Last updated on August 31st, 2023 at 05:17 pm
ಕುಡ್ಲ ಪೇಂಟೆದ ನಂತೂರ್ ಸರ್ಕಲ್‌ಡ್ ಪ್ರೈವೇಟ್ ಬಸ್ಸ್‌ದ ಬಾಕಿಲ್ಡ್ ನೇಲೊಂದಿತ್ತಿನ ಬಸ್ ಕಂಡಕ್ಟರ್ ಪಿದಯಿ ರಟ್ಟ್‌ದ್ ತರೆಕ್ ಗಾತಿದ ಗಡಿಯಾದ್ ತೀರ್ದಿನ ನಡಕೆ ನಡತ್‌ದ್ಂಡ್.
ಬಾಗಲಕೋಟೆ ಜಿಲ್ಲೆದ ನಿವಾಸಿ, ಇತ್ತೆ ತೊರತ್ತಲ್ ತಡಂಬೈಲ್‌ಡ್ ಇತ್ತಿನ ಈರಯ್ಯೆ (23) ಪನ್ಪಿನಾಯೆ ಬಸ್ ಕಂಡಕ್ಟರ್ ಆದಿತ್ತೆ ಪಂದ್ ತೆರಿದ್‌ಬೈದ್ಂಡ್. ಕೋಡೆ ಮದ್ಯಾನ 15 ನಂಬ್ರದ ಬಸ್ ಕದ್ರಿ ಕೆಪಿಟಿರ್ದ್ ಬತ್ತ್‌ದ್ ನಂತೂರು ಸರ್ಕಲ್‌ಡ್ ಒರಾನೆ ತಿರ್ಗಿನೆರ್ದಾವರ ಎದುರುದ ಬಾಕಿಲ್ಡ್ ಉಂತುದಿತ್ತಿನ ಕಂಡಕ್ಟರ್ ಪಿದಯಿ ರಟ್ಟ್‌ದೆ. ಸೀದ ಸಾದಿಗ್ ಬೂರ್ದಿನ ಕಂಡಕ್ಟರ್‌ನ್ ಅಲ್ಪ ಇತ್ತಿನ ಪೊಲೀಸೆರ್ ಬೊಕ್ಕ ಸಾರ್ವಜನಿಕೆರ್ ಸೇರ್ದ್ ಜವನನ್ ಆಸ್ಪತ್ರೆಗ್ ಸೇರಾದೆರ್.
ತರೆಕ್ ಗಾತಿದ ಪೆಟ್ಟ್ ಬೂರ್ದ್ ಮರ್ದ್ ಪಲಿಪಂದೆ ಜವನೆ ತೀರ್ದೆ ಪಂದ್ ತೆರಿದ್‌ಬೈದ್ಂಡ್. ಈ ನಡಕೆದ ವಿಡಿಯೋ ಒಂಜಿ ಗಾಡಿದ ಫ್ರಂಟ್ ಕ್ಯಾಮರಾಡ್ ರೆಕಾರ್ಡ್ ಆದಿತ್ತ್‌ದ್, ಬಸ್ ಬರಸ್‌ಡ್ ಪೋವೊಂದಿತ್ತಿನೆರ್ದಾವರ ಇಂಚ ಆತ್ಂಡ್ ಪಂದ್ ಪೊಲೀಸೆರ್ ಒಲವು ಕೊರ್ತೆರ್. ಕದ್ರಿ ಸಂಚಾರಿ ಸ್ಟೇಷನ್‌ಡ್ ಬಸ್ ಡ್ರೈವರ್‌ನ ಮಿತ್ತ್ ಪ್ರಕರಣ ದಾಕಲಾತ್ಂಡ್.