಾಟ್‌ಡ್ ಉಲ್ಲ, ಸುರುಕ್ ಬಂಟ್ವಾಳದ ಸುತ್ತಮುತ್ತ ಚರುಂಬುರಿ ವೈವಾಟ್ ಮಲ್ತೊಂದು, ಪುತ್ತೂರ್‌ದ ಶ್ರೀಧರ್ ಭಟ್ ಅಂಗಡಿದ ಎದುರು ಒಂಜಿ ದಶಕೊರ್ದುಲಾ ಎಚ್ಚ ಚರುಂಬುರಿ ಮಾರ್ದ್, ಕರಿನ ಮೂಜಿ ವರ್ಸೊರ್ದಿಂಚಿ ಕೊಂಬೆಟ್ಟುದ ಬಂಟೆರೆ ಭವನೊದ ಎದುರುದ ಜೆ.ಎಲ್.ಟ್ರೇಡ್ ಸೆಂಟರ್‌‌ಡ್ ‘ಪಭು ಚರುಂಬುರಿ’ ಅಂಗಡಿ ನಡಪಾವೊಂದುಲ್ಲ. ಕೊರೋನಗ್ ದುಂಬು ಒರ ಚರುಂಬುರಿ ಪರ್ಬ ಅಟ್ಟನೆ ಮಲ್ದಿತ್ತ. ಇತ್ತೆ ಅವೇ ಚರುಂಬುರಿ ಪರ್ಬೊದ ರಡ್ಡನೇ ಅಜಲ್ ಸುರು ಆವೊಂದುಂಡು ಪಂದ್ ಪಂಡೆರ್.
ಉದಿಪನ:
ಆ.12ತಾನಿ ಬಯ್ಯಡ್ 6.30ಕ್ಕ್ ಅಧಿಕೃತ ಉದಿಪನ ನಡಪರೆ ಉಂಡು. ತುಳು ಚಿತ್ರರಂಗೊದ ಅಂಚೆನೇ ರಂಗಭೂಮಿದ ನಟೆ ಸತೀಶ್ ಬಂದಲೆ ಚರುಂಬುರಿ ಜಾತ್ರೆ ಉದಿಪನ ಮನ್ಪರೆಗುಲ್ಲೆಲ್. ಭಟ್ ಆ್ಯಂಡ್ ಭಟ್ ಯೂಟ್ಯೂಬ್ ಚಾನೆಲ್‌ದ ಸುದರ್ಶನ್ ಭಟ್ ಮಲ್ಲಬಿನ್ನೆರಾದ್ ಬರ್ರೆಗುಲ್ಲೆರ್. ಈ ಪೊರ್ತುಡು ಇಂಚಿಪ್ಪೊಗು ನಿವೃತ್ತಿ ಘೋಷಣೆ ಮಲ್ತಿನ ಪುತ್ತೂರ್‌ದ ಡಾ.ಶಿವರಾಮ ಭಟ್ ಕ್ಲಿನಿಕ್‌ದ ಕಂಪೌಂಡರ್ ನರಸಿಂಹ ಭಟ್ರೆಗ್ ಮಾನಾದಿಗೆ ಮನ್ಪೆರೆ ಉಂಡು ಪಂದ್ ಪ್ರಕಟಣೆ ತೆರಿಪಾದ್ಂಡ್.
ದುಂಬುದ ಕಾಲೊದ ಚರುಂಬರಿ:
ದುಂಬುದ ಕಾಲೊಡು ಚರುಂಬುರಿ ಮಲ್ತೊಂದಿತ್ತಿನ ವಿಧಾನ ಬೊಕ್ಕ ಅಪಗದ ಸೆಬಿತ ಚರುಂಬುರಿನ್ ಇತ್ತೆದ ಕಾಲೊದ ಜನೊಕ್ಲೆಗ್ ತಿಕ್ಕೊಡು ಪನ್ಪಿ ಈ ಪರ್ಬದ ಪಿರವು ಉಂಡು. ನೆಲಟ್ ಕುಲ್ಲುದು, ಗ್ಯಾಸ್ ಲೈಟ್ ಪೊತ್ತಾದ್, ಟೇಸ್ಟಿಂಗ್ ಪೌಡರ್ ಪಾಡಂದೆ ಮನ್ಪುನ ಚರುಂಬುರಿ ಈ ಸರ್ತಿದ ವಿಶೇಷ. ಈತ್ ಮಾತ್ರ ಅತ್ತಂದೆ 20 ರೂಪಾಯಿರ್ದ್ ಬತ್ತಿನ 50 ರೂಪಾಯಿ ಮುಟ್ಟದ ಚರುಂಬುರಿಲು ಈ ಜಾತ್ರೆಡ್ ತಿಕ್ಕುವ ಪಂದ್ ರಾಜೇಶ್ ಪ್ರಭು ಪಂಡೆರ್. ಪತ್ರಿಕಾಗೋಷ್ಠಿಡ್ ಪ್ರಭು ಚರುಂಬುರಿದ ಆದರ್ಶ ವಿ. ಮಹೇಶ್, ದೇವಿಪ್ರಸಾದ್, ವನಿತಾ ಒತ್ತುಪಾಲ್‌ಡಿತ್ತೆರ್.
ಪಾರ್ಕಿಂಗ್ ಬೊಕ್ಕ ಸಿಟ್ಟಿಂಗ್ ವೆವಸ್ಥೆ:
ಈ ಸರ್ತಿದ ಚರುಂಬುರಿ ಜಾತ್ರೆಗ್ ಬರ್ಪಿನಕಲೆಗ್ ಕೊಂಬೆಟ್ಟುದ ಪ್ರಭು ಚರುಂಬುರಿ ಅಂಗಡಿದ ಎದುರುದ ಬಂಟೆರೆ ಭವನೊದ ಜಾಲ್‌ಡ್ ಪಾರ್ಕಿಂಗ್ ವ್ಯವಸ್ಥೆ ಇಪ್ಪುಂಡು. ಅಂಚೆನೇ ಸುಮಾರ್ 200 ಜನ ಕುಲ್ಲುದು, ಚರುಂಬುರಿ ತಿನ್ಪುನಂಚಿನ ವೆವಸ್ಥೆ ಜಿ.ಎಲ್.ಸೆಂಟರ್‌ದ ಮಾಲಿಗೆಡ್ ಇಪ್ಪುಂಡು ಪಂದ್ ರಾಜೇಶ್ ಪ್ರಭು ತೆರಿಪಾಯೆರ್.