Last updated on August 15th, 2023 at 10:13 am
ಕುಡ್ಲ: ಕಾರ್ ಬೊಕ್ಕ ಬೈಕ್ ಎಡ್ತೆ ಪ್ರಕರಣೊಡು ಪೊಲೀಸ್ ಇನ್‌ಸ್ಪೆಕ್ಟರ್ ಬೊಕ್ಕ ಎಎಸ್ಐಗ್ ಕಾಲ್ ಮಲ್ತ್‌ದ್ ಪೋಡಿಪಾದಿನ ಆರೋಪಿ ಶಕ್ತಿನಗರೊದ ನಿವಾಸಿ ಪುನೀತ್ ಶೆಟ್ಟಿ (35) ಪನ್ಪಿನಾಯನ್ ಉರ್ವ ಪೊಲೀಸೆರ್ ಕೈದ್ ಮಲ್ದೆರ್.
ಆರೋಪಿನ್ ನ್ಯಾಯಂತಡೆಕ್ ಹಾಜಿರ್ ಮನ್ಪಾದಿತ್ತ್‌ದ್, ನ್ಯಾಯಾಂಗ ಬಂಧನೊದ ಆದೇಶ ಆತ್ಂಡ್.
ಕಾರ್ ಒಂಜಿ ಬೈಕ್‌ಗ್ ಎಡ್ತಿನ ವಿಚಾರೊಡು ಕಾರ್ ಡ್ರೈವರ್ ಬೊಕ್ಕ ಬೈಕ್ ಬುಡೊಂದಿತ್ತಿನಕ್ಲೆನ ನಡುಟು ಬಾರಿ ವಾದ ಆದ್, ಪಿಸ್‌ರ್‌ಡ್ ಬೈಕ್‌ದ ಜನ ಕಾರ್‌ಗ್ ಬೋಡುಬೋಡೂಂದು ಪಿರ ಎಡ್ತ್‌ದೆ ಪಂದ್ ಆರೋಪ ಇತ್ತ್ಂಡ್. ಈ ಬಗ್ಗೆ ಉರ್ವ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ಈ ವಿಚಾರೊಡು ಉರ್ವ ಸ್ಟೇಶನ್‌ದ ಎಎಸ್ಐಗ್ ಕಾಲ್ ಮಲ್ತಿನ ಪುನೀತ್ ಶೆಟ್ಟಿ ಆರೋಪಿ ಬೈಕ್‌ದ ಜನನ್ ಕೈದ್ ಮನ್ಪೊಡೂಂದು ಒತ್ತಾಯ ಮಲ್ತ್‌ದೆ. ಈ ಪೊರ್ತುಡು ಎಎಸ್‌ಐ ಎಂಚ ಪಂಡಲಾ ಕೆಬಿ ಕೊರಂದಿನ ಪುನೀತ್ ಶೆಟ್ಟಿ ‘ಆಯನ್ ಕೈದ್ ಮಲ್ತಿಜರ್ನ್ಡ ಕಮಿಷನರ್‌ಗ್ ಪಂಡ್‌ದ್ ಟ್ರಾನ್ಸ್‌ಫರ್ ಮನ್ಪಾವೆ’ ಪಂದ್ ಪನ್ತಿನತ್ತಂದೇ ಸುಮಾರ್ 8 ನಿಮಿಷ ಮುಟ್ಟ ಪಾತೆರ್ದ್ ಪೊಲೀಸ್ ಇನ್‌ಸ್ಪೆಕ್ಟರ್ ಬೊಕ್ಕ ಎಎಸ್ಐಗ್ ಅಂಚ ಮನ್ಪೆ ಇಂಚ ಮನ್ಪೆ ಪಂದ್ ಪೋಡಿಪಾದೆ ಪಂದ್ ಒಯಿಲ್ ದಾಕಲಾತ್ಂಡ್.
ಆರೋಪಿನ ಮಿತ್ತ್ ಪೊಲೀಸ್ ಬೇಲೆಗ್ ತಲೆಪು ಅಂಚೆನೇ ಫೋನ್ ಮಲ್ತ್‌ದ್ ಪೋಡಿಪಾವುನ ಬಗ್ಗೆ ಉರ್ವ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲ್ತ್‌ದ್ ಕೈದ್ ಮಲ್ದೆರ್.
ಆರೋಪಿ ಪುನೀತ್ ಶೆಟ್ಟಿನ ವಿರುದ್ಧ ಬರ್ಕೆ, ಪಾಂಡೇಶ್ವರ, ಬಂದರ್, ಉರ್ವ, ಕಂಕನಾಡಿ ನಗರ ಸ್ಟೇಶನ್‌ಡ್ ಮಸ್ತ್ ಪ್ರಕರಣೊಲು ದಾಕಲಾದುಲ್ಲ. ಉ್ಂಬ್ಯನ ಕ್ರಿಮಿನಲ್ ಬೇಲೆಲೆರ್ದಾವರ ರೌಡಿಶೀಟರ್‌ಲಾ ದಾಕಲಾದಿತ್ತ್ಂಡ್.