Last updated on October 8th, 2023 at 09:22 am
ಗಾಜ಼ಾಪಟ್ಟೆದ ಹಮಾಸ್ ಉಗ್ರೆರೆನ ದಾಳಿಗ್ ಇಸ್ರೇಲ್‌ದ 100ರ್ದ್‌ಲಾ ಎಚ್ಚ ಜನೊಕುಲು ಬಲಿಯಾದ್, ಸಾರರ್ದ್‌ಲಾ ಎಚ್ಚ ಜನೊಕ್ಲೆಗಾ ಗಡಿಕುಲಾತ ಪಂದ್ ವರದಿಯಾತ್ಂಡ್. ಹಮಾಸ್ ಉಗ್ರೆರೆನ ದಾಳಿಗ್ ಸದು ಕೊರೊಂದುಲ್ಲ ಪಂದ್ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಪಂಡಿನ ಬೆರಿಟೇ 200 ಪ್ಯಾಲೇಸ್ತೀನಿಯೆರೆನ್ ಇಸ್ರೇಲ್ ಪಡೆ ಕೆರ್ತ್ಂಡ್.
ಉಗ್ರ ದಾಳಿಗ್ ಎದುರಾದ್ ಇಸ್ರೇಲ್ ಕೊಲಲ ಘೋಷಣೆ ಮಲ್ದ್ಂಡ್. ಗಾಜ಼ಾಪಟ್ಟೆಡುಪ್ಪುನ ಹಮಾಸ್ ಉಗ್ರೆರೆನ ಕಟ್ವಾನೊಲೆನ ಮಿತ್ತ್ ಇಸ್ರೇಲ್ ಸುಮಾರ್ 12ರ್ದ್‌ಲಾ ಎಚ್ಚ ರಾಕೆಟ್‌‌ಲೆರ್ದ್ ದಾಳಿ ಮಲ್ದ್ಂಡ್.
ಹಮಾಸ್ ಉಗ್ರೆರೆನ ಕಟ್ವಾನೊಲೆನ ಮಿತ್ತ್ ರಾಕೆಟ್‌ ದಾಳಿ ಮನ್ಪುನ, ಕಟ್ವಾನೊಲೆನ್ ಪೊಡಿ ಮನ್ಪುನ ವಿಡಿಯೊಲು ತಿಕ್ಕ್‌ದ. ಆತೇ ಅತ್ತಂದೆ, ಇಸ್ರೇಲ್ ಎಂಚ ಭೀಕರವಾದ್ ದಾಳಿಗ್ ಸದು ಕೊರೊಂದುಂಡು ಪನ್ಪಿನೆಕ್ ಈ ದೃಶ್ಯೊಲು ಪುರಾಪು ಆದುಲ್ಲ. ಹಮಾಸ್ ಉಗ್ರೆರೆನ ಮಿತ್ತ್ ಇಸ್ರೇಲ್ ಲೈದಿನ ಕೊಲಲೊಗು ಆಪರೇಷನ್‌ ಸ್ವಾರ್ಡ್ಸ್‌ ಆಫ್‌ ಅಯರ್ನ್ (Operation Swords Of Iron) ಪಂದ್ ಪುದರ್ ದೀತ್ಂಡ್.
ಇತ್ತೆದ ಒಲವುದ ಪ್ರಕಾರ ಇಸ್ರೇಲ್ ಮಲ್ತಿನ ವಾಯುದಾಳಿಡ್ 200ರ್ದ್‌ಲಾ ಎಚ್ಚ ಪ್ಯಾಲೆಸ್ತೀನಿಯೆರ್ ತೀರ್ದೆರ್, 1,600ರ್ದ್‌ಲಾ ಎಚ್ಚ ಜನೊಕು ಗಡಿಕುಲಾತ. ಇಸ್ರೇಲ್ ದಾಳಿಗ್ ಹಮಾಸ್ ಉಗ್ರೆರೆನ ಮೂಜಿ ನಿಲೆಕುಲು ಪೊಡಿಯಾತ. ಪ್ಯಾಲೆಸ್ತೀನ್‌ ಉಗ್ರೆರೆ ಮಿತ್ತ್ ಕೊಲಲ ಲೈದಿಞ ಇಸ್ರೇಲ್, ನನಲಾ ಭೀಕರ ದಾಳಿದ ಮುಕೇನ ಪಗೆಮಾನಿಲೆಗ್ ಬುದ್ಧಿ ಕಲ್ಪಾವರೆಗುಂಡು ಪಂದ್ ಅಂತರಾಷ್ಟ್ರೀಯ ಸುದ್ದಿ ಮಾಧ್ಯಮೊಲು ವರದಿ ಮಲ್ತ್‌ದ.
ಈ ನಡುಟು ಇಸ್ರೇಲೀ ಪೊಂಜೊವುಲೆನ ಅರೆ-ಉರ್ಬುಲಿ ಶರೀರೊದ ಮಿತ್ತ್ ಕುಲ್ಲುದ್ ಹಮಾಸ್ ಉಗ್ರೆರ್ ಅಲ್ಲಾಹು ಅಕ್ಬರ್ ಘೋಷಣೆ ಲೆಪ್ಪುನ ವಿಡಿಯೋ ವೈರಲ್ ಆತ್ಂಡ್. ಇಂದೆಕ್ ಇಸ್ರೇಲ್ ಪಡೆತ ಉತ್ತರ ಎಂಚ ಇಪ್ಪುಂಡು ಪಂದ್ ನನ ತೆರಿಯೊಡಾತೆ.