Last updated on August 17th, 2023 at 08:17 am
ಮೈಸೂರ್‌ದ ನಂಜನಗೂಡ್‌ದ ಯುನೈಟೆಡ್ ಬ್ರಿವರಿಸ್ ಕಂಪನಿ ಮಲ್ದಿನ ಕಿಂಗ್‌ಫಿಶರ್ ಬಿಯರ್ಡ್ ಸೆಡಿಮೆಂಟ್ ಅಂಶ ತಿಕ್ಕ್‌ದಿನೆರ್ದಾವರ 25 ಕೋಟಿ ರೂಪಾಯಿ ಮೌಲ್ಯೊದ 78,678 ಬಾಕ್ಸ್ ಬಿಯರ್‌ಲೆನ್ ವಶೊಕು ಗೆತೊಂದ ಪಂದ್ ಅಬಕಾರಿ ಇಲಾಖೆ ಒತ್ತು ಆಯುಕ್ತೆರ್ ಎ.ರವಿಶಂಕರ್ ತೆರಿಪಾದೆರ್.
ಬುಧವಾರ ಮಾಧ್ಯಮ ಪ್ರತಿನಿಧಿಲೆನೊಟ್ಟುಗು ಪಾತೆರ್ನ ಆರ್, ಕಿಂಗ್ ಫಿಷರ್ ಸ್ಟ್ರಾಂಗ್ ಬೊಕ್ಕ ಕಿಂಗ್ ಫಿಷರ್ ಅಲ್ಟ್ರಾ ಲ್ಯಾಗರ್ ಬಿಯರ್ಡ್ ಸೆಡಿಮೆಂಟ್ ಅಂಶ ತಿಕ್ಕ್‌ದ್ಂಡ್. ಸೆಡಿಮೆಂಟ್ ಅಂಶ ಇತ್ತಿನ ಬಿಯರ್ ನರಮಾನ್ಯೆರೆಗ್ ಪರ್ಯೆರೆ ಪಂಡಿನವತ್ತ್. 7 E ಬೊಕ್ಕ 7C ಬ್ಯಾಚ್‌ಡ್ ಜುಲೈ 15 ತಾನಿ ಬಾಟಿಲಿಂಗ್ ಆತಿನ ಬಿಯರ್ಡ್ ಸೆಡಿಮೆಂಟ್ ಅಂಶ ತಿಕ್ಕ್‌ದ್ಂಡ್. ಬಿಯರ್ ಸ್ಯಾಂಪಲ್‌ನ್ ಕೆಮಿಕಲ್ ಲ್ಯಾಬ್‌ಗ್ ಕಡಪುಡ್ದಿನ ಪೊರ್ತುಡು ಸೆಡಿಮೆಂಟ್ ಅಂಶ ಇಪ್ಪುನ ತೆರಿದ್ಂಡ್. ಆಗಸ್ಟ್ 2 ತಾನಿ ಬತ್ತಿನ ಲ್ಯಾಬ್ ವರದಿದ ಆಧಾರೊಡು ಅಪಗನೇ ಸೆಡಿಮೆಂಟ್ ಅಂಶ ಇತ್ತಿನ ಬಿಯರ್ ಬಾಟ್ಲಿಲೆನ್ ವಶೊಕು ಗೆತೊಂದುಂಡು ಪಂದ್ ಪಂಡೆರ್.
ಸೆಡಿಮೆಂಟ್ ಅಂಶ ಇಪ್ಪುನ ಮಾತ ಬಿಯರ್‌ಲೆನ್ ವಶೊಕು ಗೆತೊಂದ. ಕೆಲ ಬಾಕ್ಸ್‌ಲು ರಿಟೈಲ್ ಶಾಪ್‌ಗ್ ಪೋದು ಆತ್ಂಡ್. ಅಲ್ಪಲಾ ಮಾರಂದಿಲೆಕ ತಡೆ ಪಾಡ್ದ. ಗುಣಮಟ್ಟೊದ ಬಿಯರ್ ತಯಾರ್ ಮಲ್ಪಂದಿನ ಕಾರಣ ಕಂಪನಿದ ಮಿತ್ತ್ FIR ಪಾಡ್ದ ಪಂದ್ ಪಂಡೆರ್.
ಆರೋಪ ನಿರಾಕರಿತಿನ ಕಿಂಗ್‌ಫಿಶರ್
ಜುಲೈ 15ತಾನಿ ನಂಜನಗೂಡ್‌ಡ್ ಕೆಲವೇ ಕೆಲವು ಬಿಯರ್ ಬಾಟ್ಲಿಲೆಡ್ ಎಲ್ಯ ಮಟ್ಟ್‌ಡ್ ಮಸ್ಕ್ ತೋಜೊಂದಿತ್ತ್ಂಡ್ ಆತೆ. ಉ್ ಉ್ಂದೆರ್ದಾವರ ಆರೋಗ್ಯೊಗು ದಾಲ ಪೆಟ್ಟ್ ಇಜ್ಜಿ. ಎಂಕುಲು ಅಧಿಕಾರಿಲೆನೊಟ್ಟುಗು ಬೋಡಾಯಿಲೆಕ ಇತ್ತೊಂದು, ಪರಿಹಾರ ಕ್ರಮೊಕುಲೆನ್ ದೆತೊನೊಂದು, ಪಾರದರ್ಶಕತೆ ಬೊಕ್ಕ ಸಹಕಾರೊಗು ಆದ್ಯತೆ ಕೊರೊಂದು ತಲೆಪುಲೆನ್ ಕಲೆಯೊಂದುಲ್ಲ. ಎಂಕ್ಲೆನ ಮಾತಾ ಉತ್ಪನ್ನೊಲು ನಿಗದಿಯಾತಿನ ಮಾರ್ಗಸೂಚಿದಂಚೆನೇ ಉಲ್ಲ ಅಂಚೆನೇ ಎಡ್ಡೆ ಗುಣಮಟ್ಟೊದ ಮಾನದಂಡೊಲೆನ್ಲಾ ಎತ್ತಾವ ಪಂದ್ ಯುನೈಟೆಡ್ ಬ್ರಿವರೀಸ್ ಲಿಮಿಟೆಡ್‌ದ ವಕ್ತಾರೆರ್ ಪನೊಂದುಲ್ಲೆರ್.