Last updated on September 17th, 2023 at 05:35 pm
ಕುಂದಾಪುರದ ಪೊಸಂಗಡಿದ ಕೈತಲ್ ಎಡಮೊಗೆ, ಉಳ್ಳೂರು, ಕಾರೂರು, ಆಲೂರು, ಪೊಸಬಾಳು, ರಟ್ಟಾಡಿ ಬೊಕ್ಕ ಅಮಾಸೆಬೈಲ್ ಡ್ ಬೆಳಾರೆ ಬುಡಕಟ್ಟ್ ಸಮುದಾಯದಕುಲು ಉಲ್ಲೆರ್. ಮೊಕುಲು ಅಕಲ್ನವೇ ಆಯಿನ ತುಳು ಬಾಸೆದ ಒಂಜಿ ಎಗ್ಗೆ ಬೆಳಾರೆ ಬಾಸೆನ್ ಪಾತೆರೊಂದಿತ್ತೆರ್. ಬೆಳಾರೆ ಸಮುದಾಯದ ಪಿರಾಕ್ದಕುಲು ಬೆಳಾರೆ ಬಾಸೆನ್ ಪಾತೆರೊಂದಿತ್ತೆರ್, ಆಂಡ ಇತ್ತೆದಕುಲು ಮಾತೆರ್ಲಾ ಬೆಳಾರೆ ಬುಡ್ದ್ ಕುಂದಾಪುರ ಕನ್ನಡೊನು ಪಾತೆರುವೆರ್.
ಬೆಳಾರೆ ಬಾಸೆ ತೆರಿದಿತ್ತಿನ ಪೆರಿಯ ವ್ಯಕ್ತಿ ಸಿದ್ದ ಬೆಳಾರ ಮೇರ್ ಇಂಚೊಗು ತೀರಿಯೆರ್. ಮೆರೆಗ್ ಒರಿಯಗ್ ಮಾತ್ರ ಆ ಅಳಿದ್ ಪೋತಿನ ಬಾಸೆ ತೆರಿದಿತ್ತ್ಂಡ್. ಆಂಡ ಮೇರ್ ತೀರಿನೇ ಇತ್ತೆ ಆ ಬಾಸೆ ನಮ್ಮ ನಡುರ್ದ್ ಅಳಿದ್ ಪೋಂಡು ಪನ್ಪಿನವು ಬಾರೀ ದುಕ್ಕೊದ ಸಂಗತಿ.
ಬೆಳಾರೆ ಬಾಸೆದ ದಾಖಲೀಕರಣ ಆತ್ಂಡಲಾ, ಅವೆನ್ ಪಾತೆರುನಕುಲು ಏರ್ಲಾ ಇಜ್ಜೆರ್. ಸಂಶೋಧಕೆರ್ ಬೆಳಾರೆನ್ ತುಳುತವೇ ಒಂಜಿ ಎಗ್ಗೆ, ತುಳುಕು ಕೈತಲ್ ಇತ್ತಿನ ಬಾಸೆ ಪನ್ದ್ ಪನ್ತೆರ್. ಬೆಳಾರೆ ಸಮುದಾಯದಕಲೆನ ಜನಸಂಖ್ಯೆಲಾ ಕಮ್ಮಿ. ಸುಮಾರ್ 500ದಾತ್ ಮಾತ್ರ ಉಪ್ಪುನು.
ಮಲ್ಲ ಬಾಸೆಲೆನ ಅರಬಾಟೊಡು ಎಲ್ಲ ಎಲ್ಲ ಬಾಸೆಲು ಎಂಚ ಮದೆ ಸೇರುವ ಪನ್ಪಿನೆಕ್ಕ್ ಉಂದು ಮಲ್ಲ ಉದಾರ್ಮೆ. ಕರ್ನಾಟಕ ಸರಕಾರ ಬೇತೆ ಒವ್ವೇ ಬಾಸೆಲೆನ್ ಒರಿಪಾವರೆ ಒವ್ವೇ ದಡೀತ ಕ್ರಮ ದೆತೊನೊಂದಿಜ್ಜಿ. ಬೆಳಾರೆ, ಕೊರಗದಂಚಿನ ತುಳುತ ಒಪ್ಪ ಪುಟ್ಟಿನ ಬಾಸೆಲು ಸಯ್ಯೊಂದುಲ್ಲ. ನನ ಒಂತೆ ಸಮಯೊಡ್ ಕೊರಗ ಬಾಸೆಲಾ ಅಳಿದ್ ಪೋವು. ಅವೆರ್ದ್ ಬೊಕ್ಕ ತುಳುಲಾ ಪೋವು, ಉಂದು ನಮ್ಮ ಕಾಲಘಟ್ಟೊಡು ಆವೊಂದಿಪ್ಪುನವು ನಮ್ಮ ದುರಾದೃಷ್ಟ.
ಬೆಳಾರೆ ಬಾಸೆ ನನ ನೆಂಪು ಮಾತ್ರ. ಕೊಡವ ಬೊಕ್ಕ ಕೊರಗ ಬಾಸೆ ಅಳಿಯುನ ಬಾಸೆಲು ಪನ್ದ್ ಯುನೆಸ್ಕೋ ಪನ್ತ್ಂಡ್. ತುಳು ಬಾಸೆ ಅಳಿದ್ ಪೋಪಿನ ಸಾಧ್ಯತೆ ಉಪ್ಪುನ ಬಾಸೆ ಪನ್ದ್ಲಾ ಪನ್ತ್ಂಡ್. ಈತ್ ಪೂರಾ ಇತ್ತ್ಲಾ ನನಲ ಸರಕಾರ ಈ ಬಾಸೆಲೆನ್ ಒರಿಪಾವರೆ ಒವ್ಲೇ ಮಾನಾದಿಗೆ ಕೊರಂದಿನವು, ಕರ್ನಾಟಕ ಸರಕಾರದ ಭಾಷಾ ನೀತಿಡ್ ಉಪ್ಪುನ ತೆಟ್ಟ್ನ್ ತೂಪಾವುಂಡು.