Last updated on October 8th, 2023 at 11:41 am
ನಿಟ್ಟೆದ ಎನ್‌ಎಂ‌ಎಎಮ್ಐಟಿ ಕಾಲೇಜ್‌ದ ತುಡರ್ ಪನ್ಪಿ ಪುದರ್‌ದ ತುಳು ಕ್ಲಬ್‌ದ ಲೆಕ್ಕೊಡು ಇಂಜಿನಿಯರಿಂಗ್‌ದ ಜೋಕುಲೆಗ್ ತುಳು ಕಲ್ಪಾವುನ ಲೇಸ್ ಸಪ್ಟೆಂಬರ್ 30, ಶನಿವಾರ ನಡತ್ಂಡ್. ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನದ ಸಂಪನ್ಮೂಲ ವ್ಯಕ್ತಿಲು ಜೋಕುಲೆಗ್ ಅಂಚೆನೆ ಪ್ರೊಫೆಸರ್‌ನಕಲೆಗ್ ತುಳು ಕಲ್ಪಾವುನ ಕ್ಲಾಸ್ ಮಲ್ತೆರ್.
ಲೇಸ್‌ದ ಉದಿಪನೊನು ಸಂಸ್ಥೆದ ಒತ್ತು ಪ್ರಾಂಶುಪಾಲೆರಾಯಿನ ಡಾ॥ ಐ.ರಮೇಶ್ ಮಿತ್ತಂತಾಯೆರ್ ಮಲ್ತ್, ತುಳು ಬಾಸೆ ಅಂಚೆನೆ ತುಳು ಕಲ್ಪೊಡಾಯಿನ ಅನಿವಾರ್ಯತೆದ ಬಗೆಟ್ ಪಾತೆರಿಯೆರ್. ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನದ ಗುರ್ಕಾರ್ಲಾಯಿನ ಮಹಿ ಮುಲ್ಕಿ ಮೇರ್ ತುಳು ಲಿಪಿತ ಇತಿಹಾಸ ಅಂಚೆನೆ ತುಳುತ ಪ್ರಾಚೀನ ಕೃತಿಕುಲು, ಶಾಸನೊಲೆನ ಬಗೆಟ್ ಉಪನ್ಯಾಸ ಕೊರಿಯೆರ್. ವಿಧ್ಯಾರ್ಥಿಲೆನ ಕ್ಷೇಮಾಬಿವೃದ್ದಿ ಅಧಿಕಾರಿ ಅಂಚೆನೆ ಪ್ರಾಚಾರ್ಯೆರಾಯಿನ ಡಾ॥ನರಸಿಂಹ ಬೈಲಕೆರಿ ಮೇರ್, ತುಳು ಲಿಪಿನ್ ಅಂಚೆನೆ ತುಳು ಬಾಸೆನ್ ಒರಿಪಾವೆರ್ ವಾ ರೀತಿ ಜವನೆರ್ ದುಂಬು ಬರೊಡು ಪನ್ದ್ ತೆರಿಪಾಯೆರ್.
ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನದ ಕಾರ್ಯಂತೆರ್ ಅಂಚೆನೆ ಜೀಟಿಗೆ ತುಳು ಲಿಪಿ ಕಲ್ಪುನ ಪುಸ್ತಕದ ಸಂಪಾದಕೆರಾಯಿನ ನಿಶ್ಚಿತ್ ರಾಮಕುಂಜ ಮೇರ್ ಜೋಕುಲೆಗ್ ಅಂಚೆನೆ ಅಲ್ಪದ ಉಪನ್ಯಾಸಕೆರೆಗ್ ತುಳು ಲಿಪಿ ಕಲ್ಪಾಯೆರ್. ಪ್ರತಿಷ್ಠಾನದ ಪದುಕೆಪಾಯಿನ ಪೃಥ್ವಿ ತುಳುವೆ ಮೇರ್ ತುಳು ಲಿಪಿ ಕ್ಲಾಸ್‌ದ ಒತ್ತು ಉಸ್ತುವಾರಿ ಮಲ್ತೆರ್. ಕಲ್ಪರೆ ಬತ್ತಿನ ಮಾತೆರೆಗ್ಲಾ ಜೀಟಿಗೆ ತುಳು ಲಿಪಿ ಹ್ಯಾಂಡ್‌ಬುಕ್‌ನ್ ಪ್ರತಿಷ್ಠಾನದ ಲೆಕ್ಕೊಡು ಪಟ್ಟಿಯೆರ್.
ತುಡರ್ ತುಳು ಕ್ಲಬ್‌ದ ಮಾತಾ ಪದುಕೆರ್ ಅಂಚೆನೆ ಕೋರ್ ಟೀಮ್‌ದಕುಲು ಈ ಕ್ಲಾಸ್ ಎಡ್ಡೆಡ್ ನಡಪುನಲೆಕ್ಕ ಅಟ್ಟನೆ ಮಲ್ದಿತ್ತೆರ್. ನಿಟ್ಟೆಡ್ ಇಂಜಿನಿಯರಿಂಗ್ ಕಾಲೇಜ್‌ಡ್ ಉಂದೊಂಜಿ ಪೊಸ ಪುನೆಪು, ನಿಟ್ಟೆಡ್ ತುಳು ಬಾಸೆ ಅಂಚೆನೆ ತುಳು ಲಿಪಿನ್ ನನಲಾತ್ ದುಂಬು ಕನಪಿನ ಬೇಲೆ ಮಲ್ಪುನ ಭರವಸೆನ್ ತುಡರ್ ಕ್ಲಬ್‌ದಕುಲು ಕೊರ್ತೆರ್.