Last updated on August 16th, 2023 at 08:14 pm
ಕಂಚಿ ಕಡೆಗಿನ ಎರಮನೆಟ್ ಯೋಗ್ಯೊಗು ಯೋಗ ಉಂಡೊ, ಬಾಗ್ಯೊಗು ಬಾಗ್ಯೊ ಉಂಡೊ, ಬೊಲ್ಲಿ ಬಂಗಾರ ಪದ್ದೆಯಿ ಪೊಲಿ, ಲಪ್ಪುನಾತ್ ಅರಿಬಾರ್, ಬೊರಿಪಿನಾತ್ ನುರೆ ಪೇರ್ ಉಂಡು ಆಂಡ ಯೋಗ್ಯದ ಎರಮನೆಕ್ ಬಾಗ್ಯದ ಪೊಣ್ಣು ಇಜ್ಜಿ, ಬಾಗ್ಯೊದ ಪೊಣ್ಣು ನಾಡೊಂದು ಬಲೆ ಪನ್ದ್ ಎಕಸಾಲೆರ್ ಮಂದೆ ಕೂಡಾದ್ ಮದಿಪು ಕೊರಿಯೆರ್‌ಯೇ..
ಅಲ್ಪ ತೂಯೆರೊ ಮುಲ್ಪ ತೂಯೆರೊ ಎಕಸಾಲೆರೆ ಯೋಗೊಗು ಒಪ್ಪುನ ಪೊಣ್ಣ ಪೊದು ಓಲುಲಾ ತಿಕ್ಕುಜಿ ಪನ್ನಗ ಅಂಚಾಂಡ ನಿಕುಲು ತೂಯಿನ ಇಜ್ಜಿಡ, ಕೇನಿನ ಆಯಿಜಿಡ ಯಾನೊಂಜಿ ಪೊಣ್ಣು ತೂತೆ, ಮಣ್ಣ ಪಕಲೋರಿ ಎರಮನೆತ ಗಿಂಡೆಗಿಳಿರಾಮ ದೆಯ್ಯಾರುನ ಮಗಲ್ ಅಕ್ಕೆ ದೆಯ್ಯಾರು ಪನ್ದ್ ಪಂಡೆರೊ ಏಕಸಾಲೆರ್.
ಕಂಚಿ ಕಡಗಿಂದ ಎರಮನೆರ್ದ್ ಕೂಡಿ ಬಿನ್ನೆರ್ ಪೇರ್ದ ವನಸ್ ಉಂಡುದು ಪಣ್ಣಪಕಲೋರಿ ಎರಮನೆಕ್ ಪಿದಡುವೆರ್‌ಯೇ.. ಏರ್ ಉಂದು ಇದಮುಟ್ಟ ಬರಂದಿ ಬಿನ್ನೆರ್ ದಾನೆ ಬತ್ತೆರ್ ಪನ್ದ್ ಮಣ್ಣ ಪಕಲೋರಿ ಎರಮನೆಟ್ ಕೈ ಕಾರ್ ದೆಕ್ಕರೆ ನೀರ್ ಕೊರ್ದು ಅಸರ್‌ಗ್ ಬೆಲ್ಲ ಗಿಂಡೆ ನೀರ್ ಕೊರ್ದು ಬತ್ತಿ ಮಂದೆಲು ಕೇನುವೆರ್‌ಯೇ, ದೂರೊಗು ಕೊರ್ಪಿನ ಪೊಣ್ಣು ಮುಟ್ಟೊಗು ಮಾರುನ ಮುಂಬು ಉಂಡೊಂದು ಮದಿಪುವೆರ್‌ಯೇ.. ಅಂದ ಬಿನ್ನೆರೇ ಮಾರುನ ಮುಂಬುನು ಬೇಸ ಕಾರ್ತೆಲ್ಡ್ ಮಾರ್‌ದಾತ್ಂಡ್, ಕೊರ್ಪಿನ ಪೊಣ್ಣನ್ ಸುಗ್ಗಿ ಪಗ್ಗು ತಿಂಗೊಲ್ಡು ಕೊರ್ದಾತ್ಂಡ್, ನನ ಇತ್ತಿನ ಪೊಣ್ಣು ದೆಯ್ಯಾರು ಬಾಲೆ ದೆಯ್ಯಾರು, ಅಲೆಗ್ ಮಾತಿ ಕುಂಟು ತುತ್ತರೆ ತೆರಿಯಂದ್, ಬುಡಿ ತರೆನ್ ಕಟ್ಟರೆ ತೆರಿಯಂದ್ ಏಲ್ ಪ್ರಾಯೊದ ಬಾಲೆ ಪನ್ದ್ ಪನ್ಪೆರ್‌ಯೇ.. ನಿಕಲೆ ಪೊಣ್ಣು ಏಲ್ ಏಲರೆ ಪ್ರಾಯದಾಂಡ ಎಂಕಲೆ ಏಕಸಾಲೆರ್ ಪತ್ತ್ ಪದಿನಾಜಿ ಪ್ರಾಯದಾರ್‌ಯೇ, ನಿಕಲೆ ಪೊಣ್ಣು ಎಂಕಲೆ ಆನಗ್ ಸಮ ಆಂಡ್ ಪನ್ದ್ ಪನ್ಪೆರ್‌ಯೇ.. ಕೂಡಿ ಪೊದುಟು ಮದಿಮೆಗ್ ದಿನ ದೀಯೆರ್‌ಯೇ.
ಬಾರೊಡ್ದು ಬಾರೊ ಎನ್ಮನಾನಿ ಅಂಗಾರೆ ಬಾರೊಗು ತಿಂಗೊಲು ಮುಟ್ಟಗೊ ಸಂಕ್ರಾಂತಿ ಎಡ್ಡೆ ಏಲ್ಯೊಗು ಆಣ ದಿಬ್ಬನ ಮಣ್ಣ ಪಕಲೋರಿ ಎರಮನೆಕ್ ಬತ್ತ್ಂಡ್‌ಯೇ. ಎಡ್ಡೆ ಏಲ್ಯೆಡ್ ಎಡ್ಡೆ ಗಲ್ಗೆಡ್ ಪೇರ್ದ ವನಸ್ ಆಂಡ್‌ಯೇ, ಕೈಮುಟುದು ಕೈದಾರೆ ಮೈಮುಟುದು ಸೇಸ ಪಾಡಿಯೆರ್‌ಯೇ ಏಕಸಾಲೆ ದೆಯ್ಯಾರುಗು. ಎಡ್ಡೊಂಜಿ ಏಲ್ಯೆಡ್ ಎಡ್ಡೆ ಗಲಿಗೆಡ್ ದೆಯ್ಯಾರುಗು ದೊಂಪ ಜಪುಡಿಯೆರ್‌ಯೇ, ಪಣ್ಣ ಪಕಲೋರಿ ಎರಮನೆರ್ದ್ ಕಂಚಿತ್ತ ಕಡಗಿನ ಎರಮನೆಕ್ ದೆಯ್ಯಾರು ಪೊಸ ಮದಿಮಾಲ್ ಬತ್ತೊಲುಯೇ.
ದೆಯ್ಯಾರುಗೊ ಸಾಲೆರೆಗೊ ಮದ್ಮೆ ಆದ್ ಆಜಿ ಮೂಜಿ ತಿಂಗೊಲು ಒಂಜಿ ರಡ್ಡ್ ವರ್ಸ ಆಂಡ್‌ಯೇ. ಎನ್ನ ಲೆಕ್ಕಂತಿ ಪೊಣ್ಣುಲು ಮದಿಮಾಲ್ ಆಪ, ಸೂತಕೊ ಪೋಪ, ತಿಂಗೊಲು ಕುಲ್ಲುವೊ ವರ್ಲ ಪೆದ್ದುವೊ ಯಾನ್ ಮದ್ಮಲ್ ಆಯಿಜಿ ಸೂತಕ ಕುಲ್ಲಿಜಿ ವರ್ಸ ಪೆದ್ದಿಜಿಂಡ್ ಅಕಿಲಾಸ ಬುಡ್ಪೊಲುಯೇ. ಗಟ್ಟರ್ದ್ ತಿರ್ದ್ ಗಟ್ಟರ್ದ್ ಮಿತ್ತ್ ಉದ್ದು ಮದ್ದೂರೂನ್ಪಿ ಜಾಗೊಡು ಮಾರಿ ಮಾರಲಬ್ಬೆಗೊಂಜಿ ಪರಕೆ ಪನ್ಪೆರ್ಂಡ್ ಪಂಡೊಲುಯೇ. ಯಾನ್ ಮದ್ಮಲ್ ಆಯೆಡ ಸೂತಕ ಪೋಯೆಡ ತಿಂಗೊಲು ಕುಲ್ಲಿ ಯೆಡ ವರ್ಸ ಪೆದ್ದಿಯೆಡ ಆನ್ ಬಾಲೆ ಆಂಡ ಕಂಚಿಲು ತುಂಬಾವೆ ಪುಂಡಿ ಪನವು ಪಾಡ್ಪಾವೆ, ಪೊಣ್ಣಾಂಡ ಬಂಗಾರ್ದ ಬಾಲೆ ಬೊಳ್ಳಿದ ತೊಟ್ಟಿಲು ಪಾಡುವೆ ಪನ್ದ್ ಪನ್ಡೆರ್. ಪಂಡಿ ಪರಕೆ ದೊಂಡೆದಾವೊಂಡ ದೆಯ್ಯಾರು ಮದ್ಮಲ್ ಆಯೆರ್, ದೆಯ್ಯಾರೆ ಬಂಜಿಡ್ ನೀರ್ ನಿರ್ತ್ಂಡ್‌ಯೇ, ನೀರ್ ನಿರ್ತ್ ಗರ್ಬೊ ಬಲಿರ್ಂಡ್‌ಯೇ, ಏಲ್ ತಿಂಗೊಲು ಆಯಿನೇ ಏಕಸಾಲೆರ್ ಪೂ ಸೀರೆ ಕೊರ್ದು ಬಯಕೆ ತಮ್ಮನ ಕರಿತೆರ್‌ಯೇ. ಬಂಜಿಗ್ ಒರ್ಂಬ ತಿಂಗೊಲು ಕರಿದ್ ಪತ್ತ್ ತಿಂಗೊಲು ನಿರೆನಗ ಬಾಲೆ ಗಿರಿಯೆ ಮಗ್‌ರುವೆ, ಬಾಲೆ ಮದಿಪುವೆಯೇ ಅಪ್ಪೆರೇ ತರೆ ಉಡೆವೊಂದು ಬರೊಡೇ ಯಾನ್, ಬೆರಿ ಉಡೆವೊಂಜು ಬರೊಡೇ ಬಂಜಿ ಉಡೆವೊಂದು ಬರ್ಪಿನೇ ಪನ್ದ್ ಕೇನ್ನಗ, ತರೆ ಉಡೆವೊಂದು ಬತ್ತಡ ಮಗ ನಿನನ್ ತರೆಟ್ ಪುಟಿನಾಯೆ ತಮ್ಮಲೇಂದ್ ಪನುವೆರೊ, ಬೆರಿ ಉಡೆವೊಂದು ಬತ್ತಡ ಮಗ ನಿನನ್ ಬೆರಿಟ್ ಪುಟಿನಾಯೆ ಮೆಗ್ಗೇಂದ್ ಪನುವೆರೊ, ಬಂಜಿ ವುಡೆವೊಂದು ಬತ್ತಂಡ ಅಪ್ಪೆನ್ ಕೆರಿನಾಯೆ ಕೆಂಗುಡೆ ಪನುವೆರೊ, ಎನ್ನ ಬಂಜಿಡ್ ಬಲತಿ ಮಗೆ ಆಂಡ ಈ ಬರ್ಪಿನ ಕಿಲರ ಉಂಡು ಅಲ್ಪನೇ ಬಲ ಪನ್ದ್ ದೆಯ್ಯಾರು ಪನ್ಡೊಲುಯೇ, ಪಂಡಿ ನಾಲಯಿ ದೊಂಡೆಡ್ ಆವೊಂಡ ಮೆತ್ತ್ಂಡ್ ಮೈಬೇನೆ ಅಂಗದಡಿ ಗುಮಲುಂಡು, ತರೆಕೊಡಿ ದಂಗ್ಂಡ್, ಮಿರೆಕೊಡಿ ಮಾಸ್ಂಡ್, ಉಡೊ ಉಡೊ ಬೇನೆ ಎರ್ಕ್ಂಡ್, ಬಾಲೆ ಪುಟ್ಯೆನೋ ದೆಯ್ಯಾರುಗು.. ಪುಟಿ ಬಾಲೆನ್ ತೂನಗ ತರೆಟ್ ಏಲ್ ನಿಲೆ ಸತ್ತಿಗೆ, ಮುಡುಂಬುಡು ಮೂಜಿ ನಿಲೆ ಸತ್ತಿಗೆ ತೋಜಿಂಡ್‌ಯೇ..
ಲಚ್ಚನ ಕೂಡುಂಡ್, ಪುಟಿ ಪುಲೊಟು ಪುಲೋ ಪುಲ ಪೂಜಿಯೆರ್, ಪೂವೊಲು ಬಂದಿಯೇರ್, ಮೂಜೆಡ್ ಮುಚ್ಚಲಮೆ, ಏಲೆಡ್ ಏಲನಮೆ ಪತ್ತ್ ಪದಿಮಾಜೆಟ್ಟ್ ಪೆರಿಯಮೆ ದಾಂಟ್‌ನಗ ಒಂಜೇ ಬಾಲೆಗ್ ಮೂಜಿ ಪುದರ್ ದೀವೊಡುಂದು ಪನ್ಡೆರ್ಯೇ, ಬಾನೊಗು ಬಲುವಾಯಿ ಬಾಮುಲ್ಲ ಕುಮಾರೇ, ಬೂಮಿಗ್ ಮೆದುವಾಯಿ ಕುಮಾರೆ, ಬಿತ್ತಿನ ಬೀರೆಂದ್ ಪನ್ಡೆರ್ಯೇ..
ಬಾಲೆ ಪುಟ್ಟಿನ ಗಲಿಗೆಡ್ ಅಸ್ತ್ರ ಅಂಗನೊಕು ಕೂಟ ಏರ್ದ್ ಕೂಟೊಗು ಪೋಪೆಂದ್ ಪನ್ಡೆರ್ಯೇ ಏಕಸಾಲೆರ್. ಈರ್ ಕೂಟೊಗು ಪೋಪರ್‌ಡ ಯಾನ್‌ಲಾ ಬರ್ಪೇಂದ್ ಪಂಡೆರ್‌ಯೇ ದೆಯ್ಯಾರು, ಆನ್ ಪೋಪುನ ಕೂಟೊಗು ಪೊಣ್ಣು ಪೊಂಜೋವು ಬರ್ರೆ ಬಲ್ಲಿ ಪೊಣ್ಣು ಪೋಪಿನ ಕೂಟೊಗು ಆನ್ ಅಂಜೋವು ಪೋರೆ ಬಲ್ಲಿ ಪನ್ದ್ ಪನ್ನಗ ಕೇನಂದೆ ಚದಿ ಕಟಿನ ದೆಯ್ಯಾರುನು ನಿನ ಕೊಂಡಾಟದ ಬಾಮುಲ್ಲ ಕುಮಾರನ ಏರೆ ಕೈತಲ್ ಮಲ್ಪುವ ಪನ್ದ್ ಕೇನ್ನಗ, ಎನ್ನ ತಿದ್ದಪ್ಪೆರ್ತ್ ತಿದ್ದಪ್ಪೆ ಗುಂಡದಪ್ಪೆ ಪೆರ್ಗಡ್ತಿನಲ್ಪ ಬುಡ್ಪೆ ಪನ್ದ್ ಪನ್ಪೆರ್‌ಯೇ. ಬಾಲೆನ್ ತಟೊಂದು ತನ್ನ ತಿದ್ದಪ್ಪೆದ ಕೊರ್ದು ಕೂಟೊಗು ಪಿದಡಿಯೊಲುಯೇ ದೆಯ್ಯಾರು.
ದೈಯಾರ್ ಸಾಲೆರ್ ಕೂಟೊಗು ಪೋನಗ, ಕೆಂಪುಗುಡ್ಡೆರ್ದ್ ಅಯ್ಯಬೆತ್ತು, ಅರಿಯ ಬೆತ್ತು, ಸುರಿಯ ಬೆತ್ತು ಪನ್ಪಿ ಜನ ಬತ್ತ್, ಏರ್‌ಯ ಕುಮಾರಾ ಚೆಂಡ್ ಗೊಬ್ಬುಗು ಕಂಜಿ ಮೇಪುಗು ಬರ್ಪನಾಂದ್ ಕೇನುವೆರ್‌ಯೇ. ಬರ್ಪೆಂದ್ ಪನ್ಪೆನೊ ಕುಮಾರೆ ಆಯೆ ಬಾಮುಲ್ಲ ಕುಮಾರೆ. ಗುಂಡದಪ್ಪೆ ಪನ್ನ ಕೇನಂದೆ ಕೊರಿನ ತಿನಂದೆ ಕೆಂಪುಲ ಗುಡ್ಡೆಗ್ ಕೆಮ್ಮಲ ಕರಿಯಗ್ ಚೆಂಡ್‌ದ ಗೊಬ್ಬುಗು ಕಂಜಿಲೆ ಮೇಪುಗು ಪೋಪೆನೊ ಕುಮಾರೆ.
ಮನ ಮಚ್ಚರ ಮಲ್ತೆರೊ ಕುಮಾರ‌ಗ್, ಮುತ್ತಿನ ಮುಲೆದಾರ ಚೆಂಡ್ ಮಲ್ತ್ ಅಂಚಿರ್ದ್ ಚೆಂಡ್ ಪಾರಾದ್, ರಸಮಂದ ಗುವೆಲ್‌ಗ್ ಚೆಂಡ್ ಪಾಡಿಯೆರ್‌ಯೇ. ಅಂದಾ ಕುಮಾರ ಒರಿ ಅಮ್ಮ ಸಾಪೊಕು ಪುಟಿನಾಯೆ ಮೂಜಿ ಪುದರ್‌ದಾಯೆ ಗುವೆಲ್‌ಗ್ ಜತ್ತ್ ಚೆಂಡ್ ದೆಪ್ಪೊಡು ಪನಿಯೆರೊ. ಸತ್ಯೆ ನಂಬಿನ ಕುಮಾರೆ ಗುವೆಲ್‌ಗ್ ಜಪ್ಪುಯೆಯೇ, ಆಯೆ ಬಾಮುಲ್ಲ ಕುಮಾರೆ. ಚೆಂಡ್‌ನ್ ದೆತ್ತೆ ಮಿತ್ತ್ ಪಾರಾಯೆ, ಮಿತ್ತ್ ಪಾರಾಯಿ ಚೆಂಡ್ ತಿರ್ತ್ ಬೂರೊರ್ದು ದುಂಬು ಕುಮಾಪನ ಮಿತ್ತ್ ಸಾರ ಪಡಿಕಲ್ಲ್ ಪಾಡಿಯೆರ್‌ಯೇ, ಅವೆತ ಮಿತ್ತ್ ಕೆಂಪು ಮಣ್ಣ್ ನೋತೆರ್ ಯೇ, ರನಗೋಲಿ ನಡಿಯೆರ್ ಯೇ..
ಇಂಚಿಗ್ ಕೂಟೊಗು ಪೋತಿನ ಏಕಸಾಲೆರ್ ದೆಯ್ಯಾರು ಪಿರ ಬರ್ಪೆರ್‌ಯೇ. ಪಂಡಿನ ಕೇನಂದೆ ಕೊರಿನ ತಿನಂದೆ ಕುಮಾರೆ ಕೆಂಪು ಗುಡ್ಡೆಗ್ ಚೆಂಡ್ ಗೊಬ್ಬರೆ ಪೋತೆ ಪನ್ದ್ ಗುಂಡದಪ್ಪೆ ಪನ್ಡೆರ್ಯೇ. ದೆಯ್ಯಾರ್ ಉಪ್ಪುರ್ಗೆದ ಮಿತ್ತ್ ಪೋದು ಕೆಂಪು ಗುಡ್ಡೆದ ಕೆಮ್ಮಲ ಕರಿಯಡ್ ಹಾಸಿಗಟ್ಟೆ ರನಗೋಲಿ ಮರ ತೋಜಿಂಡ್‌ಯೇ.. ಸಿರಿಗಿಂಡೆಡ್ ನೀರ್ ಪತ್ತಿಯೆರ್‌ಯೇ, ಕಡೀರ ಕೊಲು ನಾಗದರ್ಬೆ ಪತ್ತಿಯೆರ್ ದೆಯ್ಯಾರು ರನಗೋಲಿದಡೆ ಪೋಯೆರ್ ಕಡೀರ ಕಡ್ಡಿನ್ ನಾಗ ದರ್ಬೆನ್ ಊರಿಯೆರ್. ಎನ ಬಾಲೆ ಕುಮಾರೆ ಅಂದಾಂಡ ಪುಂಟಿ ಪೇರ್ ಕುಮಾರ ಬಾಯಿಗ್ ಬೂರೊದುಂಡು, ಸೂಜಿದಾತ್ ತೋರೊಡು ಎಡ್ಮೆಡ್ ಏಲ್ ಬಾಗದಾತ್ ಮಲ್ಲ ಪನಿ ಕುಮಾರ ಬಾಯಿಗ್ ಬೂರ್ನಗ ಏರ್ ಆನೆದ ಸತುಟು ಸಾರ ಕಲ್ಲಪಡಿ ಸಾರ ಮುಲ್ಲಪಡಿ ನೂಕುದು ಮಿತ್ತ್ ಬತ್ತೆ ದೈಯಾರುನ ಜಕ್ಕೆಲ್‌ಡ್ ಕುಲ್ಲುವೆ ಕುಮಾರೆ. ಆತನೋಂಜಿ ಸಮಯೊಡು ಮಾರಿಡ್ ಮಾಂಕಲಬ್ಬೆ ಆಯನೊಗು ಪೋವೊಡು, ಎಂಕೊಂಜಿ ಬಿರು ಬೋಡುಂಡು ಕೇಮಲ ಕೆತ್ರರೋಡಿ ಕೆಮ್ಮಲತ ಮಲೆತ ಸಿರಿಪೊನ್ನೆ ಮರತ ಬಿರು ಮಲ್ಪುವೆಯೇ. ಅಪ್ಪೆ ಅಮ್ಮೆ ಉಲಯಿಡ್ ದೇವೆರೆ ಬಲಿ ಬನ್ನಗ ಕುಮಾರೆ ಅಂಗನೊಡು ಬಲಿ ಬರ್ಪೆಯೇ. ದೇವೆರೆ ಸಾಪೊತ ಸಾರ ಸರ್ಮಿಜ ಪಕ್ಕಿಲೆನ್ ತೂಯಿನ ಕುಮಾರೆ ಒಂಜಿ ಕೋಲು ಬಿರು ಬುಡ್ದ್, ಒಂಜಿ ಪಕ್ಕಿದ ರೆಂಕೆ ಪೊಲ್ಪುವೆ. ಪಕ್ಕಿಲು ಪೋದು ಅಬ್ಬೆಡ್ ಒಯಿಲ್ ಕೊರ್ನಗ, ಎನ್ನ ಪಕ್ಕಿಲೆನ್ ಜೈತಿನ ಬಂಟನ್ ಗಟ್ಟಡ್ ಉಪ್ಪರೆ ಬುಡಯೆ ಏಲ್ ಮಲೆ ಗಟ್ಟ ಬಲಿ ಕುಮಾರನ್ ಪತ್ತಾದೆರ್‌ಯೇ. ಒಲ್ಪೊರ್ದು ಗಟ್ಟ ಜಪ್ಪುನುಂದು ತೂನಗ ಕುಕ್ಕೆ ತೋಜುಂಡುಯೇ, ಕುಕ್ಕೆಡ್ ಗಟ್ಟ ಜತ್ತೊಂದು ಬನ್ನಗ ಸುಬ್ರಾಯ ದೇವೆರ್, ನರಮಾನಿಡಾ ಬೂತೊಲೆಡಾ ಅಡ್ಯನದ ಕೋಟೆ ಕಟ್ಟ್‌ದೆರ್, ಅಗ್ಗಿ ಎರಿ ಲಕ್ಕಾದೆರ್. ಅವೆನ್ ತೂಯಿನ ಕುಮಾರೆ ಪಜ್ಜಿ ತಾರಿದ ಸಿರಿಒಲಿ ಕಡ್ತೆ, ಎಡ ಬಲ ಬೀಜೊಂದು ಬತ್ತೆ ಅಪಗ ತರೆ ಪೋಯಿ ಬೂತೊಲೆಗ್ ತರೆ ಪೇಂಡು, ಕೀರ್ ಪೋಯಿ ಬೂತೊಲೆಗ್ ಕಾರ್ ಪೋಂಡು, ಕೈ ಪೋಯಿ ಬೂತೊಲೆಗ್ ಕೈ ಪೋಂಡು. ಒಂಜಿ ಬೂತ ಒರಿಂಡ್‌ಯೇ, ಕನ್ನೇವು ರೆಕ್ಕೆಸಿರಿ. ಉಂದೆನ್ ತೂಯಿ ಸುಬ್ರಾಯ ದೇವೆರ್, ಏರ್ ಯೀ, ಎನ ಎಡತ್ ಪೋತಿ ತುದೆನ್ ಬಲಕ್ ತಿರ್ಗಾಯಡ ನನ ದುಂಬಗ್ ಕುಮಾರೆ ಬೆರ್ಮೆ ಈ, ನಾಗೆ ಯಾನ್ ಪನ್ನಗ, ಎಡತ್ ಪೋತಿನ ತುದೆನ್ ಕುಮಾರೆ ಬಲಕ್ ತಿರ್ಗಾಯೆ. ತುದೆತ ಪುದರ್ ಕವೆಲೆ ಕುಮಾರ ತುದೆನ್ದ್ ಪುದಾರ್ ಲೆತ್ತೆನೊ ಕುಕ್ಕೆದ ತಲೊಟು. ಕುಮಾರೆ ಬೆರ್ಮೆ ಆದ್ ನಾಗ ದೇವೆರ್ ಸೇರ್ದ್ ನಾಗಬೆರ್ಮೆ ಆಯೆರೊ.
ಕಾಲ ಕರಿಂಡ್ ಕುಮಾರ ತುದೆಟ್ ಗಂಗೆ ತೀರ್ತೊ ಮೀಯೊಡುಂಡು ಕೆಮಲೆ ಕೆತ್ರೋಡಿ ಕೆಮ್ಮಲೆತ ಮಲೆರ್ದ್ ನಲ್ವೆರ್ ಕಿರಮಿಲು ಬಂಗಾರ್ದ ಕಲಸ ಬೊಲ್ಲಿದ ಹರಿಯಾನ ಕೊಂಡುದು ಕುಕ್ಕೆಗ್ ಬರ್ಪೆರೊ, ತೀರ್ತ ಮೀಯರೆ ಬತ್ತಿನಕುಲು ಅಲ್ಪ ದೀಪೆರ್ ಒರ ಕಂಟೇಲ್ ಮುರ್ಕುದು ಲಕ್ಕುನಗ ಬಂಗಾರ್ದ ಕಲಸ ಬೊಲ್ಲಿದ ಹರಿಯಾನ ಮಾಯ ಆಂಡೊ, ಉಂದು ದಾದ ಸೋಜಿಗ ಎಂಕಲೆ ಕಲಸ ಎಂಕಲೆ ಅರಿಯಾನ ಎಂಕಲೆಗ್ ತಿಕ್ಕ್ಂಡ ನಾಗಬೆರ್ಮೆರೆನ್ ಎಂಕುಲು ಕೆಮ್ಮಲೆತ ಮಲೆಟ್ ನಂಬುವ ಪನ್ದ್ ಮಗತ್ ಒರ ಮುರ್ಕುನಗ ಬಂಗಾರ್ದ ಕಲಸ ಬೊಲ್ಲಿದ ಅರಿಯಾನ ತೋಜಿಂಡ್. ಕುಕ್ಕೆಡ್ ನೀರ ಮಣ್ಣ ಮುದ್ದೆ ಮಲ್ತೆರ್ ನಾಲ್ವೆರ್ ಕೇಮ ಕೆತ್ರೋಡೆದ ಕೆಮ್ಮಲತ ಮಲೆಕ್ ಪೋಪೆರ್, ಸಿರಿ ಪೊನ್ನೆ ಮರತ ಮುದೆಲ್‌ಡ್ ಅಡಿ ಪಂಚಾಂಗ ಕಟ್ಟುವೆರ್ ಮೇಲ್ ಗ್ ಮೇಲ್ಪು ಬೇಪೆರ್. ನಾಗಬೆರ್ಮನ್ ನಂಬಿಯೆರ್.
ಮೂಲೊ : ಕೋಟಿ ಚೆನ್ನಯ ಪಾರ್ದನ ಸಂಪುಟ
ದಾಮೋದರ ಕಲ್ಮಾಡಿ ಸಂಪೊಲ್ತ