ಕುಡ್ಲ : ಈದ್ ಮಿಲಾದ್ ಮೆರವಣಿಗೆ ಪೋನಗ ಅಬ್ಬಕ್ಕನ ಒರುತಲ್ಪ ಮುಸ್ಲಿಂ ಧರ್ಮದ ಕೊಡಿ ರಾಪಾಯಿನ ನಡಕೆ, ನೋಟೀಸ್

Last updated on October 4th, 2023 at 02:53 pm

ಕುಡ್ಲಡ್ ತುಳುನಾಡ ರಾಣಿ ಅಬ್ಬಕ್ಕನ ಒರುಕು ಬರ್ತ್ ಮುಸ್ಲಿಂ ಧರ್ಮದ ಕೊಡಿ ರಾಪಾಯಿನ ನಡಕೆಗ್ ಜವನೆರೆನ ಕೂಪೆಗ್ ಪೋಲೀಸೆರ್ ಅಂಗಾರೆ ನೋಟೀಸ್ ಜಾರಿ ಮಲ್ತೆರ್.

ಕುಡ್ಲಡ್ ಅಬ್ಬಕ್ಕ ವೃತ್ತದಲ್ಪ ಸಪ್ಟೆಂಬರ್ 28ಗು ಈದ್ ಮಿಲಾದ್ ಮೆರವಣಿಗೆದ ಪೊರ್ತುಡು ಪಚ್ಚ ನೇರ್‌ದ ಕೊಡಿ ಪತೊಂದು ಕೆಲವು ಜವನೆರ್ ಒರುತ ಮಿತ್ತ್ ಪೋದಿತ್ತೆರ್. ಈ ನಡಕೆದ ವೀಡಿಯೋ ವೈರಲ್ ಆಯಿನೆ ಮಾತಾ ಕಡೆರ್ದ್ ಉಂದೆಕ್ ವಿರೋಧ ಬೈದಿತ್ತ್ಂಡ್.

ಉಳ್ಳಾಲ ಪೋಲೀಸೆರ್ ಉಂದೆನ್ ಗಂಭೀರವಾದ್ ದೆತೊನ್ದು ಆ ವೀಡಿಯೋಡ್ ಇತ್ತಿನಕಲೆಗ್ ನೋಟೀಸ್ ಕಡಪುಡುಡು ವಿಚಾರಣೆಗ್ ಬರೊಡು ಪನ್ದ್ ಪನ್ತೆರ್. ಮಂಜನಾಡಿ, ಮದಕ, ಬಂಟ್ವಾಳ, ಬೊಲ್ತೇರ್, ದೇರಲಕಟ್ಟೆ, ಕೊಣಾಜೆ, ಬೊಕ್ಕ ಉಳ್ಳಾಲದ ಜವನೆರ್ ಇತ್ತೆರ್ ಪನ್ದ್ ತೆರಿದ್ ಬೈದ್ಂಡ್.