Last updated on October 13th, 2023 at 01:32 pm
ಬೆಂಗ್ಳೂರ್: ಕಾಂಗ್ರೆಸ್ ಮಾಜಿ ಕಾರ್ಪೋರೇಟರ್‌ ಅಶ್ವತಮ್ಮನ ಮೆಗ್ಯೆ ಬೊಕ್ಕ ಗುತ್ತಿಗೆದಾರ ಅಂಬಿಕಾಪತಿನ ಮೈತ್‌ನೆ ಪ್ರದೀಪ್ ಪನ್ಪಿನಾಯನ ಇಲ್ಲಗ್ ಐಟಿ ದಾಳಿ ನಡತ್‌ದ್, ಈ ಪೊರ್ತುಡು ಮಂಚಾವುದಡಿಟ್ ಸುಮಾರ್ 42 ಕೋಟಿ ಕಾಸ್ ತಿಕ್ಕ್‌ದ್ಂಡ್. ಫ್ಲಾಟ್‌ಡ್ 23 ಪೆಟ್ಯೆಲೆಡ್ 500ತ ಕಂತೆ ಕಂತೆ ನೋಟುಲು ತಿಕ್ಕ್‌ದ.
ಗುತ್ತಿಗೆದಾರೆ ಅಂಬಿಕಾಪತಿ ಮೆರೆನ ಬೊಡೆದಿ ಆದಿಪ್ಪುನ ಮಾಜಿ ಕಾರ್ಪೋರೇಟರ್‌ ಅಶ್ವತಮ್ಮ ಮೇರ್ ಮಾಜಿ ಶಾಸಕೆ ಅಖಂಡ ಶ್ರೀನಿವಾಸಮೂರ್ತಿನ ಬಿನ್ನೆದಿ ಪಂದ್ ಸುದ್ದಿ ಉಂಡು. ಅಶ್ವತಮ್ಮ 2001ತ ಕಾವಲ್ ಬೈರಸಂದ್ರ ವಾರ್ಡ್‌ದ ಕಾರ್ಪೊರೇಟರ್ ಆದಿತ್ತೆರ್. ಈ ಫ್ಲಾಟ್‌ನ್ ಅಶ್ವತಮ್ಮ ತನ್ನ ಮೆಗ್ಯೆ ಪ್ರದೀಪ್‌ಗ್ ಕೊರ್ಪಾದಿತ್ತೆರ್. ಅಂಬಿಕಾಪತಿ ಅಶ್ವತಮ್ಮ ದಂಪತಿಲೆಗ್ ಸೇರ್ದಿನ ಬೇತೆ ರಡ್ಡ್ ನಿವಾಸೊಲೆನ ಮಿತ್ತ್‌ಲಾ ದಾಳಿ ನಡತ್‌ದ್ಂಡ್.
ಐಟಿ ದಾಳಿ ಒಂತೆ ಕಡೆಸ್ಸ್ಂದುಂಡ ಈ ಕಾಸ್ ತಿಕ್ಕೆದ್‌ಜಿ. ಈ ಮಲ್ಲ ಆಮೌಂಟ್‌ನ್ ತಮಿಳ್‌ನಾಡಿಗೆ ಕೊನೊಯೆರ ಅಟ್ಟನೆ ಆದಿತ್ತ್ಂಡ್ ಪಂದ್ ತೆರಿದ್‌ಬೈದ್ಂಡ್.
42 ಕೋಟಿ ಕಾಸ್ ಸೀಜ್ ಮಲ್ತಿನ ಐಟಿ ಅಧಿಕಾರಿಲು, ಕಾಸ್‌ದ ದೃಶ್ಯೊನು ಚಿತ್ರೀಕರಣ ಮಲ್ದೆರ್. ಇಡಿ ಅಧಿಕಾರಿಲೆಗ್ಲಾ ಐಟಿ ಒಲವು ಕೊರ್ಯೆರ ಇತ್ತ್‌ದ್, PMLA ಅಡಿಟ್ ಪ್ರಕರಣ ದಾಕಲಾಪಿನ ಸಾಧ್ಯತೆ ಉಂಡು. ಈ ಪ್ರಕರಣೊಡು ಇ.ಡಿ ಪ್ರವೇಶ ಆಂಡ ಸಂಬಂಧಿತಿನ ಜನೊಕುಲು ಕೈದಾಪಿನ ಸಾಧ್ಯತೆ ಉಂಡು.