Last updated on November 11th, 2023 at 09:58 am
ಕುಡ್ಲ: ಕೂಳೂರು ಸಂಕದಲ್ಪದ ಕುದುರೆಮುಖ ಜಂಕ್ಷನ್‌ದಲ್ಪ ಮೆಗ್ಯೆ-ಪಲಯೆ ಒಟ್ಟುಗು ಪೋವೊಂದಿತ್ತಿನ ಬೈಕ್‌ಗ್ ಪ್ರೈವೇಟ್ ಕಾಲೇಜಿದ ಬಸ್ ಒಂಜಿ ಎಡ್ತ್‌ನೆರ್ದಾವರ ಸಾದಿಗ್ ಬೂರ್ದ್, ಬೂರ್ನಕಲೆನ ಮೇಲ್‌ಡೆ ಲಾರಿ ಪೋಯಿನೆರ್ದಾವರ ಒರಿ ಅಲ್ಪನೇ ತೀರ್ದ್, ಕುಡೊರಿಯಗ್ ಗಾತಿದ ಪೆಟ್ಟಾತಿನ ನಡಕೆ ಕೋಡೆ, ಶುಕ್ರವಾರ ಬಯ್ಯಡ್ ನಡತ್‌ದ್ಂಡ್.
ತೀರ್ದಿನಾರೆನ್ ಕೃಷ್ಣಾಪುರ 4ನೇ ಬ್ಲಾಕ್‌ ನಿವಾಸಿ ಬಶೀರ್‌(42) ಪಂದ್ ಗುರ್ತಪತ್ತ್‌ದಿತ್ತ್‌ದ್, ಆರೆನ ಪಲಯೆ ಅಶ್ರಫ್‌(52) ಗಾತಿದ ಗಡಿಕುಲಾದ್, ಕುಡ್ಲದ ಆಸ್ಪತ್ರೆಡ್ ಅಡ್ಮಿಟ್ ಆದುಲ್ಲೆರ್.
ಬಶೀರ್‌ ಬೊಕ್ಕ ಆರೆನ ಪಲಯೆ ಅಶ್ರಫ್‌ ಜೋಕಟ್ಟೆರ್ದ್ ಕುದುರೆಮುಖೊಟೆ ಆದ್ ಕೃಷ್ಣಾಪುರೊಕು ತನ್ಕುಲೆ ಬೈಕ್‌ಡ್ ಬರೊಂದುಪ್ಪುನಗ ಕಾಲೇಜಿದ ಬಸ್ ಎಡ್ತ್‌ದ್ ಸಾದಿಗ್ ಬೂರ್ದೆರ್. ಅವ್ವೇ ಪೊರ್ತುಡು ಬರಸ್‌ಡ್ ಬತ್ತಿನ ಲಾರಿ ಒಂಜಿ ಅಕಲೆನ ಮೇಲ್‌ಡೆ ಪೋತುಂಡು ಪಂದ್ ತೆರಿದ್‌ಬೈದ್ಂಡ್.
ನಡಕೆಗ್ ಸಂಬಂಧಿತ್‌ದ್ ಬಡಕಾಯಿ ಕುಡ್ಲ ಸಂಚಾರ ವಿಭಾಗೊದ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದ್, ಪ್ರಕರಣ ದಾಕಲ್ತೊಂದೆರ್.