Last updated on November 17th, 2023 at 12:37 pm
ಮೈಸೂರು: ಕಾಂಗ್ರೆಸ್ ಮುತಾಲಿಕೆದ ರಾಜ್ಯ ಸರ್ಕಾರ 5 ಗ್ಯಾರಂಟಿಲೆಡ್ ಗೃಹಲಕ್ಷ್ಮೀ ಯೋಜನೆನ್ ಚಾಮುಂಡೇಶ್ವರಿಗ್ ಅರ್ಪಣೆ ಮಲ್ತಿತ್ತ್‌ದ್, ಪ್ರತಿ ತಿಂಗೊಲು ದೇವಲ್ಯೊಗು 2 ಸಾವಿರ ರೂ. ಕೊರ್ಪುನ ನಿರ್ಧಾರ ಮಲ್ದ್ಂಡ್.
ಇಲ್ಲದ ಯಜಮಾನ್ದಿನ ಖಾತೆಗ್ ಪ್ರತಿ ತಿಂಗೊಲು 2 ಸಾವಿರ ರೂಪಾಯಿ ಕೊರ್ಪುನ ಗೃಹಲಕ್ಷ್ಮೀ ಯೋಜನೆದ ಉದಿಪನ ಮೈಸೂರ್‌ದ ಚಾಮುಂಡೇಶ್ವರಿ ದೇವಲ್ಯೊಡು ನಡತಿತ್ತ್ಂಡ್. ಅಂಚಾದ್ ಚಾಮುಂಡೇಶ್ವರಿಗ್ ಈ ಯೋಜನೆನ್ ಅರ್ಪಣೆ ಮಲ್ದೆರ್.
ಚಾಮುಂಡೇಶ್ವರಿಗ್ ಗೃಹಲಕ್ಷ್ಮೀದ 2000 ರೂ. ಕೊರ್ಪುನ ವಿಚಾರೊದ ಬಗೆಟ್ ದಿನೇಶ್ ಗೂಳಿಗೌಡೆರ್ ಬರೆತಿನ ಓಲೆಗ್ ಬೇಗೊಡೇ ಸದು ಕೊರ್ತಿನ ಡಿಸಿಎಂ ಡಿಕೆ ಶಿವಕುಮಾರ್, ಪ್ರತಿ ತಿಂಗೊಲು ಅಪ್ಪೆ ಚಾಮುಂಡೇಶ್ವರಿನ ದೇವಲ್ಯೊಗು 2 ಸಾವಿರ ಅರ್ಪಣೆ ಮನ್ಪುನ ಕ್ರಮ ಗೆತೊನೆರ ಸಚಿವೆದಿ ಲಕ್ಷ್ಮೀ ಹೆಬ್ಬಾಳ್ಕರ್‌ ಮೆರೆಗ್ ಸೂಚನೆ ಕೊರ್ತೆರ್.
ರಾಜ್ಯ ಸರ್ಕಾರ ಕನತಿನ ಗೃಹಲಕ್ಷ್ಮೀ ಯೋಜನೆ ಪೊಂಜೊವುಲೆಗ್ ಬಾರೀ ಉಪಕಾರಿಯಾದಿತ್ತ್‌ದ್. ಎಲೆಕ್ಷನ್‌ಗ್ ದುಂಬು ಕಾಂಗ್ರೆಸ್ ಪಕ್ಷೊದ ಕಡೆರ್ದ್ ಮೈಸೂರ್‌ದ ಚಾಮುಂಡೇಶ್ವರಿ ದೇವಲ್ಯೊಗು ಪೋದು ಪಕ್ಷೊದ ಐನ್ ಗ್ಯಾರಂಟಿ ಕಾರ್ಡ್‌ಲೆನ್ ದೀದ್ ಅಪ್ಪೆ ಶಕ್ತಿ ಕೊರ್ಲ ಪಂದ್ ನಟ್ಟ್‌ದಿತ್ತೆರ್. ಪಕ್ಷ ಅಧಿಕಾರೊಗು ಬತ್ತ್ಂಡ ಗ್ಯಾರಂಟಿ ಈಡೆತ್ತಾವುನ ಪಾತೆರೊನುಕೊರ್ದಿತ್ತೆರ್ ಪಂದ್ ದಿನೇಶ್ ಗೂಳಿಗೌಡೆರ್ ತನ್ನ ಓಲೆಡ್ ಉಲ್ಲೇಖ ಮಲ್ದೆರ್.