Last updated on October 5th, 2023 at 07:38 pm
ಉಬಾರ್: ಜಾಗೆದ ಇಚಾರೊಡು ಒಂಜಿ ಕೂಟದಕುಲು ಅಂಗಡಿಗ್ ಪೊಗ್ಗುದು ನಾಲ್ವೆರೆನ ಮಿತ್ತ್ ಹಲ್ಲೆ ಮಲ್ತ್‌ದ್ ಗೂಂಡಾಗಿರಿ ಮಲ್ದಿನ ನಡಕೆ ಉಬಾರ್ ಪೇಂಟೆಡ್ ನಡತ್‌ದ್ಂಡ್.
ಹರೀಶ ನಾಯ್ಕೆ, ಸುದರ್ಶನ್ ಕುಮಾರ್, ರಮಾನಂದೆ, ಭರತ್ ಕುಮ್ಡೇಲ್ ಬೊಕ್ಕ ಕೂಟದಕುಲು ಹಲ್ಲೆ ಮಲ್ದೆರ್ ಪಂದ್ ಆರೋಪಿತ್‌ದೆರ್.
ಈ ಬಗೆಟ್ ಉಬಾರ್ ಪೊಲೀಸ್ ಸ್ಟೇಶನ್‌ಡ್ ಪರಿಶಿಷ್ಟ ಜಾತಿ ಬೊಕ್ಕ ಪರಿಶಿಷ್ಟ ಪಂಗಡೊದ ಮಿತ್ತ್ ದೌರ್ಜನ್ಯ ಕಾಯ್ದೆದಡಿಟ್ ರಡ್ಡ್ ಕೂಟೊಲೆನ ವಿರುದ್ಧ ಪ್ರಕರಣ ದಾಕಲಾತ್ಂಡ್.
ರಡ್ಡ್ ಕೂಟೊಲೆನ ಒಯಿಲ್‌ಡ್ ದಾದ ಉಂಡು?
ಒಯಿಲ್ -1
ಜಗಜೀವನ ರೈ ಪನ್ಪಿನಾರೆನ ಇಲ್ಲದ ಬೇಲೆದಾಯೆ ಬಾಂಗಟು ಪಾಸ್ವಾನ್ ಉಬಾರ್ ಸ್ಟೇಶನ್‌ಗ್ ಕೊರ್ತಿನ ಒಯಿಲ್‌ದ ಪ್ರಕಾರ ಸುದರ್ಶನ್ ಸೇರ್ದ್ 10-15 ಜನೊತ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಜಗಜೀವನ ರೈನ ಉಬಾರ್ ಜಂಕ್ಷನ್‌ದಲ್ಪ ಇಪ್ಪುನ ಪರ ಕಟ್ವಾನೊದ ರಿಪೇರಿ ಬೇಲೆ ಮನ್ತೊಂದುಪ್ಪುನಗ ಮಧ್ಯಾಹ್ನ ಅಂದಾಜಿ 3:10 ಗಂಟೆಗ್ ಆರೋಪಿಲಾಯಿನ ಸುದರ್ಶನ್ ಬೊಕ್ಕ ಒರಿನ 10-15 ಜನ ಕೂಟ ಕಟ್ಟೊಂದು ಜಗಜೀವನ ರೈನ ಜಾಗೆಗ್ ಅಕ್ರಮ ಪ್ರವೇಶ ಮಲ್ತ್‌ದ್ ಬಾಂಗಟು ಪಾಸ್ವಾನ್‌ಗ್ ಆರೋಪಿ ಸುದರ್ಶನ್ ಜಾತಿ ನಿಂದನೆ ಮಲ್ತ್‌ದ್ ಕಾರ್‌ಡಿತ್ತಿನ ಜೋಡುಡು ಹಾಕ್‌ದೆ. ಉ್ಂದೆನ್ ತೂದು ಜಗಜೀವನ ರೈ ಬುಡ್ಪಾಯೆರ ಬನ್ನಗ ಒರಿನ 10-15 ಜನ ಆರೆನ ಕೆಪ್ತಂಡೆಗ್ ಬೆರಿಕ್ ಅಂಚೆನೇ ಮೆಯಿಕ್ ಸಮಾ ಆಕೊಂದಿಪ್ಪುನಗ ಪೊಲೀಸೆರ್ ಬತ್ತಿನೇ ಅಲ್ಪರ್ದ್ ಆರೋಪಿಲು ಪದ್ರಾಡಾತೆರ್.
ನಡಕೆಡ್ ಬಾಂಗಟು ಪಾಸ್ವಾನ್‌ಗ್ ಪೆಟ್ಟಾದ್ ಮೆಡಿಕಲ್‌ರ್ದ್ ಮಾತ್ರೆ ಗೆತೊಂದು ಪೋತೆ, ಈ ನಡಕೆದ ಬಗೆಟ್ ಜಗಜೀವನ ರೈ ಒಯಿಲ್ ಕೊರ್ತೆರ್ಂದ್ ಎನ್ನ್‌ದ್ ಕಡೆಸ್ಸ್‌ದ್ ಒಯಿಲ್ ಕೊರ್ತೆರ್. ಈ ಘಟನೆಗ್ ಜಗಜೀವನ ರೈ ಬೊಕ್ಕ ಆರೋಪಿ ಸುದರ್ಶನ್ ಮೊಕಲೆಗ್ ಜಾಗೆದ ಕಟ್ವಾನೊದ ಇಚಾರೊಡು ತಕರಾರ್ ಇತ್ತ್‌ದ್ ಕಟ್ವಾನೊದ ರಿಪೇರಿ ಬೇಲೆ ಮಲ್ತಿನೆಕ್ ಆಕ್ಷೇಪ ತೋಜಾದ್ ಈ ಹಲ್ಲೆನ್ ಆರೋಪಿಲು ಮಲ್ದೆರ್ ಪಂದ್ ಬಾಂಗಟು ಪಾಸ್ವಾನ್ ಕೊರ್ತಿನ ಒಯಿಲ್‌ದಂಚ ಪ್ರಕರಣ ದಾಕಲಾತ್ಂಡ್.
ಒಯಿಲ್ -2
ಹರೀಶ್ ಕೊರ್ತಿನ ಅಯಿಲ್‌ದ ಪ್ರಕಾರ ಜಗಜೀವನ್ ರೈ, ಭವೀಶ್ ರೈ, ಸಂದೀಪ್ ಬೊಕ್ಕ ಒರಿನಕ್ಲೆನ ಮಿತ್ತ್ ಉಬಾರ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಉಬಾರ್ ಪೇಂಟೆಡುಪ್ಪುನ ಪರ ಕಟ್ವಾನೊದ ಮಾಲಿಗೆದ ಬೇಲೆನ್ ಜಗಜೀವನ್ ರೈ, ಭವಿಷ್, ಸಂದೀಪ್ ಬೊಕ್ಕ ಕೂಟದಕುಲು ಸೇರ್ದ್ ಮಲ್ತೊಂದುಪ್ಪುನಗ ಬಯ್ಯಡ್ ಸುಮಾರ್ 3.00 ಗಂಟೆದ ಪೊರ್ತುಡು ದನಿ ಸುದರ್ಶನ್ ಕುಮಾರ್ ಪನ್ಪಿನಾರ್ ಅಡೆ ಹೋಪೋದುಗಿ ಬೇಲೆ ಮನ್ಪೊರ್ಚಿ ಪಂದ್ ಪನ್ನಗ ಜಗಜೀವನ್ ರೈ, ಭವೀಶ್ ಬೊಕ್ಕ ಸಂದೀಪ್ ಪನ್ಪಿನಕುಲು ಆರೆನ ಮಿತ್ತ ಹಲ್ಲೆ ಮನ್ಪುನಗ ಹರೀಶ್ ಬೊಕ್ಕ ರಮಾನಂದ ಬುಡ್ಪಾಯೆರ ಪೋನಗ ಆರ್ ಹರೀಶ್‌‌ನ್ ಉದ್ದೇಶಿತ್‌ದ್ “ನಾಯ್ಕ ಜಾತಿಗ್ ಪುಟ್ಟುನಾಯ ಈ ಏರ್ ಬುಡ್ಪಾಯೆರ” ಪಂದ್ ಜಾತಿ ನಿಂದನೆ ಮಲ್ತ್‌ದ್ ಜಗಜೀವನ್ ರೈ ಹರೀಶ್‌‌ನ್ ನೂಕ್‌ದ್ ಪಾಡ್ದ್ ಕಾರ್‌ಡ್ ತೊರ್ದ್‌ದೆರ್.
ಭವೀಶ್ ಕರ್ಬದ ರಾಡ್‌ಡ್ ಸೊಂಟೊಗು ಆಕ್‌ದೆ. ಸಂದೀಪ್ ವೆಲ್ಡಿಂಗ್‌ದ ಪಣೆಟ್ ದತ್ತ ಕೈಕ್ ಆಕ್‌ನೆರ್ದಾವರ ಗಡಿಯಾತ್ಂಡ್. ರಮಾನಂದನ್ ಭವೀಶ್ ನೂಕುದ್ ಪಾಡ್ದ್ ಬೆರಿಕ್ ತೊರ್ತ್‌ದೆರ್. ಗಡಿಯಾತಿನ ಹರೀಶ್ ಬೊಕ್ಕ ರಮಾನಂದನ್ ತಿಮ್ಮಪ್ಪ ಪನ್ಪಿನಾರ್ ಖಾಸಗಿ ಗಾಡಿಡ್ ಪುತ್ತೂರು ಸರಕಾರಿ ಆಸ್ಪತ್ರೆಗ್ ಲೆತೊಂದು ಪೋದು ಆಸ್ಪತ್ರೆದ ಬೈದ್ಯೆರ್ ಪರೀಕ್ಷೆ ಮಲ್ತ್‌ದ್ ಹರೀಶ್‌ಗ್ ಉಲರೋಗಿಯಾದ್ ಮರ್ದ್ ಕೊರ್ದು, ರಮಾನಂದ ಪಿದಯಿರೋಗಿಯಾದ್ ಮರ್ದ್ ಗೆತೊಂದೆರ್.
ಇಈಚ ರಡ್ಡ್ ಕೂಟೊರ್ದು ರಡ್ಡ್ ಬಗೆತ ಒಯಿಲ್ ದಾಕಲಾತ್ಂಡ್.