ಕಾಂಗ್ರೆಸ್ ಸರ್ಕಾರೊರ್ದು ಕತ್ತಲೆ ಗ್ಯಾರೆಂಟಿ: ಶಾಸಕೆ ವೇದವ್ಯಾಸ್ ಕಾಮತೆರ್

Last updated on August 14th, 2023 at 07:34 am

ರಾಜ್ಯೊಡು ‘ಉಚಿತ’ ಗ್ಯಾರಂಟಿಲೆನ್ ದೀವೊಂದು ಜನೊಕ್ಲೆನ್ ಮಂಗೆ ಮಲ್ತೊಂದುಪ್ಪುನ ಕಾಂಗ್ರೆಸ್‌ ಸರ್ಕಾರ ಇತ್ತೆ ಒಂಜಿ ಕಡೆಟ್ ದರ್ಮೊದ ಕರೆಂಟ್ ಕೊರ್ದು, ಕುಡೊಂಜಿ ಕಡೆರ್ದ್ ಅನಧಿಕೃತವಾಗಿ ಲೋಡ್‌ ಶೆಡ್ಡಿಂಗ್‌ ಮಲ್ತೊಂದು ಜನೊಕ್ಲೆನ್ ದಗೆ ಮಲ್ತೊಂದುಂಡು ಪಂದ್ ತೆನ್ಕಾಯಿ ಕುಡ್ಲ ಕ್ಷೇತ್ರೊದ ಶಾಸಕೆ ಡಿ. ವೇದವ್ಯಾಸ್‌ ಕಾಮತೆರ್ ಆರೋಪ ಮಲ್ದೆರ್.

ಕರಿನ ವಾರೊರ್ದಿಂಚಿ ರಾತ್ರೆದ ಪೊರ್ತುಡು ಕರೆಂಟ್ ಕಟ್ ಮಲ್ತೊಂದಿತ್ತ್‌ದ್, ಜನೊಕ್ಲೆಗ್ ಬಾರಿ ಬಂಙ ಆವೊಂದುಂಡು. ಶಾಲೆ ಪೋಪಿ ಜೋಕುಲೆಗ್ ರಾತ್ರೆ ಓದೆರೆ ಬರೆಯೆರೆ ಆವೊಂದಿಜ್ಜಿ, ಪೊಂಜೊವುನಕ್ಲೆಗ್ ರಾತ್ರೆ ಅಟಿಲ್ ಮನ್ಪೆರೆ ಆವೊಂದಿಜ್ಜಿ. ನನ ಕರೆಂಟ್‌ನೇ ನಂಬುದಿನ ಎಲ್ಯೆಲ್ಯ ಉದ್ದಿಮೆದಕುಲೆನ ಬದ್‌ಕ್‌ಗ್ ಸರ್ಕಾರ ಸೂ ಕೊರ್ಯೆರ ಪಿದಡ್‌ದ್ಂಡ್. ಎಂಕ್ಲು ದರ್ಮೊಗು ಕರೆಂಟ್ ಕೊರ್ತ ಪಂದ್ ಒಂಜಿ ಕಡೆಟ್ ಸರ್ಕಾರ ರೈಸೊಂದಿತ್ತ್ಂಡ, ಕುಡೊಂಜಿ ಕಡೆಟ್ ಕರೆಂಟ್ ಕಟ್ ಮಲ್ತ್‌ದ್ ಜನೊಕ್ಲೆನ್ ಮಂಗೆ ಮಲ್ತೊಂದುಲ್ಲೆರ್ ಪಂದ್ ಆರ್ ಪನ್ತೆರ್.