Last updated on November 1st, 2023 at 12:53 pm
ತುಳುವೆರೆನ ಬೇಡಿಕೆಲೆಗ್ ಕರ್ನಾಟಕ ಒವ್ವೇ ಬಿಲೆ ಕೊರೊಂದಿಜ್ಜಿ ಪನ್ದ್ ತುಳು ಪರ ಪೊರುಂಬಾಟಗಾರೆರ್ ಇತ್ತೆ ಪ್ರತ್ಯೇಕ ತುಳು ರಾಜ್ಯದ ಬೇಡಿಕೆಗ್ ಜತ್ತ್‌ದೆರ್. ಕರಿನ ಸುಮಾರ್ ವರ್ಸೊರ್ದಿಂಚಿ ತುಳುಕು ಕರ್ನಾಟಕ ರಾಜ್ಯದ ಅಧಿಕೃತ ರಾಜ್ಯಬಾಸೆದ ಮಾನಾದಿ ಕೊರೊಡು ಪನ್ಪಿನವು ತುಳುವೆರೆನ ಬೇಡಿಕೆ ಆದಿತ್ತ್ಂಡ್. ಈತ್ ವರ್ಸೊಲೆಡ್ ಮಾತಾ ಪಕ್ಷೊಲೆನ ಸರಕಾರ ಬತ್ತ್ಂಡಲಾ, ತುಳಿವೆರೆನ ಬಾಸೆಗ್ ಮಾನಾದಿಗೆ ಕೊರ್ಪಾವರೆ ಆಯಿಜಿ. ತುಳಿವೆರೇ ಮಂತ್ರಿಲಾದ್ ತುಳಿವೆರ್ ಗೆಂದಾಯಿನ ಸರಕಾರ ಉಪ್ಪುನಗಲಾ ತುಳುಕು ಮಾವಾದಿಗೆ ಕೊರ್ಪಿನ ಬೇಲೆ ದುಂಬೇ ಪೋಯಿಜಿ. ಇಂಚ ಉಪ್ಪುನಗ ತುಳುವೆರೆನ ಬೇಡಿಕೆಲೆಗ್ ಒವ್ವೇ ಬಿಲೆ ಇಜ್ಜಿ ಪನ್ದ್ ತೆರಿಯೊನಿನ ತುಳಿವೆರ್ ಪ್ರತ್ಯೇಕ ರಾಜ್ಯದ ಬೇಡಿಕೆ ದೀತೆರ್.
ಕರ್ನಾಟಕದೊರ್ಮೆ ಕರ್ನಾಟಕ ರಾಜ್ಯೋತ್ಸವೊನು ಗರ್ದಿಡ್ ಮಲ್ತೊಂದಿಪ್ಪುನಗ ತುಳುನಾಡ್‌ಡ್ ಕರಾಳ ದಿನ ಪನ್ದ್ ತುಳುವೆರ್ ಟ್ವಿಟರ್, ಫೇಸ್ಬುಕ್, ವಾಟ್ಸಾಪ್‌ಲೆಡ್ ವೈರಲ್ ಮಲ್ತೊಂದುಲ್ಲೆರ್. ನಮಕ್ ಪ್ರತ್ಯೇಕ ರಾಜ್ಯ ಇತ್ತ್ಂಡ ಏರೆಡಲಾ ಕೇನೊಡುಂದು ಇಜ್ಜಿ ನಮ್ಮ ರಾಜ್ಯೊಡು ನಮ್ಮ ಬಾಸೆನ್ ಅಧಿಕೃತ ಮಲ್ಪೊಲಿ ಪನ್ದ್ ಪೊರುಂಬಾಟಗಾರೆರ್ ಪನೊಂದುಲ್ಲೆರ್. ವರ್ಸೊರ್ದು ವರ್ಸ ತುಳುರಾಜ್ಯದ ಬೇಡಿಕೆ ಎಚ್ಚ ಆವೊಂದುಂಡು.
