Last updated on October 10th, 2023 at 07:30 pm
ಬೈಂದೂರು ಬಿಜೆಪಿ ಟಿಕೆಟ್ ದೆಪ್ಪಾದ್ ಕೊರ್ಪೆ ಪಂದ್ ಉದ್ಯಮಿ ಗೋವಿಂದ್ ಬಾಬು ಪೂಜಾರಿಡ ಕೋಟಿಗಟ್ಲೆ ಕಾಸ್ ಪೀಂಕಾದ್ ದಗೆ ಮಲ್ದಿತ್ತಿನ ಚೈತ್ರಾ ಪ್ರಕರಣೊಡು ಇತ್ತೆ ವಿಚಾರಣೆಗ್ ಬರ್ಯೆರ ವಜ್ರದೇಹಿ ಸ್ವಾಮಿಲೆಗ್ ಬೆಂಗ್ಳೂರ್ ಸಿಸಿಬಿ ಪೊಲೀಸೆರ್ ನೋಟಿಸ್ ಕೊರ್ತೆರ್.
ಕುಡ್ಲದ ಗುರುಪುರೊಟುಪ್ಪುನ ವಜ್ರದೇಹಿ ಮಠೊತ ರಾಜಶೇಖರಾನಂದ ಸ್ವಾಮಿಲೆಗ್ ನೋಟೀಸ್ ಕಡಪುಡ್ದಿತ್ತ್‌ದ್, ದುಂಬುದ ದಿನೊಟು ಸ್ವಾಮೀಜಿ ವಿಚಾರಣೆಗ್ ಹಾಜಿರಾವರೆಗುಲ್ಲೆರ್.
ನನ ದಗೆ ಪ್ರಕರಣೊದ ಆರೋಪಿಯಾದುಪ್ಪುನ ಚೈತ್ರಾ ನಿರ್ದೇಶನಾಲಯೊಕು ಬರೆತಿನ ಓಲೆಡ್ ಬೇತೆ ಇಸಯೊದೊಟ್ಟುಗು, ಪ್ರಕರಣೊಗು ಸಂಬಂಧಿತಿನಂಚ ವಜ್ರದೇಹಿ ಮಠೊತ ಸ್ವಾಮಿಲೆನ ಪುದರ್‌ನ್ಲಾ ಪ್ರಸ್ತಾಪ ಮಲ್ದಿತ್ತಲ್. ಬೊಕ್ಕ ಈ ಬಗೆಟ್ ಪಾತೆರ್ನ ಸ್ವಾಮೀಜಿ, ಚೈತ್ರಾ ಎಂಕ್ ಫೋನ್ ಮಲ್ತ್‌ದ್ ಈರೆನ ಮಿತ್ತ್ ಒಯಿಲ್ ಉಂಡುಂದ್ ಪಂದಿತ್ತಲ್. ಈರೆಗ್ ಗೋವಿಂದಬಾಬು ಪೂಜಾರಿ 1.50 ಕೋಟಿ ರೂಪಾಯಿ ಕಾಸ್ ಕೊರ್ದಿತ್ತೆರ್‌ಗೆ. ಕಾಸ್ ಪಿರ ಕೊರ್ಲೆ ಪಂದ್ ಎನಡ ಪಂದಿತ್ತಲ್. ಅಪಗ ಚೈತ್ರಾ ಕುಂದಾಪುರನ ಪಾತೆರೊನು ಯಾನ್ ಖಂಡಿತ್ತ್‌ದಿತ್ತೆ. ಚೈತ್ರಾ ಕುಂದಾಪುರನ ಪೊಟ್ಟು ಆರೋಪ ಕೇಂದ್ ಎಂಕ್ ಪಿಸ್‌ರ್ ಬತ್ತಿತ್ತ್ಂಡ್ ಪಂದ್ ಪಂಡೆರ್.
ಎಂಕ್‌ಲಾ, ಪ್ರಕರಣೊಗ್ಲಾ ಒವ್ವೇ ಸಂಬಂಧ ಇಜ್ಜಿ: ಸ್ವಾಮೀಜಿ
ಈ ಪೊರ್ತುಡು ಪಾತೆರೊಂದು ‘ಎಂಕ್‌ಲಾ, ಆಲೆನ ಪ್ರಕರಣೊಗ್ಲಾ ಒವ್ವೇ ಸಂಬಂಧ ಇಜ್ಜಿ. ಜುಲೈ ತಿಂಗೊಲುಡು ಹಿಂದೂ ಸಂಘಟನೆದ ಸತ್ಯಜಿತ್ ಸುರತ್ಕಲ್ ಫೋನ್ ಮಲ್ತಿತ್ತೆರ್. ಗೋವಿಂದ ಪೂಜಾರಿಗ್ ಟಿಕೆಟ್ ಕೊರ್ಪುನ ವಿಚಾರೊಡು ದಗೆ ಮಲ್ತಿನ ಬಗೆಟ್ ಎನಡ ಪ್ರಶ್ನೆ ಮಲ್ತಿತ್ತೆರ್. ಆಂಡ, ಎಂಕ್ ದಾಲ ತೆರಿದಿತ್ತಿಜಿ, ಎನಡ ದಾಯೆ ಕೇನೊಂದುಲ್ಲರ್ಂದ್ ಕೇಂದಿತ್ತೆ. ಬೊಕ್ಕ ಆರೇ ಫೋನ್ ಮಲ್ತ್‌ದ್, ಚೈತ್ರಾ ಬೊಕ್ಕ ಅಭಿನವ ಹಾಲಶ್ರೀನ ಪುದರ್ ಉಂಡು ಪಂದ್ ಪಂದಿತ್ತೆರ್. ಹಾಲಶ್ರೀ ಯುವ ಬ್ರಿಗೇಡ್‌ದ ಒಟ್ಟುಗು ಇತ್ತಿನಾರ್. ಅಂಚಾದ್ ಚಕ್ರವರ್ತಿ ಸೂಲಿಬೆಲೆನ ಪುದರ್ ಕೇಂದ್ ಬರ್ಪಿನ ಸಂಶಯ ಆಂಡ್. ಆ ಪೊರ್ತುಡು ಆರೆಗ್ ಫೋನ್ ಮಲ್ತಿತ್ತೆ ಪಂದ್ ಪಂಡೆರ್.
ಗಗನ್ ಕಡೂರ್‌ನ ಪುದರ್ ಬನ್ನಗ ಸಿಟಿ ರವಿನ ಗೇನೊಕು ಕನದ್ಂಡ್. ಆರೆಡ ಕೂಲಕುಂಶವಾದ್ ಪಾತೆರ್ಲೆ, ಇಡೆಗೆ ಬುಡೊರ್ಚಿ ಪಂದ್ ಪಂದಿತ್ತೆ. ಚೈತ್ರಾ ಕುಂದಾಪುರನ ಒಟ್ಟುಗು ಪಾತೆರೊಡುಲ್ಲರಾ ಪಂದ್ ಸೂಲಿಬೆಲೆ ಕೇಂದಿತ್ತೆರ್. ಚೈತ್ರಾ ಕುಂದಾಪುರ ಬರೆತಿನ ಮಸ್ತಿರೆಗ್ ಬೆನ್ನುಡಿ ಬರೆದಿತ್ತೆ. ಅಂಚಾದ್ ಆಲೆನ ಸಂಪರ್ಕ ಉಂಡು ಪಂದ್ ಪಂದಿತ್ತೆ. ಅಂಚ ಇತ್ತ್ಂಡ ಚೈತ್ರಾ ಕುಂದಾಪುರಡಲಾ ಒರ ಪಾತೆರ್ಲೆ ಪಂದ್ ಚಕ್ರವರ್ತಿ ಸೂಲಿಬೆಲೆ ಪಂದಿತ್ತೆರ್ ಪಂದ್ ಪಂಡೆರ್. ಇತ್ತೆ ಸಿಸಿಬಿ ಪೊಲೀಸೆರ್ ಸ್ವಾಮೀಜಿಗ್ ನೋಟಿಸ್ ಕೊರ್ತೆರ್.