Last updated on August 11th, 2023 at 05:19 pm
ನಮ್ಮ ಅಪ್ಪೆ ಬಾಸೆ ತುಳುಕು ಮಾನಾದಿಗೆ ತಿಕ್ಕುನ ಬಗೆಟ್ ಕೇರಳದ ಸಂಸದೆರ್ ರಾಜ್ಯ ಸಭೆ ಬೊಕ್ಕ ಲೋಕಸಭೆಟ್ ಇತೋರ್ತು ಸುಮಾರ್ ಸಲ ಸೊರ ದೆರ್ತ್‌ದೆರ್. ಅಂಚೆನೆ ಇತ್ತೆ ನಡತೊಂದಿಪ್ಪುನ ಕೇಂದ್ರ ಸಂಸತ್ತು ಕಲಾಪೊಡು ಕೇರಳದ ಸಿಪಿಐ(ಎಂ) ಸಂಸದೆರಾಯಿನ ಪಿ.ಸಂತೋಷ್ ಕುಮಾರ್ ಕುಡ ತುಳುಕು ಮಾನಾದಿಗೆ ತಿಕ್ಕುನ ಬಗೆಟ್ ರಾಜ್ಯಸಭೆಟ್ ಸೊರ ದೆರ್ದೆರ್.
ಉ್ಂದೆಕ್ ಸದು ಕೊರಿನ ಕೇಂದ್ರ ಸಂಸ್ಕೃತಿ ಬೊಕ್ಕ ಪ್ರವಾಸೋದ್ಯಮ ಸಚಿವೆಯಾಯಿನ ಕಿಶನ್ ರೆಡ್ಡಿ, ತುಳು ಅಂಚೆನೆ ಸುಮಾರ್ ಬಾಸೆಲು 8ನೇ ಪರಿಚ್ಛೇದೊಗು ಗೋಡ್ಯರೆ ಉಪ್ಪುನ ಬೇಡಿಕೆಲೆನ ಬಗೆಟ್ ಸರಕಾರೊಗು ತೆರಿದುಂಡು. ಆಂಡ ಉಂದೆಕ್ ಸಮವಾಯಿನ ಒವ್ವೇ ಮಾನದಂಡ ಇಜ್ಜಿ. ಉ್ಂದೆರ್ದ್ ದುಂಬು ಒಂಜಿ ಬಾಸೆ 8ನೇ ಪರಿಚ್ಛೇದೊಗು ಗೋಡ್ಯೊಡಾಂಡ ದಾದ ಪೂರಾ ಮಾನದಂಡ ಬೋಡು ಪನ್ಪಿನ ವರದಿ ಮಲ್ಪುನ ಪುನೆಪು ಆದಿತ್ತ್ಂಡಲಾ, ಅವ್ ನನಲ ಸಂಪೂರ್ಣ ಆತಿಜಿ.
ಜನಕುಲೆನ ಬೇಡಿಕೆದ ಬಗೆಟ್ ಎಂಕ್ಲೆಗ್ ತೆರಿದುಂಡು. ಅವೆನ್ ನೆಂಪು ದೀವೊಂದು ಅವೆಕ್ ಬೋಡಾಪಿನ ಕ್ರಮ ದೆತೊನುವ. ಮೈಸೂರುಡುಪ್ಪುನ ಭಾರತೀಯ ಭಾಷೆಲೆನ ಕೇಂದ್ರೀಯ ಸಂಸ್ಥೆ ತುಳುತಂಚಿನ ಬಾಸೆದ ಎಡ್ಡೆಪ್ಪುಗು ಬೇಲೆ ಮಲ್ತೊಂದುಂಡು, ಆ ಸಂಸ್ಥೆಗ್ ಕೇಂದ್ರ ಸರಕಾರ ಎಡ್ಡೆ ಅನುದಾನ ಕೊರೊಂದುಂಡು ಪನ್ದ್ ಪನ್ಡೆರ್.