Last updated on October 2nd, 2023 at 07:43 pm
ಸಾನದ ಕೆಲಸ ಮಲ್ತೊಂದಿತ್ತಿನ ಪೊರ್ತುಡು ಒರಾನೆ ಒರಿಸ್ಸಾ ಮೂಲದ ಮುಸ್ಲಿಂ ಜವನಗ್ ದೈವ ಎಚ್ಚಿಡ್ ಬೈದಿನ ನಡಕೆ ಬೊಲ್ಪುಗು ಬೈದ್ಂಡ್. ಕುಡ್ಲ ದಲ್ಪದ ಪೆರ್ಮುದೆದ ಪಿಲಿ ಚೌಂಡಿ ಸಾನೊಡು ಪಾಗರ ಕಟ್ಟುನ ಪೊರ್ತುಡು ಒರಿಸ್ಸಾ ಮೂಲದ ಜವನನ ಮಿತ್ತ್ ದೈವ ಆವೇಶ ಬೈದ್ಂಡ್. ಪ್ರಶ್ನಾ ಚಿಂತನೆಡ್ ತೆರಿನಗ ಉಂದು ಜಿಲ್ಲೆದ ಪ್ರತಿಷ್ಟಿತ ಕಂಪನಿಯಾಯಿನ ಎಂ.ಆರ್.ಪಿ.ಎಲ್ ರ್ದ್ ಬೈದಿನ ಸಮಸ್ಯೆ ಪನ್ದ್ ತೆರಿದ್ ಬೈದ್ಂಡ್.
ಕರಿನ ಮುಪ್ಪ ವರ್ಸದ ಪಿರವು, ಪ್ರತಿಷ್ಠಿತ ಎಂ.ಆರ್,ಪಿ,ಎಲ್ ಕಂಪನಿಗಾದ್ ಜಾಗೆಲು ಭೂಸ್ವಾಧೀನ ಆದ್ ಆ ಪೊರ್ತುಡು ಅಲ್ಪ ಇತ್ತಿನ ಪಿಲಿ ಚೌಂಡಿ ದೈವಸ್ಥಾನ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನ ಪುನರ್ವಸತಿ ಪ್ರದೇಶ ಪನ್ಡ ಪೆರ್ಮುದೆ ಸೋಮನಾಥ ಧಾಮೊಗು ಸ್ಥಳಾಂತರ ಆದ್ ಕಾಲ ಕಾಲೊಗು ಧಾರ್ಮಿಕ ಕಜ್ಜೊಲು ನಡತೊಂದಿತ್ತ್ಂಡ್. ಪೆರ್ಮುದೆ ಗ್ರಾಮೊಗು ಸಂಬಂಧ ಇತ್ತಿನ ದೈವೊಲೆನ ನಾಲ್ ಗಡು ಉಂಡು, ಇತ್ತೆ ಕಾಯರ್ ಕಟ್ಟೆ ಪನ್ಪಿನವು ಕುತ್ತೆತ್ತೂರು ಗ್ರಾಮದ ಪೆರ್ಮುದೆ ಗಡುವಾದುಂಡು. ಈ ಗಡುವಾಡ್ ಜಾಗೆಡ್ ಆವೊಂದಿತ್ತಿನ ದೈವಾರಾಧನೆ ಪ್ರಕ್ರಿಯೆಲು ಕರಿನ 18 ವರ್ಸೊರ್ದು ಆವೊಂದಿಜ್ಜಿ. ಭೂಸ್ವಾಧೀನ ಆಯಿನೆರ್ದಾವರ ಅಂಚೆನೆ ಎಂ ಆರ್ ಪಿ ಎಲ್ ಗ್ ಕೈತಲ್ ಇತ್ತಿನೆರ್ದಾವರ ಮುಲ್ಪ ನೇಮ ಮಲ್ಪರೆ ಆವೊಂದಿತ್ತಿಜಿ.
ನೇಮ ಉಂತಿನೆರ್ದ್ ಬೊಕ್ಕದ ದಿನೊಟು ಗ್ರಾಮೊಡು ಅಂಚೆನೆ ಕಂಪನಿದಲ್ಪ ಅಪಗಪದ ದೋಷ ತೋಜಿದ್ ಬರೊಂದಿತ್ತ್ಂಡ್. ಪಿಲಿಚೌಂಡಿ ಸಾನದ ವರ್ಸಾದಿದ ನೇಮದಪಗ ಕಾಯರ್ ಕಟ್ಟೆ ಗಡು ಜಾಗೆಡ್ ಆವೊಂದಿತ್ತಿನ ಕಟ್ಟಲೆಲು ಅಂಚೆನೆ ದುಂಬರಿಂಡ ಮಾತ್ರ ದೋಷೊಲೆಗ್ ಪರಿಹಾರ ಪನ್ದ್ ದೈವದ ನುಡಿ ಆದಿತ್ತ್ಂಡ್. ಈ ನಡುಟು ಕರಿನ ರಡ್ಡ್ ತಿಂಗೊಲ್ದ ಪಿರವು ಪಿಲಿಚೌಂಡಿ ದೈವಸ್ಥಾನದ ಕೈತಲ್ ಪಾಗರ ಕಟ್ಟೊಂದಿತ್ತಿನ ಪೊರ್ತುಡು ಒರಿಸ್ಸಾ ಮೂಲದ ಮುಸ್ಲಿಂ ಆನಗ್ ದೈವ ಎಚ್ಚಿಡ್ ಬೈದ್ಂಡ್.
ಈ ಬಗೆಟ್ ಪೆರ್ಮುದೆ ಸೋಮನಾಥೇಶ್ವರ ದೇವಲ್ಯೊಡು ಪ್ರಶ್ನಾಚಿಂತನೆ ಮಲ್ಪನಗಲ ಎಂ ಆರ್ ಪಿ.ಎಲ್ ಕೈತಲ್ದ ಗಡುವಾಡ್ ನೇಮ ಉಂತುದಿನೆರ್ದೀವರನೇ ಇಂಚಿನ ಪೂರಾ ಆವೊಂದುಂಡು ಪನಿದ್ ತೋಜಿದ್ ಬೈದ್ಂಡ್.