ತುಳುನಾಡ್‌ದ ಕುಡ್ಲ ತಾಲೂಕುನು ಬರ ಪತ್ತಿನ ತಾಲೂಕು ಪನ್ದ್ ಘೋಷಣೆ

Last updated on August 26th, 2023 at 03:01 pm

ತುಳುನಾಡ್ ಬರ್ಸ ಬುಲೆ ಎಡ್ಡೆ ಇತ್ತಿನ ಜಾಗೆ, ನೀರ್‌ಗ್ ತತ್ವಾರ ದಾಂತೆ ಇತ್ತಿನ ನಾಡ್ ಆಂಡ ಈಯೊಡು ಉಂದು ಪೂರಾ ಬದಲ್ತ್‌ದ್ಂಡ್. ಸರಕಾರ ಬುಡುಗಡೆ ಮಲ್ದಿನ 113 ಬರ ಪತ್ತಿನ ತಾಲೂಕುಲೆಡ್ ನಮ್ಮ ಕುಡ್ಲಲಾ ಒಂಜಿ.

ಕುಡ್ಲ ತಾಲೂಕುಡು ಕರಿನ ರಡ್ಡ್ ತಿಂಗೊಲುಡು 20% ಬರ್ಸೊಗು ಕುಂದೆಲ್ ಬೈದ್ಂಡ್ ಅಂಚಾದ್ ಮಧ್ಯಮ ಬರ್ಸ ಕುಂದೆಲ್ದ ತಾಲೂಕು ಪನ್ದ್ ಸರಕಾರ ಘೋಷಣೆ ಮಲ್ದ್ಂಡ್. ತುಳುನಾಡ್ದ ಬೇತೆ ತಾಲೂಕುಲೆಡ್ ಬರ್ಸದ ಕುಂದೆಲ್ ಇತ್ತ್ಂಡಲಾ, ಬರತ ತಾಲೂಕು ಪನ್ದ್ ಮಾನದಂಡ ಮಲ್ಪರೆ ಕಾಲಿ ಬರ್ಸ ಮಾತ್ರ ಅತ್ತ್, ಮೂಜಿ ವಾರದ ದೊಂಬು, ಪಸೆತ ಕುಂದೆಲ್, ಅಂತರ್ಜಲದ ಮಟ್ಟ, ಕೆದು ಕಲೊಕುಲೆಡ್ ಉಪ್ಪುನ ನೀರ್, ತುದೆತ ನೀರ್‌ದ ಮಟ್ಟ ಇಂಚಿನೆನ್ ಪೂರಾ ತೂದು ಕುಡ್ಲ ತಾಲೂಕುನು ಮಾತ್ರ ಬರತ ತಾಲೂಕು ಪನ್ದ್ ಘೋಷಣೆ ಮಲ್ದೆರ್.

ಜೂನ್ 1 ರ್ದ್ ಆಗಸ್ಟ್ 25ರ ಮುಟ್ಟ ಬೊಲ್ತೇರ್ ತಾಲೂಕುಡು ಶೇ. 40ದಾತ್ ಕುಂದೆಲ್, ಬಂಟ್ವಾಳ ಶೇ. 24, ಕುಡ್ಲ ಶೇ. 20, ಪುತ್ತೂರು ಶೇ. 37, ಕಡಬ ಶೇ. 33, ಕಾರ್ಲ ಶೇ. 22, ಬ್ರಹ್ಮಾವರ ಶೇ. 21, ಹೆಬ್ರಿ ಶೇ. 39ದಾತ್ ಬರ್ಸದ ಕುಂದೆಲ್ ಉಂಡು, ಅಂಚಾದ್ ತೀವ್ರ ಬರ್ಸದ ಕುಂದೆಲ್ ತಾಲೂಕು ಪನ್ದ್ ಗುರ್ತ ಮಲ್ದೆರ್. ಅಂಚೆನೆ ಸುಳ್ಯ ತಾಲೂಕುಡು ಶೇ. 18, ಬೆದ್ರಡ್ ಶೇ. 11, ಮೂಲ್ಕಿ ಶೇ. 15, ಉಳ್ಳಾಲ ಶೇ. 16, ಕುಂದಾಪುರ ಶೇ. 8, ಒಡಿಪು ಶೇ. 14, ಬೈಂದೂರು ಶೇ. 16, ಕಾಪುಡು ಶೇ. 9ದಾತ್ ಬರ್ಸ ಕುಂದೆಲ್ ಉಂಡು.