Last updated on August 12th, 2023 at 08:31 pm
ತುಳುನಾಡ್‌ಡ್ ಆಟಿ ತಿಂಗೊಲುಡು ಮಾತ್ರ ಕುಲೆ ಮದಿಮೆ ನಡಪುಂಡು. ಅಂಚಿನ ಒಂಜಿ ಮದಿಮೆ ಬಂಟ್ವಾಳಡ್ ನಡತ್ಂಡ್.
ಬಂಟ್ವಾಳ ತಾಲೂಕುದ ವಗ್ಗ ಪನ್ಪಿನಲ್ಪದ ಸಂಜೀವ ಪೂಜಾರಿ ಮೆರೆನ ಮಗಲ್ ವಿಶಾಲಾಕ್ಷಿ ಸುಮಾರ್ 35 ವರ್ಸದ ದುಂಬು ರಡ್ಡ್ ವರ್ಸದ ಬಾಲೆ ಆದಿಪ್ಪುನಗ ತೀರ್‌ದ್ ಪೋದಿತ್ತೆರ್. ಮೊಕುಲು ಕೇನ್‌ದ್ ತೂನಗ ವಿಶಾಲಾಕ್ಷಿ ಮೆರೆಗ್ ಮದಿಮೆ ಮಲ್ಪೊಡು ಪನ್ದ್ ತೋಜಿದ್ ಬೈದಿತ್ತ್ಂಡ್. ಅಂಚ ಮೊಕುಲು ಪೊದು ಸಂಬಂದೊ ನಾಡೊಂದಿತ್ತೆರ್.
ಉಳ್ಳಾಲದ ಕೊಣಾಜೆದಲ್ಪದ ಬೊಲ್ಮ ಗ್ರಾಮದ ಲಕ್ಷ್ಮಣ ಪೂಜಾರಿ ಪನ್ಪಿನರೆನ ಮಗೆ ಧರಣೀಶ್ ಪನ್ಪಿನಾರ್ ರಡ್ಡ್ ವರ್ಸದ ದುಂಬು ತಿಗಲೆದ ಸೀಕ್‌ಡ್ ತೀರ್‌ದಿತ್ತೆರ್. ಧರಣೀಶೆರೆಗ್ ಮದಿಮೆ ಆವೊಡು ಪನ್ದ್ ಆಸೆ ಇತ್ತ್ಂಡ್. ಅಂಚ ರಡ್ಡ್ ಕುಟುಮೊದಲಾ ಬರಿ ಬಂದ್ರ ಕೂಡ್ದ್ ಬತ್ತಿನೆರ್ದಾವರ ಮೊಕಲೆಗ್ ಮದಿಮೆ ನಿಗಂಟ್ ಮಲ್ತ್ ಆಟಿಡ್ ಮದಿಮೆ ಮಲ್ತೆರ್.
ಸೈತಿನಕುಲು ಮದಿಮೆದ ಪ್ರಾಯೊಗು ಬನ್ನಗ ತನ್ಕುಲೆಗ್ ಮದಿಮೆದ ಆಸೆ ಉಂಡು ಪನ್ದ್ ಒವ್ವಾಂಡಲ ಉಪದ್ರ ಮಲ್ತ್ ತೋಜಾವೆರ್ ಪನ್ಪಿನವು ನಮ್ಮ ತುಳುವೆರೆ ನಂಬೊಲಿಗೆ. ಅಂಚ ಅಕಲೆಗ್ ಕೂಡುನ ಸೈತಿನ ಆನ್ ಇಜಿಂಡ ಪೊಣ್ಣನ ಪೊದು ನಾಡ್‌ಡ್ ಮದಿಮೆ ಮಲ್ಪುನ ಕ್ರಮ. ಆ ಮದಿಮೆ ಡ್ಲಾ ದಿಬ್ಬನ ಬರ್ರೆ ಉಂಡು, ಆನ್ ಪೊಣ್ಣನ ಪಾಪೆ ಮಲ್ತ್ ಅವೆಕ್ ಐತ ಮಲ್ತ್ ಮದಿಮೆದ ಕಟ್ಟ್ ಕರಿಪುವೆರ್. ಮದಿಮೆ ಆಯಿಬೊಕ್ಕ ವನಸ್‌ಲಾ ಉಂಡು. ಉಂದು ಆಟಿಡ್ ರಾತ್ರೆಡ್ ನಡಪುಂಡು. ಮದಿಮೆ ಆಯಿಬೊಕ್ಕ ಮೊಕುಲು ಉಪದ್ರ ಕೊರೊಂದಿತ್ತೆರ್ಡ ಅವ್ ಪೋಪುಂಡು ಪನ್ಪಿನ ನಂಬೊಲಿಗೆ.