ಕುಡ್ಲ: ಕರೆಂಟ್ ಕಂಬೊಗು ಎಡ್ತಿನ ರಿಕ್ಷಾ; ಮದಿಮೆ ನಿಗಂಟ್ ಆದಿತ್ತಿನ ಪೊಣ್ಣು ಸಾವು

Last updated on September 18th, 2023 at 07:03 pm

ಕುಡ್ಲ: ಆಟೋ ರಿಕ್ಷಾ ಒಂಜಿ ಜಪ್ಪಂಗೆಲ್‌ ಸಾದಿಡ್ ಅಂಕೆ ತತ್ತ್‌ದ್ ಸಾದಿ ಬರಿತ ಕರೆಂಟ್ ಕಂಬೊಗು ಎಡ್ತಿನೆರ್ದಾವರ ಜವನ್ದಿ ಒರ್ತಿ ಅಲ್ಪನೇ ತೀರ್ದ್, ಐನ್ ಜನಕ್ ಗಡಿಕುಲಾತಿನ ನಡಕೆ ಬಜ್ಪೆ ಸ್ಟೇಶನ್ ಸೀಮೆದ ಗುರುಪುರದಲ್ಪ ನಡತ್‌ದ್ಂಡ್.

ಅರ್ಕುಳ ತುಪ್ಪೆಕಲ್ಲ್‌ದ ಒಂಜಿ ಇಲ್ಲದಕುಲು ದೇವಲ್ಯೊಗು ಪೋದು ರಿಕ್ಷಾಡ್ ಪಿರ ಬರೊಂದುಪ್ಪುನಗ ಬಂಗ್ಲೆಗುಡ್ಡೆದಲ್ಪ ಈ ಎಡ್ತೆ ನಡತ್‌ದ್ಂಡ್. ತೀರ್ದಿನ ಜವನ್ದಿ ತುಪ್ಪೆಕಲ್ಲ್ ನಿವಾಸಿ ಪ್ರೀತಿ ಸಪಲಿಗ(25) ಪಂದ್ ತೆರಿದ್ ಬೈದ್ಂಡ್. ಪೆಟ್ಟಾತಿನಕುಲು, ಪೊಣ್ಣನ ಅಪ್ಪೆ ಮೀನಾಕ್ಷಿ(55), ಸಂಗಡಿ ಸ್ವಾತಿ (23), ಅತ್ತಿಗೆ ಶೋಭಾ (37), ಬಾಲೆ ಭವಿಷ್ (09) ಬೊಕ್ಕ ಡ್ರೈವರ್ ಪದ್ಮನಾಭ್ ಪಂದ್ ತೆರಿದ್‌ಬೈದ್ಂಡ್.

ತೀರ್ದಿನ ಪೊಣ್ಣು ಪ್ರೀತಿಗ್ ಒಂತೆ ತಿಂಗೊಲು ದುಂಬು ಮದಿಮೆ ನಿಗಂಟ್ ಆದಿತ್ತ್ಂಡ್, ಬರ್ಪಿನ ಜನವರಿಡ್ ಮದಿಮೆ ನಡಪುನ ಅಟ್ಟನೆಡ್ ಇತ್ತ್ಂಡ್. ಪೆಟ್ಟಾತಿನಕಲೆನ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ಸೆರಾದೆರ್. ಬಜ್ಪೆ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.