Last updated on October 8th, 2023 at 07:31 am
ಕುಡ್ಲ: ಆಜಿ ವರ್ಸೊದ ಪೊಣ್ಣು ಬಾಲೆದ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಆರೋಪಿ ಹೋಮ್ ನರ್ಸ್‌ಗ್ ಕುಡ್ಲ ಎಚ್ಚಿನ ಸತ್ರ ನ್ಯಾಯಂತಡೆ ಬೊಕ್ಕ ಎಫ್‌ಟಿ ಎಸ್‌ಸಿ-2 ನ್ಯಾಯಂತಡೆ 20 ವರ್ಸೊದ ಕಠಿಣ ಶಿಕ್ಷೆ ಕೊರ್ದು ಶುಕ್ರವಾರ ತೀರ್ಪು ಕೊರ್ತುಂಡು.
ಹಾವೇರಿ ಜಿಲ್ಲೆದ ನೆಲೋಗಲ್ ಗ್ರಾಮೊದ ಬೆನಕರಾಜ್ ಲಮಾಣಿ ಯಾನೆ ರಾಜ್(25) ಶಿಕ್ಷೆ ತಿಕ್ಕ್‌ದಿನ ಆರೋಪಿ. ಸಂತ್ರಸ್ತೆದಿ ಬಾಲೆದ ಅಜ್ಜೆರ್ ಉಸಾರ್‌ದಿಂತೆ ತೊರ್ತಲ್‌ಡ್ ತನ್ನ ಇಲ್ಲಡ್ ಇತ್ತೆರ್. ಆರೆನ್ ತೂವೊನ್ರ ಹೋಮ್‌ನರ್ಸ್ ಆದಿತ್ತಿನ ಆರೋಪಿನ್ ನೇಮಕ ಮಲ್ತಿತ್ತೆರ್. 2022ತ ಜನವರಿಡ್ ಒಂಜಿ ದಿನ ಪೊಣ್ಣನ ಅಪ್ಪೆ ಮರ್ದ್ ಕನಯೆರ ಇಲ್ಲ್‌ರ್ದ್ ಪಿದಯಿ ಪೋದುಪ್ಪುನಗ ಆರೋಪಿ ಪೊಣ್ಣನ ಮಿತ್ತ್ ದೌರ್ಜನ್ಯ ಮಲ್ದಿತ್ತೆ ಪಂದ್ ಕುಡ್ಲದ ಮಹಿಳಾ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ಇನ್‌ಸ್ಪೆಕ್ಟರ್ ಎಸ್.ಎಚ್.ಭಜಂತ್ರಿ ಜಡ್ತೆ ಮಲ್ತ್‌ದ್ ನ್ಯಾಯಂತಡೆಕ್ ದೋಷಾರೋಪಣಾ ಪಟ್ಟಿ ಸಂದೈತ್‌ದಿತ್ತೆರ್.
ವಿಚಾರಣೆ ಮಲ್ತಿನ ನ್ಯಾಯಾಧೀಶೆದಿ ಮಂಜುಳಾ ಇಟ್ಟಿ ಶುಕ್ರವಾರ ತೀರ್ಪು ಕೊರ್ತೆರ್. ಆರೋಪಿನ ಅಪರಾಧ ಸಾಬೀತ್ ಆಯಿನೆರ್ದಾವರ ಐಪಿಸಿ ಕಲಂ 376 ಬೊಕ್ಕ ಪೊಕ್ಸೋ ಕಲಂ 6ತ ಅಡಿಟ್ 20 ವರ್ಷ ಕಠಿಣ ಶಿಕ್ಷೆ ಬೊಕ್ಕ 25,000 ರೂ. ಫೈನ್, ಐಪಿಸಿ ಕಲಂ 323ತ ಅಡಿಟ್ 6 ತಿಂಗೊಲ್ದ ಸಾದಾರ್ನ ಶಿಕ್ಷೆ ಬೊಕ್ಕ 1,000 ರೂ. ಫೈನ್ ಪಾಡ್ದೆರ್. ಅತ್ತಂದೆ ಸಂತ್ರಸ್ತೆದಿ ಪೊಣ್ಣಗ್ 2 ಲಕ್ಷ ರೂ. ಪರಿಹಾರ ಕೊರ್ಪುಲೆಕ ಕಾನೂನು ಸೇವಾ ಪ್ರಾಧಿಕಾರೊಗು ಆದೇಶ ಕೊರ್ತೆರ್. ಸರಕಾರೊದ ಪರವಾದ್ ವಿಶೇಷ ಸರಕಾರಿ ಅಭಿಯೋಜಕೆ ವೆಂಕಟರಮಣ ಸ್ವಾಮಿ ಸಿ. ವಾದ ಮಲ್ತಿತ್ತೆರ್.