Last updated on October 19th, 2023 at 01:19 pm
ಕುಡ್ಲ: ಬೋಂದೆಲ್‌ದ ಲೋಕೋಪಯೋಗಿ ಇಲಾಖೆಡ್ ಕಿನ್ಯ ಇಂಜಿನಿಯರ್ ರೊನಾಲ್ಡ್ ಲೋಬೋ ಗುತ್ತಿಗೆದಾರಡೊರ್ಯಡ ಲಂಚಗ್ ಕೈನೀರ್‌ನಗ ಲೋಕಾಯುಕ್ತ ಪೊಲೀಸ್ ಬಲೆಗಕ್ ಬೂರ್ದೆರ್.
ಲೋಕೋಪಯೋಗಿ ಇಲಾಖೆದ ಕ್ಲಾಸ್ 2 ದರ್ಜೆದ ಗುತ್ತಿಗೆದಾರೆ ಪ್ರಭಾಕರ ನಾಯ್ಕೆರ್ ಬೊಲ್ತೇರ್ ತಾಲೂಕ್‌ದ ರಡ್ಡ್ ಗ್ರಾಮೊಲೆಡ್ 45 ಲಕ್ಷ ರೂ. ಕರ್ಚಿಡ್ ಪರಿಶಿಷ್ಟ ಜಾತಿ ಬೊಕ್ಕ ಪರಿಶಿಷ್ಟ ಪಂಗಡೊದ ಕಾಲನಿದ ಬುಲೆಚ್ಚಿಲ್‌ದ ಬೇಲೆ ಮನ್ಪಾದಿತ್ತೆರ್. ಈ ಬಗೆಟ್ ವರದಿ ಮನ್ಪೆ, ಲೋಕೋಪಯೋಗಿ ಇಲಾಖೆಗ್ ಅರ್ಜಿ ಪಾಡಿನಪಗ ಇಲಾಖೆದ ಕ್ವಾಲಿಟಿ ವಿಭಾಗೊದ ಇಂಜಿನಿಯರ್ ರೊನಾಲ್ಡ್ ಲೋಬೋ 22 ಸಾವಿರ ರೂ. ಲಂಚ ಕೇಂದೆರ್ ಪಂದ್ ತೆರಿದ್ ಬೈದ್ಂಡ್. ಆಂಡ ಲಂಚ ಕೊರ್ಯೆಲ ನಿರಾಕರಿತಿನ ಪ್ರಭಾಕರ ನಾಯ್ಕೆರ್ ಸೀಧ ಲೋಕಾಯುಕ್ತ ಪೊಲೀಸ್‌ಗ್ ಒಯಿಲ್ ಕೊರ್ತೆರ್. ಲೋಕಾಯುಕ್ತ ಎಸ್ಪಿ ಸಿ.ಎ.ಸೈಮನ್ ಮಾರ್ಗದರ್ಶನೊದಂಚ ಬುಧವಾರ ಲಂಚದ ಕಾಸ್ ಗೆತೊನೊಂದುಪ್ಪುನಗ ದಾಳಿ ಮಲ್ತ್‌ದ್ ರೊನಾಲ್ಡ್ ಲೋಬೋನ್ ಕೈದ್ ಮಲ್ತ್‌ದ ಪಂದ್ ಲೋಕಾಯುಕ್ತದ ಪ್ರಕಟನೆ ತೆರಿಪಾದ್ಂಡ್.