Last updated on September 12th, 2023 at 04:35 pm
ಉಳ್ಳಾಲ ತಾಲೂಕ್‌ದ ಕೊಂಡಾಣ ಮಿತ್ರನಗರೊದ ನಿವಾಸಿ ಒರಿ ಬಂಟ್ವಾಳದ ತನ್ನ ಬೊಡೆದಿನ ಇಲ್ಲಡ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತೊಂದೆರ್. ಕಡತ ಒಯ್ಲ್‌ಡಿತ್ತಿನಾರೆನ ಸಾವುಗು ಬೆಟ್ಟಿಂಗ್ ಬಲೆನೇ ನೆವನ ಪಂದ್ ಕೇಂದ್ ಬರೊಂದುಂಡು.
ಕೋಟೆಕಾರ್ ಪೇಂಟೆ ಪಂಚಾಯತ್‌ ಸೀಮೆದ ಕೊಂಡಾಣ, ಮಿತ್ರನಗರ ನಿವಾಸಿ ರವೀಂದ್ರೆ(35) ಆತ್ಮಹತ್ಯೆ ಮಲ್ತೊಂದಿನಾರ್. ರವೀಂದ್ರೆರ್ ಐತಾರ ಬಂಟ್ವಾಳ ತಾಲೂಕ್‌ದ ಕಳ್ಳಿಗೆ ಗ್ರಾಮೊದ ಪಚ್ಚಿನಡ್ಕದ ಬೊಡೆದಿನ ಇಲ್ಲಗ್ ಪೋದು ಮಧ್ಯಾಹ್ನ 12 ಗಂಟೆಗ್ ತನ್ನ ಬೊಡೆದಿ ಬೊಕ್ಕ ಆಣ್ ಬಾಲೆನ್ ಬಿನ್ನೆರೆ ಲೇಸ್‌ಡ್ ಬುಡ್ದ್ ಪಿರ ಬೊಡೆದಿನ ಇಲ್ಲಡೆ ಬತ್ತಿತಾತೆರ್‌ಗೆ. ಬಯ್ಯಡ್ ಬೊಡೆದಿ ಆರೆನ ಮೊಬೈಲ್‌ಗ್ ಕಾಲ್ ಮನ್ಪುನಗ ರವೀಂದ್ರೆರ್ ಕಾಲ್ ದೆಪ್ಪಂದಿನೆರ್ದಾವರ ಬರಿತಿಲ್ಲದಕ್ಲೆಗ್ ಕಾಲ್ ಮಲ್ತ್ ತೆರಿಪಾದೆರ್.
ಅಕುಲು ಅಡೆ ಪೋದು ತೂನಗ ರವೀಂದ್ರೆರ್ ಇಲ್ಲಡ್ ಚಾವಡಿದ ಪಕ್ಕಾಸ್‌ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ವಿಚಾರ ಗೊತ್ತಾತ್ಂಡ್. ಬಂಟ್ವಾಳ ಪೊಲೀಸೆರ್ ಪುನೊನು ಮರಣೋತ್ತರ ಪರೀಕ್ಷೆ ಮನ್ಪಾದ್ ಪ್ರಕರಣ ದಾಕಲ್ತೊಂದೆರ್. ಕೋಡೆ ಕೊಂಡಾಣ, ಮಿತ್ರನಗರೊಡು ರವೀಂದ್ರೆರೆನ ಅಂತ್ಯ ಸಂಸ್ಕಾರ ನಡತ್ಂಡ್.
ರವೀಂದ್ರೆ ಕ್ರಿಕೆಟ್ ಬೆಟ್ಟಿಂಗ್‌ಗ್ ಸಕ್ರಿಯೆರಾದಿತ್ತ್‌ದ್
ಕಡತ ಒಯ್ಲ್‌ಡಿತ್ತೆರ್ ಪಂದ್ ಆರೆನ ಪಾಸಾಡಿಲು ಪನೊಂದುಲ್ಲೆರ್. ಬೆಟ್ಟಿಂಗ್ ಬಲೆತ ಬುಕ್ಕಿಲೆನ ಉಪದ್ರೊರ್ದಾವರ
ಆರ್ ಬೊಡೆದಿ ಬೊಕ್ಕ ನಾಲ್ ವರ್ಸ ಪ್ರಾಯೊದ ಬಾಲೆನ್ ಪರಕ್ಕೊಲಿ ಮಲ್ತ್ ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ಪಾಸಾಡಿಲು ಪಂಡೆರ್.