Last updated on October 10th, 2023 at 06:58 am
ಲೋಕೊರ್ಮೆ ನಮ್ಮ ಅಪ್ಪೆ ಬಾಸೆನ ನಾಲಿಡ್ ಪತ್ತ್‌ದ್ ಲಿಪಿ ದಾಂತಿ ಬಾಸೆ, ಇತಿಹಾಸ ದಾಂತಿ ಬಾಸೆ, ಬರವು ಸರವುಗು ಆವಂದಿನ ಬಾಸೆ ಪನ್ದ್ ಕೋಂಟುಗು ನೂಕುನಗ, ತುಳುವಪ್ಪೆನ ಉಡಲ ಪುರ್ಸಾದ ಆದ್ ತುಳುವೆರೆಗ್ ತಿಕ್ಕಿನ ಬೊಳ್ಳಿ ಪುಂಡೂರು ವೆಂಕಟರಾಜ ಪುಣಿಂಚತ್ತಾಯೆರ್.
ಭಾರತೊಗು ಸ್ವತಂತ್ರ ತಿಕ್ಕೊರ್ದು ದುಂಬು, ಮೈಸೂರು ರಾಜ್ಯ ಬೊಕ್ಕ ಕೇರಳೊಗು ತುಳುನಾಡ್‌ನ್ ತಜೆತ್ ಪಟ್ಟೊರ್ದು ದುಂಬು ಒರ್ಮೆಕಟ್ಟ್‌ಡ್ ಇತ್ತಿನ ತುಳುನಾಡ್‌ಡ್ ಅಕ್ಟೋಬರ್ 10, 1936ಕ್ಕ್ ದಾಮೋದರ ಪುಣಿಂಚತ್ತಾಯೆರ್ ಬೊಕ್ಕ ಸರಸ್ವತಿ ಅಮ್ಮಗ್ ಪುಟ್ಟಿನ ಪುಣ್ಯ ಪುರುಷೆನೇ ವೆಂಕಟರಾಜೆರ್.
ಓಲೋ ಅಟ್ಟೊಡು ಇತ್ತಿನ ಮಹಾಗ್ರಂಥೊಲೆನ ಪುಗೆಪತ್ತಿನ ತಾರಿದೋಲೆದ ಕಟ್ಟ್‌ನ್ ಕುಡ್ತ್ ಗುಮ್ಮಕುಪ್ಪಿನ್ ಪತೊಂದು ಒಂಜೊಂಜಿ ಅಚ್ಚರೊನು ಓದೊಂದು ತುಳುಕೊಂಜಿ ಶಿಷ್ಟ ಸಾಹಿತ್ಯ ಉಂಡು ಪನ್ದ್ ಸಾರಿದ್ ಪನ್ತಿನವು ತುಳು ಬಾಸೆ ಉಪ್ಪುನೇಟ ಶಾಸ್ವತವಾದ್ ಮದಪರೆ ಆವಂದಿನ ಸಾದಕೊ. ಬಾಸೆಗೊಂಜಿ ಬರವುದ ಅನಿವಾರ್ಯತೆ ಇಜ್ಜಿಡಲಾ ಅಪಗಪಗೊ ತುಳುತ ಉಡಲ ಬಿರ್ಸಾದಿಗೆಗ್ ಬೇತೆಕಲು ನೋಪುನಗ ತುಳು ಪನ್ಪಿನವುಲಾ ಒಂಜಿ ಮಲ್ಲ ಪರತಿರಿ ಇತ್ತಿನ ಬಾಸೆ ಪನ್ದ್ ತುಳುತ ಮಹಾಗ್ರಂಥೊಲೆನ್ ತುಳುವೆರೆ ದುಂಬು ದೀಯೆರ್. ಶ್ರೀ ಭಾಗವತಾರ್ಥ, ಮಹಾಭಾರತೊ, ಕಾವೇರಿ, ದೇವಿ ಮಹಾತ್ಮೆದಂಚಿನ ತುಳುತ ಪಿರಾಕ್ದ ಸಾಹಿತ್ಯೊಲೆನ್ ನಾಡ್‌ದ್ ತುಳುಲಿಪಿಕೊಂಜಿ ಬಾಸೆದ ಕಮ್ಮೆನದ ಎಸಲ್ ಪತ್ತಾದ್ ತುಳು ಲಿಪಿ ಇನಿ ನಮ್ಮ ನಡುಟು ಒರಿಯುಲೆಕ್ಕ ಮಲ್ತಿನಾರ್ ಮೇರ್.
ಇನಿ ಜವನೆರ್ ತುಳುತ ಪಿರವು ಬರೊಂಡಾಂಡ, ತುಳು ಲಿಪಿ ಇನಿ ತುಳುನಾಡೊರ್ಮೆ ಪಗರ್‌ದ್ಂಡ್‌ದ ಅವೆತ ಮೂಲೊ ಓಲು ಉಂಡು ಪನ್ಡ, ಆನಿ ವೆಂಕಟರಾಜೆರ್ ತುಳು ಲಿಪಿಕ್ ಗಟ್ಟಿ ಪಂಚಾಂಗ ಪಾಡಿನವು.
ಇಂಚಿತ್ತಿ ಒರಿ ಮಾಹಾನ್ ವ್ಯಕ್ತಿನ ಪುಟ್ಟು ಪರ್ಬೊನು ವಿಶ್ವ ತುಳು ಲಿಪಿ ದಿನೊ ಪನ್ದ್ ಆಚರಿಪುನವು ಅರೆಗ್ ತುಳುವೆರ್ ಕೊರ್ಪಿನ ಮಲ್ಲ ಮಾನಾದಿಗೆ. ಅವೆರ್ದ್ ಮಲ್ಲ ಅರೆಗ್ ಕೊರ್ಪಿನ ಮರ್ಯಾದಿ ದಾದ ಪನ್ಡ, ತುಳು ಲಿಪಿನ್ ಪ್ರತಿಯೊರಿ ಕಲ್ಪುನವು ಅಂಚೆನೆ ಗಲಸುನವು.