Last updated on October 19th, 2023 at 10:20 am
ಕುಡ್ಲ: ಪೇಂಟೆದ ಲೇಡಿಹಿಲ್‌ದಲ್ಪ ಫುಟ್ಪಾತ್ಡ್ ನಡತೊಂದು ಪೋವೊಂದಿತ್ತಿನ ಐನ್ ಜನಕ್ ಕಾರ್ ಎಡ್ತ್‌ದ್ ಒರ್ತಿ ಜವನ್ದಿ ಸೈದಿನ ಭೀಕರ ನಡಕೆ ಬುಧವಾರ (ಅ18) ಬಯ್ಯ 4 ಗಂಟೆದ ಅಂದಾಜಿಗ್ ನಡತ್‌ದ್ಂಡ್.
ಎಡ್ತೆಡ್ ರೂಪಶ್ರೀ (23) ಪನ್ಪಿನಾರ್ ಅಲ್ಪನೇ ಉಸುಲು ಬುಡ್ತೆರ್. ತೊರತ್ತಲ್‌ದ ಕಾನ, ಬಾಳದ ಗಂಗಾಧರ್ ಪನ್ಪಿನಾರೆನ ಮಗಲ್ ರೂಪಶ್ರೀ ಕುದ್ರೋಳಿ ದೇವಲ್ಯೊಗು ಪೋದು ಪಿರ ಪೋವೊಂದಿತ್ತೆರ್ ಪಂದ್ ತೆರಿದ್‌ಬೈದ್ಂಡ್.
ಸ್ವಾತಿ (26), ಹಿತ್ನವಿ (16), ಕೃತಿಕಾ(16) ಬೊಕ್ಕ ಯತಿಕಾ(12) ಸಾದಿಗ್ ರಟ್ಟಿನೆರ್ದಾವರ ಅಕಲೆಗ್ ಗಾತಿದ ಗಡಿಕುಲಾದ್ ಆಸ್ಪತ್ರೆಗ್ ಸೇರಾದ್ಂಡ್.
5 ಜನ ಪೊಂಜೋಕುಲು ಕುಡ್ಲ ಕಾರ್ಪೋರೇಷನ್ ಸ್ವಿಮ್ಮಿಂಗ್ ಪೂಲ್‌ದಲ್ಪ ಲೇಡಿಹಿಲ್‌ರ್ದ್ ಮಣ್ಣಗುಡ್ಡೆ ಜಂಕ್ಷನ್‌ದಂಚಿ ಫುಟ್ಪಾತ್ಡ್ ನಡತೊಂದು ಪೋವೊಂದಿತ್ತೆರ್. ಅವೇ ಪೊರ್ತುಡು ಮಣ್ಣಗುಡ್ಡೆ ಜಂಕ್ಷನ್‌ರ್ದ್ ಲೇಡಿಹಿಲ್‌ದಂಚಿಗ್ ನಾಮಾಸ್‌ಡ್ ಬಾರೀ ಬರಸ್‌ಡ್ ಬತ್ತಿನ ಕಾರ್ ಐನ್ ಜನೊಕ್ಲಾ ಎಡ್ತ್‌ದ್ಂಡ್.
ಕಾರ್ ಡ್ರೈವರ್ ಕಮಲೇಶ್ ಬಲದೇವ್ ಪನ್ಪಿನಾಯೆ ಕಾರ್ ಎಡ್ತಿನೇ ಅಲ್ಪರ್ದ್ ಪದ್ರಾಡಾದಿತ್ತೆ. ಬೊಕ್ಕ ಶೋರೂಮ್‌ದ ಎದುರು ಎಡ್ತೆಗ್ ನೆವನ ಆಯಿನ ಕಾರ್‌ನ್ ಉಂತದ್ ಇಲ್ಲಗ್ ಪೋದು ಟ್ರಾಫಿಕ್ ವೆಸ್ಟ್ ಪೊಲೀಸೆರೆಗ್ ಶರಣಾತೆ. ಫುಟ್‌ಪಾತ್‌‌ದ ಮಿತ್ತ್ ಕಾರ್ ಬರ್ತದ್ ಎಡ್ತೆಗ್ ನೆವನ ಆತೆ. ಎಡ್ತೆದ ಅಲ್ಕ್‌ದ್ ಬೂರುನಂಚಿನ ದೃಶ್ಯೊಲು ಸಿಸಿಟಿವಿ ಕ್ಯಾಮರಾಡ್ ಕೈದಾತ.