Last updated on August 31st, 2023 at 06:43 am
ಅವ್ 1888ನೇ ಇಸವಿ, ಆ ದಿನೊಟು ಮಿತ್ತ ಜಾತಿದಕಲೆಗ್ ಅತ್ತಂದೆ ಬೇತೆಕಲೆಗ್ ದೇವಲ್ಯದ ಉಲಯಿ ಪೋವರೆ ಇತ್ತಿಜಿ. ಇಡೀಕ್ ಇಡೀ ದೇಶನೇ ಜಾತಿ ವ್ಯವಸ್ಥೆದ ಮಿತ್ತ ತಿರ್ತ ಕೆಸರ್‌ಡ್ ಮುರ್ಕುದು, ಮಲ್ಲ ಎಲ್ಯ ಪನೊಂದು ಮುನುಷ್ಯೆರೆನ್ ಮನುಷ್ಯೆರೇ ಪಗೆಮಾನಿಲೆಕ್ಕ ತೂವೊಂದಿತ್ತಿನ ಕಾಲ. ಇಂಚಿತ್ತಿ ಪೊರ್ತುಡು ತಿರುವನಂತಪುರಂ ಜಿಲ್ಲೆದ ಅರವೀಪುರಂ ಪನ್ಪಿ ಜಾಗೆಡ್ ನಾರಾಯಣ ಗುರು ನೆಯ್ಯಾರ್ ತುದೆಕ್ ಪೋದು ಅಲ್ಪದ ಒಂಜಿ ಕಲ್ಲ್ ಕನತ್ ಉಂದೇ ಶಿವಲಿಂಗ ಪನ್ದ್ ಪ್ರತಿಷ್ಠೆ ಮಲ್ಪುವೆರ್. ಸಾಮಾಜಿಕ ಸ್ಥರೊಡು ಎರೆಗ್ ದೇವೆರೆನ್ ಮುಟ್ಟರೆ ಇತ್ತಿಜೊ, ಅಂಚಿನಕುಲು ದೇವೆರೆನ್ ಪ್ರತಿಷ್ಠೆ ಮಲ್ಪುನು ಪನ್ಡ ಕಲ್ಜಿಗ ಪನ್ದ್ ಉಂದೆನ್ ಉಂತಾವರೆ ಬತ್ತಿನ ಮಿತ್ತ ಜಾತಿದಕಲೆಗ್ ಯಾನ್ ಈಳವೆರೆನ ಶಿವನ್ ಪ್ರತಿಷ್ಠೆ ಮಲ್ತಿನಿ ನಿಕಲೆನ ಅತ್ತ್ ಪನ್ದ್ ಒಂಜೇ ಪಾತೆರೊಡು ಬಾಯಿ ಮುಚ್ಚಾಯೆರ್.
ಸಮಾಜೊದ ಪಿಡುಗುಲೆನ್ ದೂರ ಮಲ್ತ್, ದುನಿಪು ದಾಂತಿನ ವರ್ಗೊದ ಸ್ವರ ಆದ್ ತನ್ನ ಇಡೀ ಜೀವನೊನು ಪಿರ ಬೂರ್ದಿನಕಲೆನ್ ಸಾಮಾಜಿಕವಾದ್, ರಾಜಕೀಯವಾದ್, ಶೈಕ್ಷಣಿಕವಾದ್ ಮಿತ್ತ್ ಕನರೆ ಪುನೆಯಿನ ನಾರಾಯಣ ಗುರುಕುಲು ಪುಟ್ಟಿನಿ ಚೆಂಬಳಂತಿ ಪನ್ಪಿ ಊರುಡು ಈಳವೆರೆನ ಇಲ್ಲಡ್ 1856ಕ್ಕ್. ಮೆರೆನ ಅಮ್ಮೆರ್ ಮಾಡಾನ್ ಆಶಾನ್ ಬೊಕ್ಕ ಅಪ್ಪೆ ಕುಟ್ಟಿ ಅಮ್ಮಾಳ್. ಈಳವೆರೆನ್ ಅವರ್ಣೆರ್ ಪನ್ದ್ ಮುರ್ಗೊಲೆಡ್ಲಾ ಕಡೆ ಆದ್ ತೂವೊಂದಿತ್ತಿನ ಆ ಕಾಲೊಡು ವಿಶ್ವೊನು ಒಂಜಿ ಮಲ್ಪರೆ ಪಿದಡಿನವು ಬಿರ್ಸಾದಿಗೆನೇ ಸಮ.
ಮಾನವೆರೆನ ಬುಲೆಚ್ಚಿಲ್ ಬೊಕ್ಕ ಸ್ವಾತಂತ್ರ್ಯ ಶಿಕ್ಷಣೊರ್ದು ಮಾತ್ರ ಆವು ಪನ್ದ್ ಬಲವಾದ್ ನಂಬುದಿತ್ತಿನ ಗುರುಕುಲು ಅವೆಕ್ ಬೋಡಾಪಿನಲೆಕ್ಕ ಒಂಜಿ ರೂಪುರೇಶೆ ಪಾಡ್ದ್, ಶಿಕ್ಷಣೊರ್ದು ವಂಚಿತ ಸಮಾಜೊಲೆಗ್ ತಾದಿಗ್ ದೊಂದಿಯಾಯೆರ್. ಜಾತಿ ಮತೊಕುಲೆನ್ ಮೀರ್ದ್ ಒಂಜಿ ಸಮಾಜ ಉದಿಪೊಡು ಪನ್ದ್ ಪುನೆಯೆರ್. ಸತ್ಯ, ನೀತಿ, ಧರ್ಮ, ಮೋಕೆದ ಸಾದಿಡ್ ಮಾನವೆರ್ ನಡಪೊಡು ಪನ್ಡೆರ್.
ಕೇರಳದ ಈಳವ, ತೀಯೆರ್ ಗುರುಕುಲೆನ್ ಆದರ್ಶವಾದ್ ದೆತೊಂದು ಇತ್ತೆ ಸಮಾಜದ ಮಿತ್ತ ಸ್ಥರೊಕು ಪೋತೆರ್. ಈಳವೆರ್ ಅಲ್ಪ ರಾಜಕೀಯವಾದ್ ಮಲ್ಲ ಮಲ್ಲ ಸ್ಥಾನೊಡು ಉಲ್ಲೆರ್. ಮುಖ್ಯಮಂತ್ರಿಲಾ ಆತೆರ್. ಶೈಕ್ಷಣಿಕವಾದ್ ಊರು ಊರುಲೆಡ್ ಮಲ್ಲ ಮಲ್ಲ ಶಾಲೆ ಕಾಲೇಜಿಲೆನ್ ಕಟ್ಟ್ ದ್ ಮರ್ಲೆರೆ ಸಂತೆ ಆದಿತ್ತಿನ ಕೇರಳೊನು ಇನಿಕ್ ಶಿಕ್ಷಣೊಡು ದೇಶೊಗೇ ಸುರುತ ಸ್ಥಾನೊಗು ಕನತೆರ್. ಅಲ್ಪದ ಈಳವೆರ್ ನಾರಾಯಣ ಗುರುಕುಲೆ ಕಾಲಿ ಒರಿ ಧಾರ್ಮಿಕ ಗುರು ಆದ್ ತೂಯಿಜೆರ್, ಅರೆನ ತತ್ವೊಲೆನ್ ತನ್ಕುಲೆನ ಜೀವನೊಡು ಕನತ್ ಇನಿಕ್ ಗಟ್ಟಿ ಆದ್ ಸಮಾಜೊನು ಕಟ್ಟಿಯೆರ್.
ಈಳವೆರ್ ಮಾತ್ರ ಅತ್ತಂದೆ ಮೊಕಲೆಗ್ ಸಮವಾದುಪ್ಪುನ ತುಳುನಾಡ ಬಿರುವೆರ್, ದೀವೆರ್, ಪರಪೈಕ್‌ದಕುಲು, ಕರ್ನಾಟಕದ ಈಡೀಗೆರ್ಲಾ ಮೆರೆನ್ ಗುರು ಆದ್ ದೆತೊನ್ದೆರ್. ಗುರುಕುಲೆನ ಪುದರ್‌ದ್ ಸಂಘಟನೆ ಕಟ್ಟೊಂದು ಅರೆನ ತತ್ವೊಲೆನ್ ಪಾಲನೆ ಮಲ್ಪರೆ ತೂಪೆರ್. ನಮ್ಮಕುಲು ತಾದಿ ತತ್ತಿನಿ ಒಲ್ಪ ಪನ್ಡ, ನಾರಾಯಣ ಗುರು ಕಾಲಿ ಒರಿ ಧಾರ್ಮಿಕ ನಾಯಕೆ ಆದ್ ಕೆಲವು ದೇವಲ್ಯೆ ಕಟ್ಟಾಯಿನಾರ್ ಪನ್ದ್ ತೂಯಿನವು. ದೇವಲ್ಯ ಕಟ್ಟಾದ್ ಪಿರ ಒರಿದಿನಕಲೆನ್ ದೇವೆರೆನಡೆ ಕನತಿನವು ಗುರುಕುಲೆನ ಒಂಜಿ ಸಾಧನೆ ಆಂಡ ಅವೆತೊಟ್ಟುಗು ಇತ್ತಿನ ಸಂಘಟನಾತ್ಮಕ, ಸಾಮಾಜಿಕ, ರಾಜಕೀಯ, ಶೈಕ್ಷಣಿಕ ಸಾಧನೆಲು ನಮಕ್ ಬೊರ್ಚಾಂಡ್. ಒಲ್ಪಲಾ ಗುರುಕುಲು ಎಂಕ್ ಮೂರ್ತಿಪೂಜೆ ಮಲ್ಪುಲೆ, ರಾತ್ರೆ ಪಗೆಲ್ ಭಜನೆ ಮಲ್ಪುಲೆ, ಮೆರವಣಿಗೆ ಮಲ್ಪುರೆ ಪನ್ದ್ ಪನ್ತಿಜೆರ್. ಆ ಮಹಾತ್ಮೆರ್ ಸಂಘಟಿತೆರಾಲೆ, ಕಲ್ಪುಲೆ, ಸ್ವತಂತ್ರ್ಯರಾಲೆ ಪನ್ತಿನವು ನಮ್ಮ ಮಂಡೆಗ್ ಪೊಗ್ಗುದುಜಿ.
ಬಿಲ್ಲವೆರೆಟ್ಟ್ ಬೋಡಾಯಿನಾತ್ ಸ್ಥಿತಿವಂತೆರುಲ್ಲೆರ್, ಆಂಡ ಬಿಲ್ಲವೆರ್ ದಾಯೆಗ್ ಮಲ್ಲ ವಿದ್ಯಾಸಂಸ್ಥೆಲೆನ್, ಯುನಿವರ್ಸಿಟಿಲೆನ್ ಕಟ್ಟಾಯಿಜೆರ್? ದಾಯೆಗ್ ಬಿಲ್ಲವೆರೆನ ಮಲ್ಲ ಮಲ್ಲ ಮೆಡಿಕಲ್ ಇಂಜಿನಿಯರಿಂಗ್ ಕಾಲೇಜಿಲು ಇಜ್ಜಿ? ತುಳುನಾಡೊರ್ಮೆ ಸುಮಾರ್ ಮುಪ್ಪ ಪ್ರತಿಶತ ಬಿಲ್ಲವ ಓಟುದಕುಲು ಉಪ್ಪುನಗ ದಾಯೆಗ್ 13 ಸೀಟ್‌ಡ್ ಕಾಲಿ ರಡ್ಡ್ ಜನ ಬಿಲ್ಲವ ಶಾಸಕೆರ್ ಉಪ್ಪುನು? ಈತ್ ಮಲ್ಲ ಸಮಾಜದ ಒಂಜೇ ಒಂಜಿ ಸಂಸದೆ ದಾನಿ ಇಜ್ಜಿ? ರಾಜಕೀಯವಾದ್ ಬಿಲ್ಲವೆರ್ ಸಂಘಟನೆ ಆಯಿಜೆರ್, ಶೈಕ್ಷಣಿಕವಾದ್ ತನ್ಕುಲೆ ಸಮಾಜೊನು ದುಂಬು ಕನವರೆ ತೂಯಿಜೆರ್. ಬಿಲ್ಲವ ಜವನೆರೆಗ್ ಸ್ವಾತಂತ್ರ್ಯ ಪನ್ಪಿನೆತ್ತ ಅರ್ಥನೇ ತೆರಿಯಂದೆ ಪೋಂಡು, ಉಂದು ದಾಯೆಗ್ ಇಂಚ ಆಂಡ್?
ಕೋಟಿ ಚೆನ್ನಯೆರ್ ಸಾಮಾಜಿಕ ಕ್ರಾಂತಿ ಕನತೆರ್, ಕಾಂತಬಾರೆ ಬೂದಬಾರೆರ್ ರಾಜಕೀಯ ಕ್ರಾಂತಿ ಕನತೆರ್, ನಾರಾಯಣ ಗುರುಕುಲು ಧಾರ್ಮಿಕ ಬೊಕ್ಕ ಶೈಕ್ಷಣಿಕ ಕ್ರಾಂತಿ ಕನತೆರ್. ಈತ್ ಪೂರಾ ಇತ್ತ್ ಲಾ ಬಿರುವೆರ್ ದಾನೆ ನನಲಾ ಪಿರ ಒರಿದಿನಿ? ಪ್ರತಿಯೊರಿ ಬೆಚ್ಚ ನೆತ್ತೆರ ಜವನೆ ಒರ ಕುಲ್ಲುದು ನಮ್ಮ ಭವಿಷ್ಯ ದಾದ ಪನ್ದ್ ಎನ್ನ್ಂಡ ತನ್ನಾತೆಗೇ ಸದು ತಿಕ್ಕುಂಡು. ತಂಕದ ಬಿರುವೆರ್, ತರೆ ಗಟ್ಟಿ ಉಂಡು ಪನ್ದ್ ಪಾದೆಗ್ ದರ್ಪುನ ಬುಡ್ದ್ ತರೆನ್ ಬಲ್ಪಾದ್ ಸಮಾಜನ್ ಮಿತ್ತ್ ಕನತೆರ್ಡ ನಾರಾಯಣ ಗುರುಕುಲೆನ್ ಆದರ್ಶವಾದ್ ದೆತೊನಿನೆಕ್ಕ್ ಸಾರ್ಥಕ ಆವು. ಇಜಿಂಡ ಗುರುಕುಲು ಗುಂಡೊಡು ಉಪ್ಪೆರ್ ನಮ್ಮ ಜವನೆರ್ ಸಾದಿಡ್ ಉಪ್ಪೆರ್.