Last updated on October 16th, 2023 at 04:52 pm
ಉಬಾರ್‌ಗ್ ಮುಟ್ಟದ ಪೆರ್ನೆದ ಕಳೆಂಜ – ದೇಂತಡ್ಕದ ಶ್ರೀ ವಿಷ್ಣುಮೂರ್ತಿ ದೇಲವಲ್ಯೊಡು ದೇವೆರೆಗ್ ಸಮರ್ಪಣೆ ಮಲ್ದಿನ ಪದ್ದೈಬಂಗಾರ್ ಕಂಡ್‌ದ್ ಪೋದಿತ್ತ್‌ದ್, ಅಕ್ಟೋಬರ್15ತಾನಿ ಬೊಲ್ಪುಗ್ ಬೈದ್ಂಡ್. ಈ ಬಗೆಟ್ ದೇವಲ್ಯೊದ ದುಂಬುದ ಕಾರ್ಯಂತೆರ್ ಗೋಪಾಲ ಶೆಟ್ಟಿ ಎನ್. ಉಬಾರ್ ಪೊಲೀಸೆರೆಗ್ ಒಯಿಲ್ ಕೊರ್ತೆರ್, ಪ್ರಕರಣೊಲಾ ದಾಕಲಾತ್ಂಡ್.
ಕರಿನ ಡಿಸೆಂಬರ್‌‌ಡ್ ಈ ದೇವಲ್ಯೊದ ಬ್ರಹ್ಮಕಲಶಾಭಿಷೇಕ ನಡತಿತ್ತ್ಂಡ್, ಈ ಪೊರ್ತುಡು ಭಕ್ತೆ ಒರಿ ಸುಮಾರ್ ಮೂಜಿ ಮುಕ್ಕಾಲ್ ಪವನ್‌ದ ಬಂಗಾರ್‌ದ ಜೋಮಾಲೆನ್ ಕೊರ್ದಿತ್ತೆರ್. ಆತೆ ಅತ್ತಂದೆ ರಡ್ಡ್ ಪವನ್‌ದ ಕುಡೊಂಜಿ ಬಂಗಾರ್‌ದ ಮಾಲೆಲಾ ತೋಜೊಂದಿಜ್ಜಿ ಪಂದ್ ಒಯಿಲ್‌ಡ್ ತೆರಿಪಾದೆರ್.
ಸರ್ಕಾರ ದೇವಲ್ಯೊಗು ಆಡಳಿತಾಧಿಕಾರಿನ್ ನೇಮಕ ಮಲ್ತಿತ್ತ್‌ದ್, ಅಧಿಕಾರ ಗೆತೊಂದಿನ ಆರ್ ಅ.15ತಾನಿ ಭಕ್ತೆರೆನ ಎದುರುಡು ಮಹಜರ್ ಮನ್ಪುನಗ ಬಂಗಾರ್‌ದ ಮಾಲೆ ಇಜ್ಜಂದಿನ ತೆರಿದ್ ಬೈದ್ಂಡ್.
ಪಿಸಿರಾತಿನ ಭಕ್ತೆರ್
ದೇವಲ್ಯೊಡು ಒಂಜಿ ಕಮಿಟಿ ದುಂಬೇ ಇತ್ತ್‌ದ್,ಅವ್ವತ್ತಂದೆ ಬೇತೆನೇ ಪ್ರೈವೇಟ್ ಟ್ರಸ್ಟ್‌ನ್ ಉಂಡು ಮಲ್ತ್‌ದ್ ದೇವಲ್ಯೊರ್ದು ಕಂಡ್‌ದೆರ್. ದೇವಲ್ಯೊದ ಭದ್ರತಾ ಅದೆತ ತರ್ಕೋಲುನು ಅನಧಿಕೃತವಾದ್ ಮನ್ಪಾದ್ ದೇವಲ್ಯೊದ ಪದ್ದೈಬಂಗಾರ್ ಕಂಡ್‌ದಿನ ನಡಕೆ ಕಡೆಸ್ಸ್‌ದ್ ಬೊಲ್ಪುಗು ಬೈದ್ಂಡ್. ಈ ಕಮಿಟಿದ ಬಗೆಟ್ ಸಾರ್ವಜನಿಕ ವಲಯೊಡು ಬಾರೀ ಆಕ್ರೋಶಲಾ ತೋಜಿದ್ ಬೈದ್ಂಡ್.
ಈ ಬಗೆಟ್ ಪೊಲೀಸೆರೆಗ್ ಒಯಿಲ್ ಕೊರ್ತಿನ ದೇವಲ್ಯೊದ ದುಂಬುದ ಕಾರ್ಯಂತೆರ್ ಗೋಪಾಲ ಶೆಟ್ರ್, ಕರ್ಬದ ಕಪಾಟ್‌ನ್ ದೇವಲ್ಯೊದ ಕಾರ್ಯಾಲಯೊರ್ದು ಕಂಡ್‌ದ್ ಅವೆನ್ ಪುಡತ್‌ದ್ ಅವೆಟಿತ್ತಿನ ದಾಖಲೆಪತ್ರೊಲೆನ್ ನಾಶ ಮಲ್ದೆರ್. ಅವೆಟಿತ್ತಿನ ಪಣವು, ಬೊಳ್ಳಿ ಸೊತ್ತುಲೆನ್ ಕಂಡ್‌ದೆರ್. ಆ ಖಾಲಿ ಕಪಾಟ್ ಭದ್ರತಾ ಅದೆಟ್ ತೋಜಿದ್ ಬೈದ್ಂಡ್.
ಭದ್ರತಾ ಅದೆತ ತರ್ಕೋಲುನು ಅನಧಿಕೃತವಾದ್ ಮನ್ಪಾದ್ ಪ್ರೈವೇಟ್ ಟ್ರಸ್ಟ್ ಬೊಕ್ಕ ಅವೆಕ್ ಪೂರಕವಾಯಿನ ಸಮಿತಿಗ್ ದೇವಲ್ಯೊದ ದುಂಬುದ ಅಧ್ಯಕ್ಷೆ ರೋಹಿತಾಕ್ಷ ಬಾನೊಟ್ಟು, ಟಸ್ಟ್ ಅಧ್ಯಕ್ಷೆ ಭರತ್ ಕುಮಾರ್ ಆರಿಗ ಪಟ್ಟೆಗುತ್ತು, ಪಡ್ನೂರು ಗ್ರಾಮೊದ ಅವಿನಾಶ್ ಜೈನ್ ಪರಂಗಾಜೆ ಬೊಕ್ಕ ಉ್ಂದೆಕ್ ಪೂರಕವಾಯಿನ ಸಮಿತಿದ ಪದುಕೆರ್ ಉ್ಂದೆಕ್ ಕಾರಣಕರ್ತರಾದಿತ್ತ್‌ದ್, ಅಕುಲೆನ ಮಿತ್ತ್ ಬೋಡಾಪಿನ ಕ್ರಮ ಗತೊನೊಡು ಪಂಡ್‌ದ್ ಒಯಿಲ್‌ಡ್ ಬರೆತೆರ್.
ಸಮಿತಿದ ಮಾತೆರ್ನಲಾ ಕೈ ಉಂಡು, ಸಾರ್ವಜನಿಕೆರೆನ ಆರೋಪ
ಒಯಿಲ್‌ಡಿಪ್ಪುನ ಪುದರ್‌ಲತ್ತಂದೆ, ಆ ಟ್ರಸ್ಟ್‌‌ದ ಕಾರ್ಯಂತೆರ್ ಅಶೋಕ್ ಕುಮಾರ್ ಮುಳಿಪಡ್ಪು, ಮಾನಾದಿಗೆದ ಪದುಕೆ ಎಂ ನಾರಾಯಣ ಭಟ್, ಪದುಕೆರಾಯಿನ ಬಿ ಧನ್ಯಕುಮಾರ್ ರೈ ಬಿಳಿಯೂರುಗುತ್ತು, ಚಂದಪ್ಪ ಪೂಜಾರಿ ಕಳೆಂಜ ತಿರ್ತ ಇಲ್ಲ್, ನವೀನ್ ಕುಮಾರ್ ಸುದೆಬರಿ, ಕೇಶವ ಪೂಜಾರಿ, ಲೋಕೇಶ್ ಗೌಡ, ಸುರೇಶ್ ಕುಮಾರ್ ಕೋಡಿ, ಪ್ರಶಾಂತ್ ಆಚಾರ್ಯ ನೇಂಜ, ರಘುನಾಥ ಮಲ್ಲಡ್ಕ, ಸುರೇಶ್ ಪೂಜಾರಿ ನೂಜೆ, ಶಿವಪ್ರಸಾದ್ ಪಚ್ಚಾಡಿ ಮೊಕ್ಲೆನ ಕೈ ಉಪ್ಪುನ ಸಂಶಯ ಉಂಡು ಪಂದ್ ಸಾರ್ವಜನಿಕೆರ್ ಆರೋಪ ಮಲ್ದೆರ್.
