Last updated on August 29th, 2023 at 06:57 pm
ಟೈಮಿಂಗ್ ವಿಚಾರೊಡು ಒಡಿಪು ಸಿಟಿ ಬಸ್ ಉಂತಡೆಡ್ ಡ್ರೈವರ್‌ನಕುಲಿರ್ವೆರೆನ ನಡುಟು ಲಡಯಿ ಆದ್ ಒರಿ ಡ್ರೈವರ್‌ನ ಮೈಕ್ ಕೈ ಪಾಡ್ದ್, ಪೋಡಿಗೆ ಕಟ್ಟಾದಿನ ನಡಕೆ ನಡತ್‌ದ್ಂಡ್.
ಈ ಬಗ್ಗೆ ಒಡಿಪು ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ದಾಕಲಾತ್ಂಡ್. ಪೆಟ್ಟಾತಿನ ಖಾಸಗಿ ಬಸ್‌ದ ಡ್ರೈವರ್ ಸುನೀಲ್ ಪೊಲೀಸೆರೆಗ್ ಒಯಿಲ್ ಕೊರ್ತೆರ್.
ಇರ್ವೆರ್ ಡ್ರೈವರ್‌ನಕುಲ್ನ ನಡುಟು ಒಡಿಪು ಸಿಟಿಬಸ್ ಉಂತಡೆಡ್ ಪೊರ್ತುದ ವಿಚಾರೊಡು ಲಡಯಿ ಆತ್ಂಡ್. ಕುಡೊರಿ ಖಾಸಗಿ ಬಸ್ ಡ್ರೈವರ್ ಪ್ರತಾಪ್ ಪನ್ಪಿನ ಜನ ಸುನೀಲ್ನ ಬಸ್ಸ್‌ಗ್ ತಾನ್ ಬುಡೊಂದಿತ್ತಿನ ಬಸ್ಸ್‌ನ್ ಅಡ್ಡ ಉಂತದೆ. ಈ ಬಗ್ಗೆ ಪಾತೆರ್ರ ಪೋಯಿನೇ, ಪ್ರತಾಪ್ ಸುನೀಲ್ನ ಮಿತ್ತ್ ಕೈ ಪಾಡ್ದೆ ಪಂದ್ ಒಯಿಲ್‌ಡ್ ಬರೆತೆರ್.
ಆತೇ ಅತ್ತಂದೆ ರಾತ್ರೆ ಕುಡ ಸಿಟಿಬಸ್ ಉಂತಡೆಗ್ ಬನ್ನಗ ಆರೋಪಿಲಾಯಿನ ಪ್ರತಾಪ್, ಚಂದ್ರೆ, ವಿನೋದ್, ಗಣೇಶ್ ಪನ್ಪಿನಕುಲು ಸುನೀಲ್‌ಗ್ ಆಕ್‌ದ್, ಪೆದಂಬು ನೆರ್ದ್, ಬೆದರಿಕೆ ಪಾಡ್ದ್ ಪೋತೆರ್ ಪಂದ್ ಕೊರ್ತಿನ ಒಯಿಲ್‌ದ ಪ್ರಕಾರ ಒಡಿಪು ನಗರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.