Last updated on November 8th, 2023 at 09:02 am
ಬೊಲ್ತೇರ್ ತಾಲೂಕ್‌ದ ಕುಡುಮ ಪಾಂಗಾಳದ ಎಸ್.ಡಿ.ಎಂ ಕಾಲೇಜ್ ವಿದ್ಯಾರ್ಥಿನಿ ಸೌಜನ್ಯ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣೊನು ಪಿರಜಡ್ತೆ ಮನ್ಪಾವೊಡೂಂದು ಹೈಕೋರ್ಟ್‌ಗ್ ಸಿಬಿಐ ಅಧಿಕಾರಿಲು ಬಿನ್ನಪು ಸಂದೈತ್‌ದೆರ್ ಪನ್ಪಿನ ಮಹತ್ವೊದ ಒಲವು ತಿಕ್ಕ್‌ದ್ಂಡ್. ತಿಕ್ಕಿನ ಒಲವುಲೆನ ಪ್ರಕಾರ ಉ್ಂದು ಸೌಜನ್ಯ ಪೊರ್ಮ್ಬಾಟೊಗು ಪೂರಕ ಬುಲೆಚ್ಚಿಲ್ ಪಂದ್ ಜನ ಪಾತೆರೊಂದುಲ್ಲೆರ್.
ಪ್ರಕರಣೊಡು ಕೆಲ ಆರೋಪಿಲೆನ ಬೊಕ್ಕ ಪ್ರಭಾವಿಲೆನ ಪುದರ್ ಕೇಂದ್‌ಬತ್ತಿತ್ತ್ಂಡ್. ಆಂಡ ಕಡೆಕ್ ಆರೋಪಿ ಪಂದ್ ಕೈದಾದಿತ್ತಿನ ಸಂತೋಷ್ ರಾವ್‌ನ್ ನಿರ್ದೋಷಿ ಪಂದ್ ತೀರ್ಪು ಕೊರ್ದು ಕೋರ್ಟ್ ಬುಡುಗಡೆ ಮಲ್ತಿತ್ತ್ಂಡ್. ಇತ್ತೆ ತೀರ್ಪು ಬತ್ತ್‌ದ್ ಒಂತೆ ತಿಂಗೊಳು ಕರಿದ್ ಸಿಬಿಐ ಅಧಿಕಾರಿಲು ಹೈಕೋರ್ಟ್‌ಗ್ ಮಿತ್ತಬಿನ್ನಪು ಸಂದಾದೆರ್. ಸಿಬಿಐದ ಈ ನಡೆ ಜನೊಕ್ಲೆಡ ಸೋದ್ಯ ಉಂಡುಮಲ್ದ್ಂಡ್.
ಸೌಜನ್ಯ ಕೊಲೆ ಪ್ರಕರಣೊಡು ಸಿಬಿಐ ನ್ಯಾಯಂತಡೆ ಆರೋಪಿ ಸಂತೋಷ್ ರಾವ್‌ಗ್ ಸಮಕಟ್ಟ್‌ದ ಸಾಕ್ಷ್ಯಾಧಾರ‌ದಾಂತಿನೆರ್ದಾವರ ನಿರ್ದೋಷಿ ಪಂದ್ ತೀರ್ಪು ಕೊರ್ದಿತ್ತ್‌ದ್, ಇತ್ತೆ ನವೆಂಬರ್ 5, ಶನಿವಾರದಾನಿ ಸಿಬಿಐ ತನಿಖಾಧಿಕಾರಿಲು ಹೈ ಕೋರ್ಟ್‌ಗ್ ಬಿನ್ನೈತ್‌ದೆರ್ ಪಂದ್ ತೆರಿದ್‌ಬೈದ್ಂಡ್.
ಸೌಜನ್ಯಗ್ ನ್ಯಾಯ ತಿಕ್ಕೊಡೂಂದು ಮಾತೆರ್ಲಾ ಕಾತೊಂದುಪ್ಪುನಗ ಸಿಬಿಐ ಅಧಿಕಾರಿಲೆನ ಈ ವಿಶೇಷ ನಡೆ ಸೌಜನ್ಯ ಪೊರ್ಮ್ಬಾಟೊಗು ಪೂರಕ ಪಂದ್ ಪನೊಂದುಲ್ಲೆರ್. ಪಿರಜಡ್ತೆಗ್ ಹೈಕೋರ್ಟ್ ಒಪ್ಯುಂಡಾ ಇಜ್ಜಾ ಪನ್ಪಿನೆನ್ ನನ ತೂವೊಡಾತೆ.